1. Eme egaga vẹ Pọl ukọ na o kere se Ileleikristi nọ a rọ ẹzi wholo?

“WHA gbẹ kuvẹ re uyero-akpọ nana o kpọ owhai hi.” (Rom 12:2) Pọl o kere eme yena se Ileleikristi ikpe-udhusoi ọsosuọ. Fikieme o ro kere eme egaga itieye se ezae avọ eyae nọ e roma mudhe kẹ Ọghẹnẹ no nọ a rọ ẹzi ọfuafo wholo?​—Rom 1:7.

2-3. Ẹvẹ Setan ọ be rọ gwọlọ ru omai wọso Jihova, kọ ẹvẹ ma sae rọ raha iroro ethọthọ kpobi nọ e “dowọ muotọ” no evaọ udu mai?

² O jẹ kẹ Pọl uye inọ Ileleikristi jọ a be gaviezọ kẹ eme nọ i fo ho gbe eriariẹ akpọ Setan. (Ẹf. 4:17-19) Onana o sae via kẹ omai re. Setan ọghẹnẹ akpọ nana ọ be daoma gaga re o si omai no abọ Jihova, yọ ọ be rehọ eghẹ sa-sa ru onana. Ẹghẹ riẹ jọ họ, o re muẹrohọ sọ ma wo isiuru ọkwa, hayo ma gwọlọ nọ amọfa a riẹ omai odẹ. Ọ rẹ sae tubẹ rehọ uruemu jọ nọ ma wo fiki oghẹrẹ nọ a rọ yọrọ omai, uruemu ahwo nọ a be rria kẹle omai, hayo isukulu nọ ma nya ro ru omai wo ọkpọ iroro ethọthọ riẹ.

³ Kọ o lọhọ re ma “raha eware nọ e dowọ muotọ gaga” no evaọ iroro mai? (2 Kọr. 10:4) Muẹrohọ oghẹrẹ nọ Pọl ọ kuyo onọ yena, inọ: “Ma be raha iroro ethọthọ gbe oware ukpehru kpobi nọ a ru be rọ wọso eriariẹ Ọghẹnẹ, yọ ma bi mu oghẹrẹ iroro kpobi imu re u ru ahwo yoẹme kẹ Kristi.” (2 Kọr. 10:5) Ẹhẹ, Jihova ọ sai fiobọhọ kẹ omai si iroro ethọthọ no udu. Wọhọ epanọ ohwo nọ ọ re enua ọ rẹ rehọ umu ifue na, ere Ẹme Ọghẹnẹ ọ rẹ sai fiobọhọ kẹ omai raha iroro ethọthọ kpobi nọ  e wọhọ enua nọ i no akpọ Setan ruọ omai udu.

4. Eme mai ahwo buobu ma ruẹ nọ ma re ru okenọ ma vuhu uzẹme na mu?

⁴ Roro kpahe eware nọ o gwọlọ nọ who re siobọno evaọ okenọ who ro vuhu uzẹme na mu jẹ jiroro nọ whọ rẹ gọ Jihova. Rọkẹ ibuobu mai, ma ruẹ nọ ma re siobọno iruemu ethọthọ jọ. (1 Kọr. 6:9-11) Ma yere Jihova gaga nọ o ro fiobọhọ kẹ omai siobọno iruemu iyoma itieye na.

5. Eware ivẹ vẹ u fo nọ ma re ru wọhọ epanọ o rrọ obe Ahwo Rom 12:2?

⁵ Ghele na ma re fi oma hotọ họ. Dede nọ ma siọ izi ilogbo nọ ma jẹ raha taure ma tẹ te họ-ame ba no, o gbẹ gwọlọ nọ ma rẹ daoma whaha oware kpobi nọ u re ru omai zihe kpohọ eware iyoma nọ ma je ru vẹre na. Ẹvẹ ma sai ro ru ere? Pọl ọ ta nọ: “Wha gbẹ kuvẹ re uyero-akpọ nana o kpọ owhai hi, rekọ wha nwene oghẹrẹ ohwo nọ wha rrọ ẹkwoma iroro rai nọ wha re nwene.” (Rom 12:2) Onana u dhesẹ nọ ma re ru eware ivẹ jọ. Orọ ọsosuọ, ma rẹ ‘gbẹ kuvẹ hẹ re akpọ nana ọ kpọ’ omai hayo su omai thọ. Orọ avọ ivẹ, ma re ‘nwene oghẹrẹ ohwo nọ ma rrọ’ ẹkwoma iroro mai nọ ma re nwene.

