Roro kpahe oware nọ eriwo otiọye u dhesẹ. Oniọvo-ọmọzae jọ nọ ọmọzae riẹ o thuru whu ọ nọ inọ: ‘Kọ Jihova ọ wawo uwhu ọmọzae mai nọ o thuru whu na jẹ ruẹ nọ mẹ avọ aye mẹ ma te sai thihakọ riẹ? Kọ oware nana o via fikinọ Ọghẹnẹ o ku rie họ nọ ma te sai thihakọ riẹ?’ Kọ u wo ẹjiroro jọ nọ ma rẹ rọ rọwo nọ Jihova ọ rẹ kpọ eware nọ e rẹ via kẹ omai evaọ uzuazọ?

Ẹme Pọl nọ ọ rrọ obe 1 Ahwo Kọrint 10:13 nọ ma kiẹriwi ziezi u ru nọ ma rọ ta nọ: Ẹjiroro ọvuọvo ọ rrọ Ikereakere na ha nọ ma rẹ rọ rọwo nọ Jihova ọ rẹ wawo edawọ nọ i ti te omai evaọ obaro, kẹsena ọ vẹ salọ enọ ma rẹ sai thihakọ rai re i te omai. Joma ta kpahe ẹjiroro ene jọ nọ ma sae rọ ta ere.

Orọ ọsosuọ, Jihova ọ kẹ ahwo-akpọ ufuoma iroro-ejẹ. Ọ gwọlọ nọ mai ọvo ma salọ oware nọ ma gwọlọ ru evaọ uzuazọ. (Izie. 30:19, 20; Jos. 24:15) Ma tẹ salọ oware nọ u woma, ma rẹ sai fievahọ Jihova inọ ọ te kpọ omai. (Itẹ 16:9) Rekọ ma tẹ salọ oware uyoma, ma rẹ ruẹ uye oware nọ u re noi ze. (Gal. 6:7) O hae jọnọ Jihova ọ rẹ salọ odawọ nọ u re te omai, kọ ogbẹrọnọ ufuoma iroro-ejẹ nọ ọ kẹ omai na ọ be rọ edhere jọ mi omai na?

Orọ avivẹ, Jihova ọ rẹ thọ omai no “eware idudhe” nọ e rẹ sae romavia ha. (Ọtausi. 9:11, NW ) Oware uyoma nọ o rẹ wha ọraha ologbo ze o rẹ sae via di omai họ oria evaọ okenọ ma rẹro riẹ hẹ. Jesu ọ ta kpahe ahwo ikpegberee jọ nọ a whu fiki uwou nọ u kie ruru ae, je dhesẹ nọ orọnikọ ahwo yena a whu fikinọ ere Ọghẹnẹ ọ gwọlọ e riẹ hẹ. (Luk 13:1-5) Nọ oware uyoma o tẹ via nọ ahwo a jọ whu, kọ o rrọ oware areghẹ re ma roro nọ Ọghẹnẹ ọ ma omaa ahwo nọ a re whu hayo zọ evaọ okpẹtu otiọna kpahotọ?

Orọ avesa, avro nọ Setan ọ wha ze kpahe ẹgbakiete ohwo-akpọ u kiekpahe omai omomọvo. Kareghẹhọ nọ Setan ọ ta ẹme avro jọ kpahe ẹgbakiete idibo Ọghẹnẹ kpobi, inọ ma te sai yoẹme kẹ Jihova ha nọ ma tẹ rẹriẹ ovao dhe edawọ. (Job 1:9-11; 2:4; Evia. 12:10) Kọ Jihova ọ tẹ whaha edawọ jọ nọ e  hai ti te omai fikinọ o rri nọ ma te sai thihakọ rai hi, kọ oyena u gbe ti ru nọ a re ro roro nọ ẹme Setan na ginọ uzẹme, inọ eware i te woma kẹ omai ọvo ma jẹ gọ Ọghẹnẹ?

Orọ avene, o gba Jihova họ nọ ọ rẹ riẹ oware kpobi nọ o te via kẹ omai hi. Ma tẹ ta nọ Jihova ọ rẹ salọ edawọ nọ i ti te omai, koyehọ ma be ta nọ o gba Jihova họ nọ ọ rẹ riẹ oware kpobi nọ o te via kẹ omai evaọ obaro. Rekọ eriwo otiọye ọ rọwokugbe Ebaibol na ha. Ginọ uzẹme inọ Ọghẹnẹ ọ rẹ sae riẹ eware nọ e te via evaọ obaro. (Aiz. 46:10) Rekọ Ebaibol na o dhesẹ nọ ọ rẹ salọ oware nọ ọ gwọlọ riẹ kpahe obaro. (Emu. 18:20, 21; 22:12) Fikiere, Jihova ọ rẹ rehọ ẹgba nọ ọ rẹ rọ riẹ kpahe obaro na ru iruo evaọ edhere nọ u re dhesẹ nọ o wo adhẹẹ kẹ ufuoma iroro-ejẹ mai. Kọ ogbẹrọnọ ere ma rẹro mi Ọghẹnẹ nọ o wo adhẹẹ kẹ ufuoma iroro-ejẹ mai, je bi dhesẹ iruemu-aghae riẹ evaọ oghẹrẹ nọ e rẹ rọ rọwokugbe ohwohwo?—Izie. 32:4; 2 Kọr. 3:17.

