JOSẸF OHWO ARIMATIA na o roro nọ ọ te sai wo udu nọ ọ rẹ rọ nya bru ọba Rom hu. Pọntiọs Pailet ọ jọ ohwo ọgeva gaga. O make jọ ere na, o gwọlọ nọ ohwo jọ ọ rẹ nyae yare Pailet re o siobọno ori Jesu, re a ruẹsi ki ei emamọ ukio. Rekọ nọ Josẹf ohwo Arimatia na ọ nyabru Pailet, ọ tẹ ruẹ nọ onya na o bẹ te epanọ o roro ho. Nọ Pailet ọ nọ mi oletu riẹ jọ jẹ ruẹ nọ Jesu o whu no, o te siobọno ori Jesu kẹe. Josẹf o te siawọ kpohọ oria nọ a kare Jesu fihọ, dede nọ uweri o da riẹ oma fia.​—Mak 15:​42-45.

• Ono họ Josẹf ohwo Arimatia na?

• Usu vẹ o wo kugbe Jesu?

• Fikieme u ro fo re who se iku riẹ?

A jọ obe Mak se Josẹf “omọvo Ogbẹgwae na nọ ọ viodẹ.” U muẹro nọ Ogbẹgwae Sanhẹdrin a jọ etenẹ fodẹ na, onana yọ okọto ukpehru ahwo Ju nọ u wuzou ẹkwotọ na soso, te ofẹ isuẹsu gbe egagọ. (Mak 15:​1, 43) Onana u dhesẹ nọ Josẹf ọ jọ omọvo enọ i je su ahwo Ju. Agbẹta nọ ọ sai ro wo uvẹ lele Pailet ta ẹme na! Ọ tẹ jẹ jọ ọdafe re.​—Mat. 27:57.

Ogbẹgwae Sanhẹdrin na u mukpahe Jesu. Ogbẹgwae nana o ma omaa nọ a re ro kpe Jesu no. Dede na Ebaibol na ọ ta nọ Josẹf yọ “emamọ ohwo nọ o kiẹrẹe.” (Luk 23:50) Wo ohẹriẹ no ahwo ogbẹgwae na jọ buobu, ọ jọ ohwo oruọzewọ, o wo emamọ uruemu, yọ ọ jẹ daoma koko izi Ọghẹnẹ. Ọ jẹ “hẹrẹ Uvie Ọghẹnẹ” re, ẹsejọhọ onana u tube ru nọ o ro zihe ruọ olele Jesu. (Mak 15:43; Mat. 27:57) O sae jọnọ eware nọ Jesu o je wuhrẹ kpahe uvi-oziẹ gbe uzẹme na u ru nọ o ro wo isiuru kẹ ovuẹ riẹ.

Obe Jọn 19:38 o ta nọ Josẹf “ọ jọ olele Jesu rekọ . . . o je dhesẹ omariẹ via ha fiki ozọ ahwo Ju.” Fikieme ozọ u je ro mu Josẹf. Ọ riẹ epanọ ahwo Ju a mukpahe Jesu te, yọ a tẹ riẹ nọ ohwo jọ o fi ẹrọwọ họ Jesu, a re le ohwo otiọye no uwou-egagọ na. (Jọn 7:​45-49; 9:22) A te le ohwo no uwou-egagọ evaọ oke yena, a rẹ kẹnoma kẹ ohwo otiọye wọhọ ọnọ a mu imuẹwho. Fikiere ozọ u je mu Josẹf re ọ ta via evaọ ẹgbede nọ ọyomariẹ yọ olele Jesu. Keme onana u re ru nọ a re ro mi iei ọkwa riẹ.

Orọnikọ Josẹf ọvo ọ jọ uyero utioye he. Obe Jọn 12:42 o ta nọ, “ibuobu makọ evaọ udevie isu na a fi ẹrọwọ họ [Jesu], rekọ a jẹ tae via fiki otu Farisi na ha re a siọ ae ba ele no uwou-egagọ na.” Omọfa jọ nọ ọ jọ uyero utionana họ Nikodimọs, ọnọ ọ jọ omọvo ogbẹgwae Sanhẹdrin na re.​—Jọn 3:​1-10; 7:​50-52.

Rekọ Josẹf ọ jọ olele Jesu, dede na ọ sae gbaudu ta via nọ ọyomariẹ yọ olele he. Onana yọ ẹbẹbẹ ologbo keme Jesu ọ ta nọ: “Ohwo kpobi nọ ọ rọwo omẹ evaọ aro ahwo, mẹ te rọwo iẹe re evaọ aro Ọsẹ mẹ nọ ọ rrọ obọ odhiwu. Rekọ ohwo kpobi nọ ọ se omẹ evaọ aro ahwo, mẹ te se iẹe re evaọ aro Ọsẹ mẹ nọ ọ rrọ obọ odhiwu.” (Mat. 10:​32, 33) Orọnikọ Josẹf ọ siọ Jesu hu, ghele na ọ sai wo udu nọ ọ rọ rọwo Jesu evaọ aro ahwo ho. Kọ whẹ omara?

Rekọ u wo oware uwoma jọ nọ Josẹf o ru, Ebaibol na ọ ta nọ ọ rọwo fihọ ẹgwae omuomu nọ ogbẹgwae Sanhẹdrin na o gba ha, inọ a re kpe Jesu no. (Luk  23:51) Ẹsejọhọ wọhọ epanọ ahwo jọ a ta, o wọhọ nọ Josẹf ọ jariẹ hẹ nọ a guẹdhọ Jesu. Oghẹrẹ kpobi nọ o jọ kẹhẹ, oziẹ okienyẹ nọ ogbẹgwae na u bru na o da Josẹf gaga, rekọ u wo oware ovo nọ ọ rẹ sai ru rọ whaha iẹe he!