6. Eme ma wuhrẹ no ẹme Jesu nọ ọ rrọ Matiu 12:43-45 na ze?

⁶ Enwene nọ Pọl ọ ta kpahe na orọnikọ orọ okafe gheghe he. U re kpomahọ kabọ kabọ uzuazọ mai. (Rri ẹkpẹti na “ Kọ Ma Nwene Manikọ Oma Eviẹhọ Ma Ku Họ?”) U fo nọ ma re nwene iroro mai riẹriẹriẹ. O gwọlọ nọ mai kpobi ma rẹ nọ omamai nọ, ‘Kọ okafe ọvo mẹ jọ rrọ Oleleikristi, manikọ mẹ ginọ Oleleikristi evaọ obeva?’ Ohẹriẹ o rrọ eware ivẹ yena. Jesu ọ jọ ẹme nọ ọ ta evaọ  Matiu 12:43-45 fodẹ oware nọ u fo nọ ma re ru. (Sei.) Eme yena i wuhrẹ omai oware jọ nọ u wuzou, oyehọ: Orọnikọ ma re si iroro iyoma no udu mai ọvo ho; ma te si iyoma na no, ma vẹ rọ iroro nọ Ọghẹnẹ ọ jẹrehọ ro nwene ẹta rai.

7. Ẹvẹ ma sai ro nwene oghẹrẹ ohwo nọ ma rrọ evaọ obeva?

⁷ Kọ o ginẹ lọhọ re ma nwene oghẹrẹ ohwo nọ ma rrọ evaọ obeva? Ebaibol na o dhesẹ nọ ma sai ru ere nọ o ta nọ: “Wha gbẹ hai ru ẹzi nọ ọ be kpọ iroro rai kpokpọ, jẹ whẹ uruemu okpokpọ na họ oma, onọ a ma lele oreva Ọghẹnẹ evaọ uvi ẹrẹreokie gbe uyoyou nọ o rẹ hiẹ hẹ.” (Ẹf. 4:23, 24) Ẹhẹ, ma sai nwene oghẹrẹ ohwo nọ ma rrọ evaọ obeva, rekọ onana o nwane lọhọ tere he. Orọnikọ ma rẹ whaha ikpehre iroro jẹ siọ eware iyoma ba eru ọvo ho. O gwọlọ nọ ma re nwene “ẹzi nọ ọ be kpọ iroro” mai. Onana u dhesẹ nọ ma rẹ whaha ikpehre isiuru, ma ve je nwene uruemu mai gbe ẹjiroro nọ ma bi ro ru eware jọ. O gwọlọ nọ ma rẹ daoma ẹsikpobi re ma ru onana.

8-9. Eme ọ via kẹ oniọvo jọ nọ u dhesẹ nọ u wuzou gaga re ma nwene oghẹrẹ ohwo nọ ma rrọ evaọ obeva?

