1, 2. Eme o te mae wha okugbe ze evaọ 2018, kọ fikieme? (Rri uwoho nọ o rrọ emuhọ uzoẹme na.)

EVAỌ Asa 31, 2018, nọ ọre o te kiediwi no, Isẹri Jihova wariẹ akpọ na soso họ a ti koko họ eria sa-sa rọkẹ Emu Owọwọ Olori na. Ekareghẹhọ nana yọ obọdẹ ọruẹrẹfihotọ nọ o be hai fiobọhọ kẹ idibo Ọghẹnẹ nọ e rrọ akpọ-soso wo obọdẹ okugbe kukpe kukpe!

² Dai roro epanọ eva e rẹ were Jihova avọ Jesu te nọ a rrọ obọ odhiwu rri ima ahwo buobu evaọ otọakpọ obonẹ nọ a bi kpohọ eria sa-sa kẹ Ekareghẹhọ obọdẹ nana evaọ ẹdẹ yena. Ebaibol na ọ ta nọ “ogbotu obuobu, nọ ohwo ọvo ọ sai kele he, nọ i no erẹwho, erua, oghoghẹrẹ ahwo gbe erọunu kpobi ze” a ti bo nọ: “Obọ Ọghẹnẹ mai nọ ọ keria agbara-uvie na gbe Omogodẹ na esiwo mai o no ze.” (Evia. 7:​9, 10) Ekareghẹhọ nọ ma be hai ru kukpe kukpe na ginọ obọdẹ edhere nọ ma be rọ rehọ orro kẹ Jihova avọ Jesu!

3. Enọ vẹ ma te kiyo rai evaọ uzoẹme nana?

 ³ Enọ jọ e romavia nọ ma te jọ uzoẹme nana kiyo rai. (1) Ẹvẹ mai omomọvo ma sae rọ ruẹrẹ oma kpahe kẹ Ekareghẹhọ na je wo erere noi ze? (2) Idhere vẹ Ekareghẹhọ na o bi ro ru idibo Ọghẹnẹ kpobi jọ okugbe ọvo? (3) Eme mai omomọvo ma rẹ sai ru nọ u re fiobọhọ kẹ omai wo okugbe otiọye? (4) Kọ u ti wo ẹdẹjọ nọ ma ti ru Ekareghẹhọ urere? O tẹ rrọ ere, kọ oke vẹ?

4. Fikieme u ro wuzou re ma kpohọ Ekareghẹhọ na nọ o tẹ lọhọ?

⁴ Roro didi kpahe oware nọ u ro wuzou re who kpohọ Ekareghẹhọ na. Kareghẹhọ nọ ewuhrẹ Ileleikristi nọ ma re kpohọ yọ abọjọ egagọ mai. Jihova avọ Jesu a re muẹrohọ ahwo nọ a be hae daoma re a sai kpohọ Ekareghẹhọ kukpe kukpe, onọ o rrọ omakugbe nọ o mai wuzou kẹ idibo Ọghẹnẹ. Uzẹme na họ, ma rẹ daoma dhesẹ kẹ ae nọ ma gwọlọ jọ omakugbe na, ajokpanọ uyero mai o kuvẹ riẹ vievie he hayo oware ofa jọ o via nọ ma rẹ sai ru oware ovo kpahe he. Ma tẹ be hae rọ uruemu dhesẹ nọ iwuhrẹ enya e rrọ omai oja, u re ru nọ Jihova o gbe ro voro odẹ mai no “obe ekareghẹhọ” riẹ hẹ, “obe uzuazọ” nọ edẹ ahwo nọ a ti wo uzuazọ ebẹdẹ bẹdẹ o rrọ.​—Mal. 3:16; Evia. 20:15.

