Kọ Whọ Sai Fiobọhọ Evaọ Ukoko Ra?
TAURE Jesu o te ti zihe kpobọ odhiwu, ọ ta kẹ ilele riẹ nọ: “Wha . . . ti se isẹri kpahe omẹ . . . rite oria nọ o mai thabọ evaọ otọakpọ na.” (Iruẹru Ikọ 1:8) Ẹvẹ a te sae rọ ta usiuwoma na evaọ akpọ na soso?
Prọfẹsọ jọ evaọ Oxford University nọ a re se Martin Goodman ọ ta nọ, “iruo usiuwoma ota na i ru Ileleikristi wo ohẹriẹ no egagọ efa kpobi, makọ egagọ ahwo Ju dede evaọ oke esuo Rom.” Jesu ọ jẹ ta usiuwoma no oria ruọ oria. Ileleikristi uzẹme a rẹ rọ aro kele oriruo Jesu jẹ ta “usi uwoma Uvie Ọghẹnẹ” evaọ oria kpobi. U fo nọ a rẹ gwọlọ ahwo nọ a gwọlọ riẹ uzẹme na. (Luk 4:43) Oye o soriẹ nọ “ikọ” e rọ jariẹ evaọ ikpe-udhusoi ọsosuọ. Otofa “ikọ” họ, ahwo nọ a vi uwou nyai ru oware. (Mak 3:14) Jesu o jie uzi kẹ ilele riẹ nọ: “Wha nyai wuhrẹ ahwo erẹwho kpobi re a zihe ruọ ilele.”—Matiu 28:18-20.
Ikọ 12 Jesu e gbẹ rrọ otọakpọ na ha, rekọ idibo Jihova buobu a be rọ aro kele oriruo rai ta usiuwoma na. Nọ a tẹ ta kẹ idibo Jihova nọ a kpohọ oria nọ ẹgwọlọ ọ mae rrọ, a rẹ fialoma via wọhọ Aizaya nọ ọ ta nọ: “Mẹ na! Vi omẹ.” (Aizaya 6:8) Ejọ rai jọ nọ e nwrotọ no Isukulu Giliad e kwa kpohọ erẹwho nọ i thabọ gaga no. Efa e kwa kpohọ ekwotọ efa evaọ orẹwho obọrai. Yọ ibuobu a bi wuhrẹ ẹvẹrẹ ọfa re a sai fiobọhọ kẹ ukoko hayo utu jọ. Dede nọ o nwane lọhọ kẹ ae he, inievo nana a be rọ unevaze fialoma via kẹ iruo nana ro dhesẹ nọ a you Jihova gbe amọfa. Fikiere a romatotọ ma omaa kpahe epanọ a sae rọ rehọ oke, ẹgba, gbe ugho rai ro fiobọhọ evaọ eria nọ ẹgwọlọ ọ mae rrọ. (Luk 14:) Iruo nọ inievo nana a bi ru e rrọ ghaghae gaga. 28-30
Orọnikọ mai kpobi ma rẹ sae kwa kpohọ oria nọ ẹgwọlọ ọ mae rrọ hayo wuhrẹ ẹvẹrẹ ọkpokpọ họ. Rekọ mai kpobi ma rẹ sae jọ imishọnare evaọ ukoko mai.
JỌ IMISHỌNARE EVAỌ UKOKO RA
Fiobọhọ kẹ inievo ra
Evaọ ikpe-udhusoi ọsosuọ, Ileleikristi buobu a jẹ rria orẹwho obọrai, yọ a jọ imishọnare he, ghele na a jẹ rọ ọwhọ ta usiuwoma na. Pọl ọ ta kẹ Timoti nọ: “Ru iruo ọtausiuwoma, ru iruo odibọgba ra gba ziezi.” (2 Timoti 4:5) Eme nana i kiekpahe Ileleikristi ọsosuọ na, yọ i kiekpahe omai nẹnẹ re. O gwọlọ nọ Ileleikristi kpobi a re yoẹme kẹ ujaje Jesu na re a whowho emamọ usi Uvie na je ru ahwo zihe ruọ ilele Jesu. Yọ makọ evaọ ukoko mai dede, idhere buobu e riẹ nọ ma sae rọ jọ wọhọ imishọnare.