⁸ Joma ta kpahe oriruo oniọvo-ọmọzae jọ nọ ohọre o jẹ hae were evaọ oke nọ u kpemu. Nọ ọ siọ idi ba ẹda thomawa jẹ siọ ohọre ba no, ọ tẹ te họ-ame. Onana u ru nọ ahwo a jẹ rọ ta ẹme ezi Isẹri Jihova evaọ ẹmẹwho nọ ọ jọ na. Nọ ọ họ-ame no, u kri hi, odawọ jọ nọ o rẹro riẹ hẹ u te tei evaọ owọwọ ẹdẹ jọ. Ọzae jọ nọ ọ da idi bẹ no ọ ziọ uwou riẹ re o lele iei họre. Evaọ oke ọsosuọ, oniọvo na ọ jẹ daoma nyẹ omariẹ. Rekọ nọ ọzae na ọ ta eme iyoma kpahe odẹ Jihova, oniọvo na ọ gbẹ sae kpọ ofu riẹ hẹ. O te mu ọzae na họ ekpe. Fikieme o ro ru ere? Dede nọ Ebaibol nọ o wuhrẹ na o fiobọhọ kẹe gba omariẹ, o ri nwene ẹzi nọ ọ be kpọ iroro riẹ hẹ. Koyehọ, o ri nwene oghẹrẹ ohwo nọ ọ rrọ evaọ obeva ha.

⁹ Rekọ udu u whrehe oniọvo nana ha. (Itẹ 24:16) Ekpako ukoko a fiobọhọ kẹe, o te ti nwene ziezi. Nọ oke o be nyaharo na, o te ti te ọkpako evaọ ukoko na. Owọwọ ẹdẹ jọ, ọkpọ oware nọ o via imikpe jọ nọ e vrẹ na o wariẹ via evaọ etegu Ọgwa Uvie rai. Ọzae jọ nọ ọ da idi bẹ no ọ jẹ gwọlọ họre ọkpako ukoko rai jọ. Eme oniọvo na o ru? Ọ rọ unu kpotọ lele ọzae nọ idi i mu no na ta ẹme, ofu riẹ o te ti kpotọ, kẹsena oniọvo na o te su ọzae nọ o bi godie na te uwou. Fikieme oware nọ oniọvo na o ru evaọ onana u ro wo ohẹriẹ no orọ ọsosuọ? O nwene ẹzi nọ ọ be kpọ iroro riẹ no. Oghẹrẹ ohwo nọ ọ rrọ evaọ obeva u nwene no, o te zihe ruọ ohwo omaurokpotọ, nọ ọ gwọlọ udhedhẹ. Yọ onana o wha ujiro se Jihova Ọghẹnẹ.

10. Eme o gwọlọ re ma sai nwene oghẹrẹ ohwo nọ ma rrọ evaọ obeva?

¹⁰ Inwene nana e rẹ romavia asohẹrioke he; yọ e rẹ via ababọ omodawọ họ. O gwọlọ nọ ma rẹ ‘dawo ẹgba mai kpobi,’ evaọ ikpe buobu. (2 Pita 1:5) Orọnikọ thakpinọ ma “rrọ ukoko na” kri no ho. O gwọlọ nọ ma rẹ daoma gaga re ma nwene oghẹrẹ ohwo nọ ma rrọ evaọ obeva. Re ma sai ru onana, u wo eware jọ nọ i wuzou nọ u fo nọ ma re ru. Joma ta kpahe ejọ rai.

11. Ẹvẹ olẹ o re ro fiobọhọ kẹ omai nwene ẹzi nọ ọ be kpọ iroro mai?

¹¹ Olẹ họ oware nọ o mai wuzou. U fo nọ ma rẹ lẹ wọhọ epanọ ọso-ilezi na ọ lẹ, inọ: “Kẹ omẹ udu ofuafo, O Ọghẹnẹ, re who fi ẹzi ọkpokpọ họ omẹ oma, onọ o rrọ gaga.” (Ol. 51:10) Ma re vuhumu nọ u fo re ma nwene, kẹsena ma vẹ lẹ re Jihova o fiobọhọ kẹ omai nwene ẹzi nọ ọ be kpọ iroro mai. Ẹvẹ u ro mu omai ẹro nọ Jihova o ti gine fiobọhọ kẹ omai nwene? Eyaa nọ Jihova ọ ya kẹ ahwo Izrẹl nọ a ghẹmeeyo evaọ oke Izikiẹl o sae kẹ omai uduotahawọ. Jihova ọ ta nọ: “Mẹ te kẹ ae udu ọvo, me ve fi ẹzi ọkpokpọ họ ae oma . . . mẹ vẹ kẹ ae udu nọ o wọhọ uwo, [koyehọ, udu nọ o rẹ jẹ ekpọvio Ọghẹnẹ rehọ].” (Izik. 11:19; ẹme-obotọ) U no Jihova eva ze inọ o re fiobọhọ kẹ ahwo Izrẹl yena nwene, yọ u no rie eva ze inọ o re fiobọhọ kẹ omai re.