5. Edẹ jọ taure ẹdẹ Ekareghẹhọ na o te ti te, ẹvẹ ma sae rọ “dawo sọ [ma] gbẹ rrọ ẹrọwọ na”?

⁵ Edẹ jọ taure oke Ekareghẹhọ u te ti te, ma rẹ sae rọ okejọ lẹ je roro kpahe usu mai kugbe Jihova. (Se 2 Ahwo Kọrint 13:5.) Ẹvẹ ma sai ro ru onana? Ma rẹ “hae dawo sọ [ma] gbẹ rrọ ẹrọwọ na.” Ma rẹ sae nọ omamai nọ: ‘Kọ u gine mu omẹ ẹro nọ ukoko ovuọvo nọ Jihova o bi ro ru ẹjiroro riẹ gba mẹ rrọ na? Kọ mẹ be daoma kpobi re mẹ ruẹ nọ mẹ ta usiuwoma na je wuhrẹ ahwo kpahe Uvie Ọghẹnẹ? Kọ uruemu mẹ u bi dhesẹ nọ mẹ ginẹ rọwo nọ edẹ urere na ma rrọ na, gbe inọ esuo Setan o ti kuhọ kẹle? Kọ me gbe fievahọ Jihova avọ Jesu enẹna wọhọ epanọ me fievahọ ae evaọ okenọ mẹ roma mudhe kẹ Jihova obọ?’ (Mat. 24:14; 2 Tim. 3:1; Hib. 3:14) Ma tẹ be hai roro kpahe uyo enọ nana, u ti fiobọhọ kẹ omai riẹ oghẹrẹ ohwo nọ ma ginẹ rrọ.

6. (a) Edhere vẹ ọvo ma sai ro wo uzuazọ? (b) Ẹvẹ ọkpako ukoko jọ ọ rẹ rọ ruẹrẹ oma kpahe kẹ Ekareghẹhọ na kukpe kukpe, kọ ẹvẹ whọ sai ro ru ọkpọ oware ovona?

⁶ Se re who je roro didi kpahe izoẹme nọ e ta kpahe epanọ Ekareghẹhọ na o wuzou te. (Se Jọn 3:16; 17:3.) Edhere ọvuọvo nọ ohwo o re ro wo uzuazọ ebẹdẹ bẹdẹ họ, nọ ọ tẹ “riẹ” Jihova je “fi ẹrọwọ họ” Ọmọvo riẹ, Jesu Kristi. Re whọ sae ruẹrẹ oma kpahe kẹ Ekareghẹhọ na, daoma salọ eware nọ who re ro ru uwuhrẹ omobọ ra nọ i re fiobọhọ kẹ owhẹ si kẹle Jihova avọ Jesu ziezi. Roro kpahe oware nọ oniọvo jọ nọ ọ rrọ ọkpako ukoko kri no ọ be hai ru. Anwọ ikpe buobu ze na, o koko izoẹme Uwou-Eroro jọ họ nọ e ta kpahe Ekareghẹhọ na gbe uyoyou nọ Jihova avọ Jesu a dhesẹ kẹ omai no. Kẹsena eka jọ taure ẹdẹ Ekareghẹhọ na o te ti te, ọ vẹ wariẹ se izoẹme nana je roro kpahe epanọ Ekareghẹhọ na o wuzou te. Ẹsejọ ọ rẹ rehọ uzoẹme ovo hayo ivẹ efa ba enọ o kokohọ na. Ọkpako ukoko nana ọ ruẹ nọ izoẹme na gbe Isase Ebaibol Ekareghẹhọ nọ ọ be hai se, u bi ru ei wuhrẹ eware ekpokpọ kukpe kukpe. Mai wuzou na, ọ ruẹ nọ uyoyou nọ o wo kẹ Jihova gbe Jesu o be ga vi epaọ anwẹdẹ kukpe kukpe. Oghẹrẹ uwuhrẹ omobọ ohwo utiona o rẹ sai ru owhẹ wo uyoyou udidi kẹ Jihova avọ Jesu, je ru nọ who re ro wo erere no Ekareghẹhọ na ze ziezi.