Nọ o rrọ ere na, kọ eme họ otofa ẹme Pọl na inọ: “Ọghẹnẹ . . . ọ rẹ kuvẹ hẹ re odawọ nọ o rro vi owhai u te owhai”? Pọl ọ be jọ etenẹ dhesẹ oware nọ Jihova o re ru evaọ okenọ ma tẹ rrọ otọ odawọ orọnikọ taure odawọ na u te ti te omai hi. * Ẹme Pọl na ọ kẹ omai imuẹro nọ ghelọ odawọ kpobi nọ u te omai evaọ uzuazọ kẹhẹ, Jihova o ti fiobọhọ kẹ omai nọ ma te fievahọ iẹe. (Ol. 55:22) Ẹme Pọl nana nọ ọ rẹ kẹ omosasọ na ọ roma hwa ugogo eware ivẹ jọ.

Orọ ọsosuọ, ebẹbẹ nọ i re te omai yọ enọ i “bi te ahwo kpobi.” Fikiere, orọnikọ mai ọvo ma be rẹriẹ ovao dhe oware nọ o be kẹ omai uye na ha. Ma te fievahọ Jihova, ma rẹ sai thihakọ ebẹbẹ itieye na. (1 Pita 5:8, 9) Evaọ eme nọ e wariẹ obe 1 Ahwo Kọrint 10:13 na họ, Pọl ọ jẹ ta kpahe edawọ nọ ahwo Izrẹl a rẹriẹ ovao dhe evaọ udhude na. (1 Kọr. 10:6-11) Edawọ yena e jọ erọ oghẹrẹsa ha nọ ohwo-akpọ ọ rẹ sai fi kparobọ họ, ahwo Izrẹl nọ a fievahọ Jihova a sai fi ai kparobọ. Rekọ Pọl ọ ta nọ “ejọ rai” a ghẹmeeyo. U yoma gaga inọ ahwo Izrẹl jọ a kie kẹ ekpehre isiuru fikinọ a rẹroso Jihova ha.

Orọ avivẹ, “Ọghẹnẹ o re ru oware nọ o gba ẹsikpobi.” Oghẹrẹ nọ Ọghẹnẹ o ro yerikugbe idibo riẹ evaọ oke anwae u dhesẹ nọ o wo uyoyou nọ o rẹ hiẹ hẹ kẹ “enọ i you rie je bi koko izi riẹ.” (Izie. 7:9) Onana u dhesẹ nọ Ọghẹnẹ o re koko eyaa riẹ ẹsikpobi. (Jos. 23:14) Oghẹrẹ nọ o ro yerikugbe idibo riẹ oke anwae na u dhesẹ nọ ahwo nọ a you rie je bi yoẹme kẹe nẹnẹ a rẹ sai fievahọ nọ o ti ru eware ivẹ jọ gba kẹ ae nọ a tẹ rẹriẹ ovao dhe odawọ: (1) Ọ te kuvẹ hẹ re odawọ o ga te epanọ a gbẹ sai ro thihakọ riẹ hẹ, gbe inọ (2) “ọ te gbẹ edhere” kẹ ae.

Ẹvẹ Jihova ọ rẹ rọ gbẹ edhere kẹ ahwo nọ a fievahọ iẹe evaọ otọ odawọ? Ọ tẹ gwọlọ, ọ rẹ sai si odawọ na notọ. Rekọ kareghẹhọ nọ Pọl o kere nọ: “[Jihova] ọ te gbẹ edhere kẹ owhai re wha sai thihakọ riẹ.” Fikiere ẹsibuobu, oghẹrẹ nọ Jihova ọ rẹ rọ “gbẹ edhere” kẹ omai họ, ọ rẹ kẹ omai oware nọ o rẹ sai fiobọhọ kẹ omai thihakọ odawọ na hayo fi ei kparobọ. Roro kpahe idhere jọ nọ Jihova ọ rẹ rọ gbẹ edhere kẹ omai:

• “Ọ rẹ sasa omai oma evaọ uye kpobi nọ ma rrọ.” (2 Kọr. 1:3, 4) Jihova ọ rẹ sae rọ Ẹme riẹ, ẹzi ọfuafo na, gbe eware nọ ọrigbo nọ a re fievahọ na o bi kere ze ro ru udu gbe iroro kie omai vi.—Mat. 24:45; Jọn 14:16, ẹme-obotọ; Rom 15:4.

• Ọ rẹ sae rọ ẹzi ọfuafo riẹ kpọ omai. (Jọn 14:26) Nọ edawọ i te te omai, ẹzi ọfuafo na ọ rẹ sai fiobọhọ kẹ omai kareghẹhọ ikuigbe Ebaibol gbe ehri-izi nọ i re fiobọhọ kẹ omai jowọ nọ u fo.

• Ọ rẹ sae rọ ikọ-odhiwu riẹ fiobọhọ kẹ omai.—Hib. 1:14.

• Ọ rẹ sae rọ ibe Ileleikristi mai fiobọhọ kẹ omai re, enọ ẹme gbe iruẹru rai e rẹ sae kẹ omai “omosasọ ulogbo.”—Kọl. 4:11.

Fikiere, eme ma rẹ sae ta nọ ẹme Pọl nọ ọ rrọ 1 Ahwo Kọrint 10:13 na u dhesẹ? Jihova ọ rẹ wawo jẹ salọ edawọ nọ i re te omai hi. Rekọ nọ ma tẹ rẹriẹ ovao dhe odawọ evaọ uzuazọ, ma rẹ sai wo imuẹro inọ: Ma te fi eva mai kpobi họ Jihova, ọ te kuvẹ vievie he re edawọ mai e ga vi enọ ohwo-akpọ ọ rẹ sai thihakọ rai; ọ te gbẹ edhere kẹ omai re ma sai thihakọ rai. Imuẹro nana e rẹ ginẹ kẹ omosasọ!