12-13. (a) Wọhọ epanọ o rrọ Olezi 119:59, eme u fo nọ ma re roro didi kpahe? (b) Enọ vẹ u fo nọ ma rẹ nọ omamai?

¹² Oware avọ ivẹ nọ u wuzou họ, ma re roro didi. Nọ ma be romatotọ se Ebaibol kẹdẹ kẹdẹ na, o gwọlọ nọ ma re roro didi kpahe oghẹrẹ iroro gbe uruemu nọ u fo nọ ma re nwene. (Se Olezi 119:59; Hib. 4:12; Jem. 1:25) O roja re ma kiẹ udu mai riwi sọ eriariẹ akpọ na i mu omai oma họ ẹdaruọ no. U fo nọ ma re muẹrohọ abọ nọ ma be jọ ru te he, kẹsena ma vẹ daoma gaga re ma nwene.

¹³ Wọhọ oriruo, nọ omara nọ: ‘Kọ me muẹrohọ nọ me wo uruemu ihri-eriọ?’ (1 Pita 2:1) ‘Kọ mẹ be hae wọ oma kpehru fiki oria nọ me no ze, epanọ me kpohọ isukulu te, hayo fiki ugho nọ me wo?’ (Itẹ 16:5) ‘Kọ mẹ be hai rri amọfa inọ a fioka ha fikinọ a wo eware te omẹ hẹ, hayo fikinọ a no orẹwho ọfa ze?’ (Jem. 2:2-4) ‘Kọ eware nọ e rrọ akpọ Setan i bi si omẹ urru?’ (1 Jọn 2:15-17) ‘Kọ ebe gbe ifimu nọ a re jo dhesẹ ọfariẹ-ogbe hayo ozighi e rẹ were omẹ?’ (Ol. 97:10; 101:3; Emọs 5:15) Iyo ra kẹ enọ nana i ti fiobọhọ kẹ owhẹ muẹrohọ eria nọ u fo nọ whọ rẹ jọ nwene. Nọ ma te fi eware nọ e make “dowọ muotọ gaga” no evaọ udu mai kparobọ, ma ti ru eva were Ọsẹ obọ odhiwu mai.​—Ol. 19:14.

14. Fikieme u ro wuzou re ma salọ emamọ egbẹnyusu?

¹⁴ Oware avọ esa nọ u wuzou họ, ma rẹ salọ emamọ egbẹnyusu. Te ma rọwo hayo ma rọwo ho, egbẹnyusu nọ ma wo i re kpomahọ omai gaga. (Itẹ 13:20) Nọ ma tẹ rrọ obọ iruo hayo obọ isukulu, ẹsejọhọ ibuobu ahwo nọ ma rẹ jọ kugbe a re fiobọhọ kẹ omai wo emamọ iroro ho. Rekọ, nọ ma te kpohọ iwuhrẹ ukoko mai, ma rẹ ruẹ ahwo nọ a wo emamọ uruemu nọ ma rẹ sai mu usu kugbe. Etẹe ma rẹ jọ ruẹ ahwo nọ i re fiobọhọ kẹ omai wo ọwhọ nọ ma re ro “dhesẹ uyoyou je ru iruo iwoma.”​—Hib. 10:24, 25, ẹme-obotọ.

15-16. Ẹvẹ Setan ọ be rọ gwọlọ nwene iroro mai?