7. (a) Eme Jesu ọ lẹ kẹ evaọ okenọ ọ to Emu Owọwọ Olori na họ? (b) Eme u dhesẹ nọ Jihova ọ kuyo olẹ Jesu na?

⁷ Evaọ aso nọ a rọ to Emu Owọwọ Olori na họ, Jesu ọ lẹ nọ ajọ ilele na kpobi a jọ okugbe ọvo wọhọ epanọ avọ Ọsẹ riẹ a rrọ. (Se Jọn 17:​20, 21.) Jihova ọ kẹ uyo olẹ Ọmọ oyoyou riẹ yena, keme ima ahwo buobu nẹnẹ a rọwo nọ Jihova o vi Jesu ziọ otọakpọ. Wo ohẹriẹ no omakugbe mai ọfa kpobi, Ekareghehọ Uwhu Jesu na o be hae kẹ ahwo imuẹro inọ Isẹri Jihova a ginẹ rrọ okugbe ọvo. Ahwo erẹwho gbe ovioma sa-sa a re kokohọ eria sa-sa wariẹ akpọ na soso họ. Evaọ eria jọ, o rẹ kake via ha inọ ahwo uyẹ sa-sa a kokohọ kugbe kẹ egagọ, yọ ahwo jọ a re rri rie nọ u fo ho. Rekọ Jihova avọ Jesu a rri okugbe otiọye na ghaghae!

8. Eme Jihova ọ ta kẹ Izikiẹl nọ u kiekpahe okugbe?

⁸ Okugbe nọ ma wo evaọ ukoko na u bi gbe omai idibo Jihova unu hu. Jihova ọ ta kpahe onana no vẹre. Roro kpahe ẹme nọ ọ ta kẹ Izikiẹl ọruẹaro na inọ jọ o ku imire ivẹ kugbe, ọjọ “rọ kẹ Juda” odekọ kọ “orọ Josẹf.” (Se Izikiẹl 37:​15-17.) “Enọ Ahwo nọ A s’Ebe” nọ o romavia evaọ Uwou-Eroro Ahrẹ 2016 o ta nọ: “Jihova ọ kẹ Izikiẹl ovuẹ ẹruore jọ nọ u kiekpahe epanọ orẹwho Izrẹl o te rọ wariẹ wo okugbe nọ a te zihe kpohọ Ẹkwotọ Eyaa na no. Ovuẹ yena o tẹ jẹ riobọ kpohọ epanọ idibo Ọghẹnẹ a te rọ jọ okugbe ọvo, onọ u muhọ evaọ edẹ urere na.”

9. Ẹvẹ eruẹaruẹ Izikiẹl i bi ro rugba nọ ma te bi ru Ekareghẹhọ kukpe kukpe?

⁹ No umuo ukpe 1919 vrẹ, Jihova ọ kake rọ ẹmẹrera koko Ileleikristi nọ a rọ ẹzi wholo na họ, enọ i dikihẹ kẹ umure “rọ kẹ Juda.” Kẹsena Ileleikristi nọ i wo ẹruore otọakpọ, nọ i dikihẹ kẹ umure “Josẹf” na a te bi kuomagbe enọ a rọ ẹzi wholo na, jẹ rọ enẹ zihe ruọ “uthuru ọvo.” (Jọn 10:16; Zek. 8:23) Jihova ọ ya eyaa nọ o ti ku imire ivẹ na gbe, e vẹ te jọ ọvo evaọ obọ riẹ. (Izik. 37:19) Enẹna, itu ivẹ na a rrọ okugbe ọvo be gọ Jihova evaọ otọ Ovie ọvo, Jesu Kristi, ọnọ a jọ eruẹaruẹ se “Devidi odibo” Ọghẹnẹ. (Izik. 37:​24, 25) Ma be hae ruẹ okugbe nọ a ta kpahe evaọ obe Izikiẹl na kukpe kukpe, nọ Ileleikristi nọ a rọ ẹzi wholo gbe “igodẹ efa” na a be hai kuomagbe ru Ekareghẹhọ Uwhu Jesu na. Rekọ eme mai omomọvo ọ rẹ sai ru re okugbe ọ gbẹ jọ ukoko na?

