OWARE NỌ EBAIBOL Ọ TA
Edhọ-Ifio
Ahwo buobu a re rri edhọ-ifio wọhọ oware arozaha gheghe, rekọ amọfa a re rri rie wọhọ oware uyoma.
Kọ o thọ re ohwo o fi edhọ?
EME NỌ AHWO JỌ A TA
Ahwo buobu a re roro nọ edhọ-ifio yọ oware arozaha gheghe, thakpinọ ohwo bi o lele uzi nọ a fihọ kpahe edhọ-ifio na. Oghẹrẹ edhọ-ifio jọ wọhọ enọ egọmeti orẹwho soso o to họ, a rẹ jarai wo ugho ziezi nọ a re ro ru eware fihọ orẹwho rai.
ẸME NỌ EBAIBOL NA Ọ TA
Whọ rẹ jọ Ebaibol na ruẹ oria ọvo nọ a jọ ta ẹme buobu kpahe edhọ-ifio ho. Rekọ whọ rẹ ruẹ ehrẹ sa-sa evaọ Ebaibol na nọ i re fiobọhọ kẹ omai riẹ oghẹrẹ nọ Ọghẹnẹ o rri edhọ-ifio.
Ẹjiroro nọ ahwo a re ro fi edhọ họ, re a ruẹse re igho amọfa. Rekọ uruemu nana o wọso unuovẹvẹ nọ Ebaibol na o kẹ inọ ma “yọroma kẹ oghẹrẹ uvou-uthei kpobi.” (Luk 12:15) Uzẹme riẹ họ, uvou-uthei họ oware nọ o rẹ lẹliẹ ohwo fi edhọ. Ahwo nọ a wo okọ edhọ-ifio na a re fi igho buobu họ re u si ahwo urru, rekọ a rẹ vuẹ ahwo ho sọ a te fi a te ginẹ re igho na. A re ru onana re ahwo a roro nọ a tẹ rehọ igho buobu fi, yọ a fe no. Edhọ-ifio i re ru nọ ohwo ọ rẹ rọ gwọlọ fe vẹrẹ vẹrẹ, viukpenọ ohwo ọ rẹ whaha uruemu uvou-uthei.
Oriobọ họ oware nọ o rẹ lẹliẹ ohwo fi edhọ keme ọ rẹ gwọlọ epanọ ọ rẹ rọ re igho amọfa. Rekọ Ebaibol na ọ ta nọ ohwo kpobi ọ “hae daoma ru oware nọ o rẹ kẹ omọfa erere orọnikọ omobọ riẹ hẹ.” (1 Ahwo Kọrint 10:24) Uzi jọ evaọ usu Izi Ikpe na o ta nọ ohwo o re siuru “oware kpobi nọ o rrọ orọ ọrivẹ” riẹ vievie he. (Ọnyano 20:17) Nọ ohwo nọ o re fi edhọ ọ tẹ be gwọlọ nọ ọ rẹ re, kiyọ o bi rẹro nọ u ti kiekpe amọfa re ọ sae re igho rai kpobi.
Ebaibol na ọ vẹvẹ omai unu kpahe eriwo nọ ahwo jọ a wo inọ u wo oware jọ nọ o rẹ whae ze nọ ohwo o re ro wou uzou. Evaọ oke ahwo Izrẹl, u wo ahwo jọ nọ a fievahọ Ọghẹnẹ hẹ, fikiere a tẹ jẹ “ruẹrẹ emẹjẹ họ kẹ ọghẹnẹ Emamuzo.” Kọ Ọghẹnẹ ọ jẹ egagọ rai rehọ nọ a jẹ ruẹrẹ emẹjẹ họ kẹ “ọghẹnẹ Emamuzo” na? Ijo, ọ ta kẹ ae nọ: “Wha ruabọhọ je ru oware nọ u yoma evaọ aro mẹ, wha tẹ salọ oware nọ o dha omẹ eva.”—Aizaya 65:11, 12.