¹⁵ Kareghẹhọ nọ Setan ọ be gwọlọ oghẹrẹ kpobi nọ o re ro nwene iroro mai. Ọ be rọ oghẹrẹ iwuhrẹ gbe eriariẹ sa-sa rọ daoma raha emamọ iroro nọ Ẹme Ọghẹnẹ o bi fiobọhọ kẹ omai wo.

¹⁶ Setan ọ gbẹ be nọ ọkpọ onọ nọ ọ nọ Ivi evaọ ọgbọ Idẹn, inọ: “Kọ Ọghẹnẹ ọ ginẹ ta nọ . . . ?” (Emu. 3:1) Evaọ akpọ nana nọ Setan o bi su na, ẹsibuobu ma re  yo enọ nọ e rẹ sai fi avro họ omai udu, wọhọ: ‘Kọ Ọghẹnẹ ọ ginẹ ta nọ aye ọvuọvo ohwo o re wo? Kọ Ọghẹnẹ ọ ginẹ ta nọ who ru Kresimesi gbe ehaa ẹdẹ-eyẹ hẹ? Kọ Ọghẹnẹ ọ ginẹ ta nọ who se azẹ fihọ oma ha? Kọ Ọghẹnẹ nọ o wo uyoyou ọ rẹ ginẹ ta nọ who ru oware ovo kugbe ahwo nọ a si no ukoko ho?’

17. Eme ma re ru otẹrọnọ ma wo enọ jọ nọ ma re ruẹ uyo rai hi, kọ eme Ahwo Kọlọsi 2:6, 7 o ta nọ o rẹ sai noi ze?

¹⁷ U fo nọ eware nọ ma rọwo i re mu omai ẹro. Otẹrọnọ ma wo enọ jọ evaọ udu mai kpahe eware nọ ma rọwo, yọ ma re ruẹ uyo rai hi, o sai ru omai wo avro. Avro yena ọ sae rọ ẹmẹrera raha iroro mai no je whrehe ẹrọwọ mai. Nọ o rrọ ere na, eme u fo nọ ma re ru? Ọghẹnẹ ọ jọ Ebaibol na vuẹ omai nọ ma nwene iroro mai, re ma ru omamai wo imuẹro “oware nọ o rrọ oreva Ọghẹnẹ nọ u woma, nọ ọ rẹ jẹrehọ, jẹ rrọ gbagba.” (Rom 12:2) Nọ ma tẹ be hai ru uwuhrẹ omobọ mai kẹse kẹse, eware nọ ma wuhrẹ evaọ Ebaibol na i re mu omai ẹro ziezi. Yọ onana u re ru omai wo imuẹro inọ izi Jihova e rrọ ziezi. Kẹsena ma vẹ te jọ wọhọ ure nọ o ta awọ muotọ ziezi, ma ve “dikihẹ ga ziezi evaọ ẹrọwọ na.”​—Se Ahwo Kọlọsi 2:6, 7.

18. Eme o ti fiobọhọ kẹ omai whaha enua nọ e rrọ akpọ Setan?

¹⁸ Omọfa ọ sai kru ẹrọwọ ra kẹ owhẹ hẹ, whẹ ọvo who re ru onana. Fikiere, gbẹ hae daoma ru ẹzi nọ ọ be kpọ iroro ra kpokpọ ẹsikpobi. Hae lẹ kẹse kẹse; lẹ re Jihova ọ rọ ẹzi ọfuafo riẹ fiobọhọ kẹ owhẹ. Hai roro didi; hae kiẹ iroro gbe uruemu ra riwi ẹsikpobi. Salọ emamọ egbẹnyusu; mu usu kugbe ahwo nọ a re fiobọhọ kẹ owhẹ nwene iroro ra. Who te ru ere, whọ te whaha enua nọ e rrọ akpọ Setan, whọ vẹ jẹ sae “raha iroro ethọthọ gbe oware ukpehru kpobi nọ a ru be rọ wọso eriariẹ Ọghẹnẹ.”​—2 Kọr. 10:5.