Ivie vuẹ omai omoware jọ kpahe oke emaha ra.

A yẹ omẹ evaọ orẹwho Italy evaọ ukpe 1943. Mẹ avọ inievo-emezae gbe erọ emetẹ mẹ ma whẹro evaọ iwhre jọ, yọ ọsẹ mẹ ọ jọ ọwhẹrẹ gbe ekapenta. Ichọche Katọlik ọsẹgboni mai a jọ, yọ ichọche na ma jẹ nya re.

Kọ fikieme whọ rọ gwọlọ jọ ozerẹ evaọ oke yena?

Nọ mẹ gbẹ jọ ọmaha, oma o jẹ hae were omẹ gaga nọ izerẹ na a tẹ be kẹ ovuẹ evaọ obọ ichọche. Urru nọ a rẹ rọ ta ẹme gbe iruẹru ichọche na e jẹ hae were omẹ wo umuo ho. Fikiere mẹ tẹ gbaemu nọ mẹ rẹ jọ ozerẹ. Kẹsena, nọ mẹ jọ ikpe ikpegbesa, oni mẹ o te fi omẹ họ isukulu jọ. A rẹ jọ isukulu na wuhrẹ emaha epanọ a rẹ rọ ruẹrẹ oma kpahe kẹ isukulu ilogbo nọ a te jọ wuhrẹ ae epanọ a rẹ rọ jọ izerẹ.

Kọ a je wuhrẹ owhai Ebaibol evaọ isukulu na?

Ijo. Nọ mẹ jọ ikpe ikpegbisoi, iticha mẹ jọ ọ tẹ kẹ omẹ obe jọ nọ Ebe Usi Uwoma Ene na e rrọ, onọ whọ rẹ jọ ruẹ iku uzuazọ Jesu gbe iruo odibọgba riẹ. Yọ me se obe yena unuẹse buobu. Nọ mẹ jọ ikpe ikpegberee, me te kpobọ Rome re mẹ jọ obei kpohọ isukulu ilogbo sa-sa nọ e jọ otọ ekpakpọ osu ichọche na nọ a re se ipopu. Mẹ jọ obei wuhrẹ ẹvẹrẹ Latin gbe Greek. Me te je wuhrẹ kpahe iku-anwae, ereghẹ ididi, iroro gbe uruemu ohwo-akpọ, jegbe iwuhrẹ-egagọ. U wo eria Ebaibol sa-sa nọ ma jẹ hae se no uzou ze, yọ a tẹ be kẹ ovuẹ evaọ Ẹdoka a re se Ebaibol re, rekọ ma jẹ romatotọ wuhrẹ Ebaibol na ha.

Evaọ oke jọ, a rehọ owhẹ mu ọnọ o wuzou isukulu ichọche na jọ. Kọ whọ jẹ hai wuhrẹ ahwo?

Mẹ họ ọnọ ọ jẹ hae kpọ oghẹrẹ nọ a re ru eware evaọ isukulu na. Rekọ ẹsejọ mẹ jẹ hae wuhrẹ emọ isukulu na kpahe izi ogbẹgwae Katọlik na jọ nọ a re se Second Vatican Council.

Fikieme who ro mu avro họ ewo kpahe ichọche na?

Eware esa e jẹ kẹ omẹ uye kpahe ichọche na. Ahwo ichọche na a je dhomahọ isuẹsu. Isu ichọche na a je gbolaro kẹ iruemu ọfariẹ nọ izerẹ ichọche na gbe ahwo ichọche na a je ru. Yọ eware jọ nọ a je wuhrẹ evaọ ichọche Katọlik na e gba ha. Wọhọ oriruo, ẹvẹ Ọghẹnẹ nọ ọ rrọ yoyou ọ rẹ rehọ erae mahe ahwo nọ a whu no bẹdẹ bẹdẹ? Ofariẹ, kọ Ọghẹnẹ ọ ginẹ gwọlọ nọ ma rọ ufiare lẹ sei je dhe olẹ na ẹwẹwariẹ? *

Kọ eme who ru?

Avọ irui-oviẹ nọ i bi su no omẹ aro ze, mẹ tẹ lẹ se Ọghẹnẹ re o fiobọhọ kẹ omẹ riẹ oware nọ me re ru. Kẹsena, mẹ tẹ dẹ Ebaibol Katọlik nọ a re se Jerusalem Bible, onọ a siobọno kẹle evaọ ẹvẹrẹ Italy je mu ei họ ese. Nọ ma ru Emase no evaọ ohiohiẹ Ẹdoka ẹdẹjọ, ezae ivẹ jọ e tẹ nyaziọ ighẹ isukulu na evaọ okenọ mẹ jẹ ba iwu ozerẹ mẹ no fihọ obei. Ezae ivẹ na a tẹ vuẹ omẹ nọ ae yọ Isẹri Jihova. Me lele i rai ta ẹme vrẹ auwa ọvo kpahe Ebaibol na gbe oware nọ Ebaibol na ọ ta kpahe oghẹrẹ nọ ma sai ro vuhu egagọ uzẹme.

