ẸHẸ, o jẹ hae jọ ere ẹsejọ. Joma ta kpahe oriruo jọ. Iziewariẹ 24:​14, 15 o ta nọ: “Wha re kienyẹ ọnọ a zizie iruo nọ ọ rọ oyogbere gbe ọbẹwẹ hẹ, makinọ ọ rọ omoni rai hayo omọvo erara enọ e rọ eva otọ nọ o rọ eva ewho rai . . . ogbẹrọ erehe ọ vẹ viẹ kẹ ỌNOWO na, u ve ti zihe ruọ umuemu rọ kẹ owhẹ.”

U wo ẹdhọ jọ kpahe ẹbẹbẹ otiọye nọ ohwo jọ ọ jẹ jọ lẹ nọ a rri rie aro, a kere eme riẹ fihotọ evaọ ikpe-udhusoi avọ ihrẹ taure oke Kristi u te ti te. A ruẹ ẹwẹ-othẹ nọ a kere eme nana fihọ evaọ ẹwho nọ a re se Ashdod. O wọhọ nọ ohwo nọ a fiobọhọ kẹ kere eme nana yọ oruiruo nọ a zizie kpohọ udhu, ọnọ a ta nọ ọ rehọ ekakọ jọ nọ a rẹro rai mi ei ze he. Eme nọ e jọ ẹwẹ-othẹ na họ: “Emedẹ jọ nọ i kpemu nọ odibo ra o koko ekakọ na kpobi họ no, Hoshayahu ọmọzae Shobay ọ tẹ nyaze ti gboro ewu odibo ra. . . . Erivẹ mẹ nọ mai kpobi ma gbe je vu ekakọ na evaọ uvo ogaga ẹdẹ yena a ti se isẹri onana. . . . inọ uzẹme mẹ ta na. Me ru oware ovuọvo thọ họ. . . . Osu ubrotọ na o te rri nọ owha-iruo riẹ o rrọ họ re o ru epanọ odibo ra o re ro wo ewu riẹ zihe, ru ei fiki ohrọ! Whọ fọ vievie he, nọ odibo ra o ri ti wo ewu riẹ zihe he na.”

Ogbiku jọ nọ a re se Simon Schama ọ ta nọ eme olẹ rọkẹ obufihọ nana “i vi eme oruiruo nọ ọ be rọ ọwhọ yare epanọ o re ro wo oware zihe,” eme na “i dhesẹ re inọ oruiruo na ọ riẹ oware jọ kpahe uzi Ọghẹnẹ, maero kọ izi nọ e rrọ obe Iruo-Izerẹ gbe Iziewariẹ nọ i dhesẹ nọ o thọ re a gboja kẹ iyogbere.”