10. Ẹvẹ ma sae rọ zọhọ fihọ okugbe nọ ọ rrọ udevie idibo Ọghẹnẹ nẹnẹ?

¹⁰ Omaurokpotọ nọ ma re wo yọ edhere jọ nọ ma sae rọ zọhọ fihọ okugbe nọ ọ rrọ ukoko na. Evaọ okenọ Jesu ọ jọ otọakpọ, ọ hrẹ ilele riẹ nọ jọ a wo omaurokpotọ. (Mat. 23:12) Ma te wo omaurokpotọ, ma te kuvẹ hẹ re ẹzi omorro nọ ọ da akpọ na fia na ọ daruọ omai oma. Ukpoye, omaurokpotọ u ti fiobọhọ kẹ omai yoẹme kẹ inievo nọ e be kobaro evaọ ukoko na, yọ ẹmeoyo otiọna o wuzou gaga kẹ okugbe ukoko na. Mai wuzou, u re ru eva were Jihova nọ ma te wo omaurokpotọ, keme “ọ rẹ wọso enọ i wo omorro, rekọ o re dhesẹ uwowou ulogbo kẹ enọ i wo omaurokpotọ.”​—1 Pita 5:5.

11. Ẹvẹ otofa eware nọ a re ro ru Ekareghẹhọ na nọ ma re roro kpahe u re ro fiobọhọ kẹ omai wo okugbe?

¹¹ Ma tẹ be hai roro didi kpahe oware nọ ebrẹdi nọ e kare ẹvi gbe udi owawae nọ a re ro ru Ekareghẹhọ na i dikihẹ kẹ, yọ edhere ọfa nọ ma sae rọ zọhọ fihọ okugbe nọ ọ rrọ ukoko na. U fo nọ ma re ru onana taure oke na u te ti te, rekọ maero  kọ evaọ owọwọ ẹdẹ Ekareghẹhọ na. (1 Kọr. 11:​23-25) Ebrẹdi na o dikihẹ kẹ ugboma ogbagba Jesu, onọ o ro dheidhe, yọ udi na u dikihẹ kẹ azẹ riẹ nọ o hwẹ fiki mai. Dede na, orọnikọ ma te wo otoriẹ oware nọ enana i dikihẹ kẹ no ọvo yọ u re no ho. Kareghẹhọ nọ idhe ẹtanigbo Jesu na yọ odhesẹvia uyoyou nọ o mae rro nọ Jihova avọ Ọmọ riẹ a wo kẹ omai. Uyoyou nana o wọ Jihova siobọno Ọmọ riẹ, je ru nọ Jesu ọ rọ rehọ unevaze ziọ otọakpọ ti whu kẹ omai. Ma te roro didi kpahe uyoyou nọ a wo kẹ omai, u fo nọ o rẹ wọ omai you rai zihe. Yọ uyoyou nọ mai idibo Ọghẹnẹ kpobi ma wo kẹ Jihova o wọhọ ufi nọ u thuru omai kugbe, onọ u ru omai rrọ okugbe ọvo.

