Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Oghẹrẹ uzioraha hayo oruthọ vẹ Jesu o wo họ iroro evaọ okenọ ọ kẹ ohrẹ nọ o rrọ Matiu 18:​15-17?

Ọ jẹ ta kpahe oghẹrẹ ebẹbẹ nọ imava e rẹ sai kuhọ kẹ omarai. Rekọ oruthọ na u re te onọ a re ro si ohwo no ukoko nọ a gbẹ rọwo ku ẹme na họ họ. Wọhọ oriruo, o rẹ sae jọ ọtaraha hayo ofruriọ.​—w16.05, ẹwẹ. 7.

Eme whọ rẹ sai ru nọ u re fiobọhọ kẹ owhẹ wo erere ziezi no isase Ebaibol ze?

Whọ rẹ sai ru eware nana: Rovie udu ra kẹ isase na, jẹ kiẹ gwọlọ eware nọ whọ rẹ sai fihọ iruo; nọ omara enọ wọhọ, ‘Ẹvẹ mẹ sae rọ rehọ iẹe fiobọhọ kẹ amọfa?’; jẹ rọ eware nọ e riẹ evaọ ẹvẹrẹ ra ru ekiakiẹ kpahe oware nọ who se na.​—w16.05, ẹwẹ. 24-26.

Kọ o thọ re Oleleikristi o weri, o tẹ make rọnọ ọ rọwo ẹkparomatha na?

Oleleikristi ọ tẹ make rọwo ẹkparomatha na, o rẹ dae ghele nọ ohwo riẹ o te whu. Abraham o weri gaga nọ Sera aye riẹ o whu. (Emu. 23:2) Rekọ nọ oke o be nyaharo na, uweri na u re kpotọ.​—wp16.3, ẹwẹ. 4.

Ono ọzae nọ oware ukere o rrọ abotọ riẹ gbe ezae ezeza nọ i kru ekwakwa nọ a re ro kpe ahwo nọ a fodẹ evaọ eruẹaruẹ Izikiẹl uzou avọ 9 na a dikihẹ kẹ?

A dikihẹ kẹ egbaẹmo obọ odhiwu nọ i wobọ evaọ ọraha Jerusalẹm gbe enọ Ọghẹnẹ ọ te rọ raha akpọ omuomu Setan evaọ Amagẹdọn. Evaọ orugba oke mai na, ọzae nọ o kru oware ukere na o dikihẹ kẹ Jesu Kristi, ọnọ o bi kpoka họ ahwo nọ a te zọ.​—w16.06, ẹwẹ. 16-17.

Eware vẹ e jẹ gwọlọ raha Ebaibol na rekiyọ ọ zọ ghele?

Ebaibol na ọ zọ dede nọ (1) a kaki kere eme riẹ fihọ eware nọ e rẹ raha wọhọ, papirọs gbe oviẹ-arao; (2) isu egọmeti gbe isu ichọche a jẹ gwọlọ raha iẹe; gbe (3) ahwo a jẹ gwọlọ nwene eme riẹ.​—wp16.4, ẹwẹ. 4-7.

Ẹvẹ Oleleikristi ọ sai ro siobọno eware jọ evaọ uzuazọ?

Daoma riẹ eware nọ e ginẹ roja kẹ owhẹ, jẹ whaha ugho nọ whọ rẹ raha fihọ eware nọ i wuzou kẹ owhẹ hẹ. Ma omaa araha nọ ugho ra u re gine te. Siobọno eware nọ whọ gbẹ gwọlọ họ, whọ sae zẹ, rọ kẹ amọfa, hayo ku ai fiẹ. Hwa esa nọ whọ re. Si no oke iruo ra jẹ ma omaa epanọ whọ sai ro wobọ ziezi evaọ iruo odibọgba na.​—w16.07, ẹwẹ. 10.

Eme Ebaibol na o dhesẹ nọ u woma vi igoru hayo isiliva?

Obe Job 28:​12, 15 u dhesẹ nọ areghẹ nọ o no obọ Ọghẹnẹ ze o woma vi igoru hayo isiliva. Nọ whọ be gwọlọ iẹe na, daoma wo omaurokpotọ gbe ẹrọwọ ọgaga.​—w16.08, ẹwẹ. 18-19.

Kọ u fo re oniọvo-ọmọzae ọ nyasiọ etuagba riẹ ba evaọ oke mai na?

Evaọ ekwotọ jọ, u re yoma ha nọ ohwo ọ tẹ nware etuagba riẹ kpotọ, yọ onana u re ru nọ ahwo a gbẹ rọ gaviezọ kẹ ovuẹ Uvie na ha ha. Ghele na, inievo-emezae jọ a sae jiroro nọ a rẹ nware etuagba rai no. (1 Kọr. 8:9) Evaọ ekwotọ efa, etuagba nọ a rẹ nyase ba o rrọ uruemu rai hi yọ a re rri rie nọ u fo kẹ Oleleikristi hi.​—w16.09, ẹwẹ. 21.

Fikieme ma jẹ rọwo ikuigbe Devidi avọ Goliat nọ e rrọ Ebaibol na?

Evaọ oghẹrẹ nọ a dhesẹ Goliat, ọ rehọ ubro irula theri vi ọzae nọ ọ mai theri evaọ oke mai na. Devidi ginọ ohwo dẹẹ, keme ahwo nọ a rẹ kiotọ eware anwae a kiẹ ku utho jọ nọ a kere fihọ nọ uwou Devidi, yọ Jesu ọ ta ẹme fodẹ Devidi re. Ma rẹ sae ruẹ eria sa-sa nọ a fodẹ evaọ ikuigbe na nẹnẹ.​—wp16.5, ẹwẹ. 13.

Oghẹrẹ vẹ eriariẹ, otoriẹ, gbe areghẹ i ro wo ohẹriẹ no ohwohwo?

Ohwo nọ o wo eriariẹ ọ rẹ riẹ evuẹ hayo eware buobu fihọ uzou. Ohwo nọ o wo otoriẹ ọ rẹ sae riẹ epanọ oware jọ u ro wobọ kugbe ofa. Rekọ ohwo nọ o wo areghẹ ọ rẹ sai ku eriariẹ kugbe otoriẹ jẹ rehọ ae ru iruo evaọ emamọ edhere.​—w16.10, ẹwẹ. 18.