OBE Emuhọ 22:6 o ta nọ okenọ Abraham ọ jẹ gwọlọ nyai dheidhe kẹ Ọghẹnẹ evaọ ugbothabọ jọ, ọ “rehọ ire idhe-emahọ na, ọ tẹ rehọ ae wha ọmọzae riẹ Aiziki; ọ tẹ rehọ erae na họ obọ riẹ gbe aghae. Ae imava a tẹ gbẹ nya.”

Ikereakere na e ta ẹme ọvo ho kpahe oghẹrẹ nọ a jẹ hai ro koko erae họ evaọ oke anwae. Ọgba-uwuhrẹ eme Ebaibol jọ ọ ta kpahe Emuhọ 22:6 na inọ, o rrọ bẹbẹ re erae nọ e be ware nọ ohwo ọ wha lele oma “e gbẹ hae ware evaọ etoke onya ugbothabọ” nọ Abraham avọ Aiziki a nya na. Fikiere, o sae jọnọ erae nọ a fodẹ evaọ oria ikere nana yọ oware nọ a re ro koko erae họ.

Yọ amọfa a ta nọ re ohwo ọ sai koko erae họ da evaọ oke anwae o jọ okolo oware he. O te mae lọhọ kẹ ahwo oke yena re a wọ iwowo erae evaọ eyerae erivẹ rai, viukpenọ ae ọvo a re koko erae obọrai họ. Fikiere, egba-uwuhrẹ buobu a rọwo nọ oware nọ Abraham ọ wọ na yọ okwakwa, ẹsejọhọ omothẹ nọ a rọ ogbregba ru obọ fihọ, yọ iwowo-erae nọ a wọ no eyerae aso nọ ọ vrẹ ze e jariẹ eva. (Aiz. 30:14) Iwowo-erae nọ a rọ oghẹrẹ utiona wha, e rẹ gbẹ sae ware nọ a tẹ be wha ae no oria ruọ oria evaọ oghẹrẹ nọ a sae rọ rehọ ai koko erae họ nọ a te fi evẹvẹ-ire họ ae.