12. Evaọ ọtadhesẹ Jesu ọrọ ovie nọ a reosa riẹ na, ẹvẹ Jesu o ro ru ei vẹ inọ Jihova ọ gwọlọ nọ ma hae rọvrẹ amọfa?

¹² Edhere avesa nọ ma sae rọ zọhọ fihọ okugbe nọ ọ rrọ ukoko na họ, nọ ma tẹ be hae rọvrẹ amọfa nevaze. Ma tẹ be hai ru ere, u re dhesẹ nọ ma wo edẹro kẹ ọruẹrẹfihotọ ẹtanigbo Kristi na, onọ u ru rie lọhọ nọ Jihova ọ be sae rọ rehọ izieraha mai rọvrẹ omai. Roro kpahe ọtadhesẹ Jesu nọ ọ rrọ Matiu 18:​23-34. Nọ omara nọ: ‘Kọ me bi fi oware nọ Jesu o wuhrẹ na hiruo? Kọ mẹ be hai wo ororokẹ gbe odiri kẹ ibe Ileleikristi mẹ? Kọ mẹ be hae rọvrẹ ahwo nọ a ru omẹ thọ lọlọhọ?’ Uzẹme, iruthọ jọ e rẹ ga vi ejọ, yọ o rẹ jọ bẹbẹ gaga kẹ ahwo-akpọ nọ a gba ha re a rehọ oghẹrẹ izieraha jọ rọvrẹ omọfa. Ghele na, ọtadhesẹ nana o ru omai riẹ oware nọ Jihova o rẹro riẹ mi omai. (Se Matiu 18:35.) Jesu ọ ta vevẹ nọ Jihova ọ te rọvrẹ omai hi nọ ma gbẹ rọvrẹ inievo mai nọ i ru omai thọ họ, maero nọ u te wo ẹjiroro nọ u ro fo nọ ma rọvrẹ ae. Onana ginọ oware nọ ma re roro kpahe! U re ru omai wo okugbe ziezi nọ ma tẹ be hae rọvrẹ amọfa wọhọ epanọ Jesu ọ ta.

13. Ẹvẹ udhedhẹ nọ ma re ru kugbe amọfa o rẹ rọ wha okugbe ze?

¹³ Ma tẹ be hae rọvrẹ amọfa, u dhesẹ nọ ma gwọlọ lele amọfa rria dhedhẹ. Kareghẹhọ nọ Pọl ukọ na ọ kẹ Ileleikristi ohrẹ nọ, “[wha] daoma gaga re wha  yọrọ okugbe ọvo nọ ẹzi na ọ be wha ze evaọ udhedhẹ nọ o be gba owhai kugbe na.” (Ẹf. 4:3) Evaọ etoke Ekareghẹhọ na, maero kọ owọwọ ẹdẹ yena, daoma roro didi kpahe oghẹrẹ nọ who bi yerikugbe amọfa. Nọ omara nọ: ‘Kọ uruemu mẹ u bi dhesẹ nọ mẹ yọ ohwo nọ o re fi ẹgo họ eva ha? Kọ a riẹ omẹ wọhọ ohwo nọ o re ru oware kpobi re udhedhẹ gbe okugbe o sae jọ udevie mẹ avọ ibe Ileleikristi mẹ?’ Enana yọ obọdẹ enọ nọ u fo nọ ma re roro kpahe didi evaọ etoke Ekareghẹhọ na.

14. Ẹvẹ ma sai ro dhesẹ nọ ma be “rọ uyoyou thihakọ kẹ ohwohwo”?

¹⁴ Edhere avene nọ ma rẹ rọ zọhọ fihọ okugbe mai họ, nọ ma tẹ be rọ aro kele Jihova Ọghẹnẹ oyoyou na dhesẹ uyoyou kẹ amọfa. (1 Jọn 4:8) Ajọ ma ta kpahe ibe Ileleikristi mai vievie he inọ, “Ebaibol ọ ta nọ ma you ibe Ileleikristi mai, o gbẹ rrọ ere he, orọnikọ a ginẹ were omẹ hẹ”! Iroro itiena e rọwokugbe ohrẹ Pọl ukọ na ha nọ o ta nọ ma “rọ uyoyou thihakọ kẹ ohwohwo.” (Ẹf. 4:2) Muẹrohọ inọ, orọnọ ọ ta ọvo nọ ma “thihakọ kẹ ohwohwo” ho. Ukpoye ọ ta nọ ma “rọ uyoyou” ru onana. Joma rri ẹme na mu ziezi. Oghẹrẹ ahwo sa-sa a rrọ ukoko mai nọ Jihova o si kẹle omariẹ. (Jọn 6:44) Nọ orọnọ Jihova o si rai kẹle oma na, kiyọ a fo ahwo nọ a re you nevaze. Kọ ono họ omai nọ ma rẹ ta nọ ibe Oleleikristi mai jọ o te ohwo nọ ma re dhesẹ uyoyou kẹ hẹ? Ajọ ma rọ uyoyou nọ Jihova ọ ta nọ ma dhesẹ kẹ amọfa gboke vievie he!​—1 Jọn 4:​20, 21.