Eme họ oware jọ nọ o were owhẹ kpahe Isẹri Jihova ivẹ na?

Oware jọ nọ o were omẹ kpahe ezae ivẹ na họ, a jẹ ta eware nọ a rọwo avọ imuẹro yọ a dhesẹ eria ikere sa-sa kẹ omẹ evaọ Ebaibol Katọlik jọ. Uwhremu na, Osẹri Jihova ọfa nọ a re se Mario o te mu omẹ Ebaibol na họ ewuhrẹ. Ẹdẹ nọ o re ro wuhrẹ Ebaibol kugbe omẹ na o re voi hi, yọ ọ jẹ hai thihakọ kẹ omẹ. Ọ rẹ nyaze evaọ ohiohiẹ Ẹdẹ-Ọmaha kpobi evaọ ighọjọ izii, te uvo o be rro hayo oso o be rrọ.

Kọ ẹvẹ izerẹ edekọ a rri uwuhrẹ Ebaibol na?

Evaọ okenọ Isẹri Jihova na a te bi wuhrẹ omẹ, mẹ rẹ ta kẹ ae re a kuomagbe omẹ, rekọ ọvuọvo o se uwuhrẹ Ebaibol na gboja ha. Rekọ uwuhrẹ na o jẹ hae were omẹ gaga. Me wuhrẹ eware buobu nọ mẹ gwọlọ riẹ iyo rai anwẹdẹ vẹre. Wọhọ oriruo, me wuhrẹ kpahe oware nọ Ọghẹnẹ ọ rọ kuvẹ kẹ emuemu gbe uye-oruẹ.

Kọ enọ i wuzou ichọche na a jẹ daoma whaha owhẹ re whọ siọ Ebaibol na ba ewuhrẹ?

Evaọ ukpe 1975, me kpohọ obọ Rome unuẹse buobu re mẹ vuẹ ae kpahe epanọ me rri iwuhrẹ gbe iruẹru ichọche na. Enọ i wuzou ichọche na a tẹ jẹ daoma tẹzẹ omẹ re me nwene iroro mẹ, rekọ a sai dhesẹ oria Ebaibol ọvo kẹ omẹ hẹ. Kẹsena evaọ amara Ọvo 9, 1976, me te kere se enọ i wuzou ichọche na evaọ Rome inọ me no ichọche Katọlik no. Nọ edẹ ivẹ e vrẹ no, me te no isukulu na jẹ ruọ itreni kpohọ oria nọ Isẹri Jihova a rẹ jọ ru ewuhrẹ re me kuomagbe ai. Nọ me te obei, mẹ tẹ ruẹ nọ ikoko Isẹri Jihova buobu ae a kokohọ. Onana họ orọ ọsosuọ nọ me ro kuomagbe Isẹri Jihova. Eware kpobi nọ a je ru i wo ohẹriẹ no erọ ichọche nọ mẹ jọ na. Ohwo kpobi nọ ọ jọ etẹe o wo ọvuọ Ebaibol riẹ, yọ a je rovie Ebaibol rai re a rri lele ahwo nọ a jẹ kẹ ovuẹ no Ebaibol na ze.

Kọ ẹvẹ oware nana nọ who ru na o jọ ahwo uviuwou ra oma?

Ahwo uviwuou mẹ buobu a wọso omẹ gaga. Rekọ mẹ tẹ te riẹ nọ Isẹri Jihova a bi wuhrẹ Ebaibol kugbe oniọvo-ọmọzae mẹ jọ evaọ Lombardy, onọ o rrọ ofẹ ẹkpẹlobọ ovatha-ọre Italy. Me tẹ nyae ruẹ e riẹ, yọ Isẹri Jihova nọ e jọ obei a fiobọhọ kẹ omẹ gwọlọ iruo nọ me re ru gbe uwou nọ mẹ rẹ rria. Uwhremu na, mẹ tẹ họ-ame evaọ ukoko Isẹri Jihova evaọ ukpe yena.

Kọ whọ vioja iroro nọ whọ jẹ na?

Mẹ vioja riẹ vievie he! Enẹna, me wo usu okpekpe kugbe Ọghẹnẹ keme eware nọ mẹ riẹ kpahe iẹe i no Ebaibol na ze orọnikọ iku gheghe hayo eware ichọche nọ a ru no anwae ze he. Yọ mẹ be sai wuhrẹ amọfa ududu kpahe eware nọ mẹ rọwo evaọ Ebaibol na.