Evaọ etoke nọ a ro kpe Jesu yọ ozọ u no Josẹf ẹro no, ọ tẹ jẹ gbaemu nọ ọ rẹ tha ilele Jesu uke. A jọ obe Mak 15:43 ta kpahe epanọ o ro ru onana inọ: “Ọ tẹ gbaudu nya bru Pailet ọ tẹ yare nọ a rehọ ori Jesu kẹe.”

O wọhọ nọ iraro Josẹf Jesu o jo sẹwẹ họ. Ọ kake rọ Pailet riẹ nọ Jesu o whu no. Fikiere okenọ Josẹf ọ vuẹ Pailet nọ jọ ọ kẹe uvẹ re ọ wọ ori Jesu, “u mu Pailet ẹro ho sọ Jesu o whu no.” (Mak 15:44) Otẹrọnọ Josẹf ọ jariẹ nọ Jesu ọ jẹ rova evaọ ure-oja na, kọ o sae jọnọ onana u duobọtei je ru nọ ọ rọ gbaemu uwhremu na nọ o re dhesẹ omariẹ via wọhọ olele Jesu? O sae jọ ere. Enẹna Josẹf o kru udu ga no. Ọ te gbẹ jọ olele idhere he.

Uzi ahwo Ju o ta nọ a te bruoziẹ uwhu kpe ohwo nọ a je kpei no, a re ki ei taure ọre o te ti kiediwi. (Izie. 21:​22, 23) Rekọ ahwo Rom a rẹ nyasiọ ohwo otiọye ba re o gbo fihọ ehru ure-oja hayo gbolo iei fihọ oria nọ a re gbolo ahwo otiọye fihọ. Rekọ oware nọ Josẹf o wo họ iroro kẹ Jesu oye he. O wo uki okpokpọ jọ nọ  a bru fihọ utho kẹle oria nọ a jọ kpe Jesu na. Nọ o rọnọ a ri ki ohwo ọvo fihọ uki nana ẹdẹvo ho na, o sae jọnọ u ri kri nọ Josẹf ọ kwa no obọ Arimatia * ziọ Jerusalẹm ho, yọ o je rẹro nọ uki okpokpọ nana a ti ki ọyomariẹ gbe ahwo uviuwou riẹ fihọ. (Luk 23:53; Jọn 19:41) Emamọ oware Josẹf o ru na nọ o ro ki Jesu fihọ uki obọriẹ, yọ onana u ru eruẹaruẹ jọ gba nọ e ta nọ a ti ki Mesaya na “kugbe ahwo nọ a [fe, NW ].”​—Aiz. 53:​5, 8, 9. 

Ebe Usiuwoma ene na e ta nọ okenọ a si ori Jesu no ehru ure-oja na ze, Josẹf ọ tẹ rehọ emamọ ehọ-elọlọhọ vare iẹe je ki iei fihọ uki obọ riẹ. (Mat. 27:​59-61; Mak 15:​46, 47; Luk 23:​53, 55; Jọn 19:​38-40) Omọvo nọ a fodẹ nọ o fiobọhọ kẹ Josẹf họ Nikodimọs, ọnọ ọ rehọ eware nọ i re gbo ore awere ze nọ a ro wholo ori na. Who te roro kpahe epanọ imava nana e viodẹ je fe te, o sae jọnọ ae omarai a wọ ori na ha. Ẹsejọhọ, idibo rai a ta kẹ nọ a wọ ori na je ki ei. Rekọ o tẹ make rọnọ idibo rai e wọ riẹ, okolo oware aimava a ru na ha. Ohwo kpobi nọ o dhobọte ori evaọ oke yena ọ rẹ jọ gbegbe edẹ ihrẹ, yọ ere oware kpobi nọ o dhobọte re. (Ik. 19:11; Hag. 2:13) Onana u dhesẹ nọ aimava na a rẹ hẹrioma no ahwo evaọ oka ehaa Ọnyavrẹ na, jẹ whaha iruẹru ehaa na kpobi. (Ik. 9:6) Ọruẹrẹfihotọ ukio nana nọ Josẹf o ru na o rẹ sai ru nọ ahwo nọ a gbẹ rrọ ogbẹgwae Sanhẹdrin a re ro sei ẹkoko. Ghele na, ọ gba riẹ mu evaọ oke nana inọ o re ki Jesu emamọ ukio, je dhesẹvia nọ ọyomariẹ yọ olele Jesu ghelọ oware nọ u re noi ze kpobi kẹhẹ.

Nọ a ki Jesu no, a gbẹ jọ Ebaibol fodẹ Josẹf ohwo Arimatia na ofa ha. Fikiere, ma sae nọ inọ: ‘Eme ọ via kẹe?’ Uzẹme na họ, ma riẹ hẹ. Rekọ rono eware nọ ma ta kpahe no na ze, u mu omai ẹro gaga nọ o dhesẹvia nọ ọyomariẹ yọ Oleleikristi. Ma sae ta ere keme evaọ etoke nọ ẹbẹbẹ hayo odawọ o jọ otọ, ẹrọwọ gbe udu riẹ u whrehe he rekọ u je dhe ẹgẹga. Onana yọ oka inọ o dhesẹvia uwhremu na nọ ọyomariẹ yọ Oleleikristi.

Ikuigbe nana e rẹ sai ru nọ ma rẹ rọ nọ omamai nọ: Kọ ọkwa, okọ, ekwakwa eyerakpọ, uyoyou kẹ ahwo uviuwou mai, ufuoma mai hayo eware efa itieye ma be rọ karo viukpọ usu mai kugbe Jihova?