15. Ẹvẹ ma rọ riẹ nọ ma ti ru Ekareghẹhọ urere ẹdẹjọ?

¹⁵ Ẹdẹjọ, ma ti ru ekareghẹhọ urere. Ẹvẹ ma rọ riẹ? Evaọ ileta ọsosuọ nọ Pọl ukọ na o kere se Ileleikristi obọ Kọrint, ọ ta kẹ Ileleikristi nọ a rọ ẹzi wholo inọ a te bi ru Ekareghẹhọ Uwhu Jesu kukpe kukpe, yọ a “bi whowho uwhu Olori na, bẹsenọ ọ rẹ nyaze.” (1 Kọr. 11:26) Jesu omariẹ ọ ta kpahe okenọ ọyomariẹ ọ te rọ “nyaze” evaọ oke urere na nọ ọ vuẹ ilele riẹ nọ: “Oka Ọmọ ohwo o vẹ te romavia evaọ obọ ehru, erẹwho akpọ na kpobi e vẹ te vọ avọ uweri a vẹ te ruẹ Ọmọ ohwo nọ ọ be nyaze evaọ ẹgho avọ ogaga gbe oruaro ulogbo. [Jesu] o ve ti vi ikọ-odhiwu riẹ avọ edo ọgba ologbo, a ve ti koko eriẹ nọ a salọ na họ no ibienẹ ene akpọ na ze, no oka jọ orọ idhiwu na rite oka ọdekọ.” (Mat. 24:​29-31) ‘Ekokohọ eriẹ nọ a salọ na’ u dhesẹ okenọ Ileleikristi nọ a rọ ẹzi wholo kpobi nọ i gbe kiọkọ otọakpọ a ti ro wo osa obọ odhiwu rai. Onana o te via nọ uye ulogbo na o tẹ nwani muhọ no, rekọ taure ẹmo Amagẹdọn o te ti fi. Kẹsena Ileleikristi idu udhuhrẹ gbe ene (144,000) na kpobi a ve ti kuobọgbe Jesu fi ivie akpọ na kparobọ. (Evia. 17:​12-14) Ekareghẹhọ urere nọ ma ti ru taure Jesu o te ti koko Ileleikristi nọ a rọ ẹzi wholo na họ kpobọ odhiwu ọ te jọ ọrọ urere, keme oke yena yọ Jesu ọ “nyaze” no.

16. Fikieme whọ rọ gbaemu nọ who ti kpohọ Ekareghẹhọ na ukpe nana?

¹⁶ Jọ o jọ ọtamuo mai inọ ma re kpohọ Ekareghẹhọ nọ ma ti ru evaọ Asa 31, 2018 na, re ma sai wo erere noi ze. Joma lẹ se Jihova re o fiobọhọ kẹ omai zọhọ fihọ okugbe nọ ọ rrọ udevie idibo riẹ. (Se Olezi 133:1.) Kareghẹhọ nọ ẹdẹjọ ọ be tha nọ ma ti ru Ekareghẹhọ urere. Bọo oke yena, ajọ ma daoma mai kpobi re ma hai kpohọ Ekareghẹhọ na kukpe kukpe, je dhesẹvia nọ ma rri emamọ okugbe nọ onana u bi ru omai wo ghaghae.