Evaọ ofẹ akpọ na, a rẹ rehọ igho nọ a wo no edhọ-ifio ze rọ hwa esa isukulu, ru eware fihọ orẹwho je ru eware efa sa-sa. Dede nọ a be rọ igho na ru eware nana, oghẹrẹ nọ a ro wo igho na o rẹ tuduhọ ahwo awọ re a wo uvou-uthei gbe oriobọ, jẹ lẹliẹ ahwo roro nọ a sai wo ugho evaọ oware nọ a ruẹ uye fihọ họ.
“Who re siuru . . . oware kpobi nọ o rrọ orọ ọrivẹ ra [ha].”—Ọnyano 20:17.
Ebẹbẹ vẹ i re te ohwo nọ o re fi edhọ?
ẸME NỌ EBAIBOL NA Ọ TA
Ebaibol na ọ vẹvẹ omai unu nọ “ahwo nọ a gba riẹ mu nọ a re fe a re kie ruọ odawọ gbe agbefẹ gbe isiuru igheghẹ gbe erọ enwoma buobu nọ i re su ahwo kpohọ ọraha gbe uwhu.” (1 Timoti 6:9) Uvou-uthei o rẹ lẹliẹ ohwo fi edhọ, yọ “uvou-uthei” u yoma te epanọ Ebaibol na ọ rọ fodẹ iẹe kugbe iruemu iyoma nọ ma rẹ kẹnoma kẹ riẹriẹriẹ.—Ahwo Ẹfisọs 5:3.
Fikinọ ohwo nọ o re fi edhọ ọ rẹ gwọlọ epanọ o re ro fe lọlọhọ, o rẹ lẹliẹ ohwo wo uyoyou ugho, onọ Ebaibol na o dhesẹ wọhọ “ehri oghẹrẹ eware iyoma kpobi.” Ohwo ọ sae wo isiuru ugho te epanọ isiuru na e rẹ rọ kpọ uzuazọ riẹ. Isiuru egaga nana e sai ru nọ ohwo ọ rẹ rọ jọ awawa je reghe no egagọ Ọghẹnẹ. Ebaibol na o dhesẹ enwoma nọ i re te ahwo nọ a wo uyoyou ugho inọ a rehọ “eware edada buobu duwu omarai soso no.”—1 Timoti 6:10.
Uvo-uthei u re ru nọ eware nọ ohwo o wo e gbẹ rọ dae ẹro ho, yọ eva e rẹ gbẹ were ohwo na ha. “Ohwo nọ o you isiliva, isiliva e rẹ dae ẹro ho, yọ ohwo nọ o you ekwakwa efe, ugho o rẹ dae ẹro ho.”—Ọtausiuwoma Na 5:10.
Ima ahwo buobu nọ a bẹbẹ họ ruọ edhọ-ifio a muẹrohọ nọ o rọ bẹbẹ kẹ ae re a se iẹe ba. Oria kpobi ẹbẹbẹ nana ọ rrọ, yọ wọhọ epanọ ọkiẹriwo jọ nọ a ru u dhesẹ, ima ahwo buobu evaọ United States a be sae siọ edhọ-ifio ba ha fikinọ ọ reria e rai oma no.
Ebaibol na ọ ta nọ: “Ukuoriọ nọ a rọ uvou-uthei wo evaọ emuhọ o rẹ jọ oghale he evaọ ukuhọ riẹ.” (Itẹ 20:21) Edhọ-ifio u ru nọ ahwo buobu a ro kie ruọ ebẹbẹ buobu no. Wọhọ oriruo, ibuobu a riesa vọ uzou no, a si ibuobu no iruo no, erọo ahwo jọ e fa no, yọ ibuobu i gbe wo egbẹnyusu hu. Nọ ohwo o te bi ru lele ehrẹ Ebaibol, u re ru nọ ọ rẹ rọ whaha ebẹbẹ nọ i re no edhọ-ifio ze, enọ i re ru nọ ọ gbẹ rrọ wereva evaọ uzuazọ họ.
“Ahwo nọ a gba riẹ mu nọ a re fe a re kie ruọ odawọ gbe agbefẹ gbe isiuru igheghẹ gbe erọ enwoma buobu nọ i re su ahwo kpohọ ọraha gbe uwhu.”—1 Timoti 6:9.