Wọhọ oriruo, nọ imishọnare e tẹ kwa kpohọ orẹwho ofa, eware i re wo ohẹriẹ kẹ ae gaga, fikiere o gwọlọ nọ a re ru inwene re a sae rria obonọ a kwa nya na. O tẹ make rọnọ ma sae kwa kpohọ oria nọ ẹgwọlọ ọ mae rrọ họ, kọ ma sae rọ idhere ekpokpọ ta usiuwoma na kẹ ahwo? Wọhọ oriruo, ukpe 1940 a rọ kake tuduhọ inievo mai awọ nọ a hae ta usiuwoma evaọ iyẹrẹ, ẹsiẹvo ẹkpoka. Kọ whọ ta usiuwoma iyẹrẹ no ẹdẹjọ? Kọ whọ rehọ oware nọ a re fi ebe họ ghelie no oria ruọ oria ta usiuwoma no? Ẹme na họ, kọ u no owhẹ eva ze inọ whọ rẹ rehọ idhere ekpokpọ ta usiuwoma na?
Ẹkwoma udu nọ whọ rẹ ta họ ae awọ re a “ru iruo ọtausiuwoma”
Who te wo emamọ eriwo, whọ te rọ ajọwha ta usiuwoma na. Inievo nọ e kwa kpohọ oria nọ ẹgwọlọ ọ mae rrọ hayo enọ i wuhrẹ ẹvẹrẹ ọfa, a re wo onaa ziezi, yọ a rẹ jọ obufihọ ulogbo kẹ ukoko nọ a rrọ. Wọhọ oriruo, ae a rẹ kobaro evaọ iruo usiuwoma ota na. Ẹsibuobu imishọnare e rẹ kobaro evaọ ukoko nọ a rrọ, bẹsenọ inievo emezae nọ e rrọ ukoko nọ a kpohọ na i re te ziezi re a sae rẹrote ewha-iruo. Otẹrọnọ whẹ yọ oniọvo-ọmọzae nọ ọ họ-ame no, kọ whọ be “daoma re [who] te” kẹ ewha-iruo, wọhọ odibo oruiruo hayo ọkpako evaọ ukoko ra?—1 Timoti 3:1.
JỌ “OMOSASỌ ULOGBO” KẸ AMỌFA
Ẹkwoma oware jọ nọ who re lele ai ru
Ma rẹ sae rọ idhere efa fiobọhọ evaọ ukoko nọ ma rrọ. Mai kpobi, te emaha te ekpako evaọ ukoko na, ma sae jọ “omosasọ ulogbo” kẹ ibe ileleikristi mai.—Ahwo Kọlọsi 4:11.
Re ma sai fiobọhọ kẹ inievo mai evaọ ukoko na, o gwọlọ nọ ma rẹ riẹ ae ziezi. Ebaibol na ọ tuduhọ omai awọ nọ ma hai “roro kpahe ohwohwo” nọ ma te kuomagbe. (Ahwo Hibru 10:24) Onana u dhesẹ hẹ inọ ma rẹ kiotọ inievo mai jẹ gwọlọ riẹ oware kpobi nọ o be via kẹ ae evaọ uzuazọ. Ukpoye, u dhesẹ nọ ma rẹ daoma wo otoriẹ inievo mai jẹ riẹ ẹgwọlọ rai. O sae jọnọ a gwọlọ nọ ma fiobọhọ kẹ ae ru oware jọ, tuduhọ ae awọ, hayo rehọ Ebaibol na bọ ae ga. Uzẹme o rrọ inọ, evaọ iyero jọ ekpako gbe idibo iruiruo ọvo a rẹ sai fiobọhọ kẹ ae. (Ahwo Galesha 6:1) Rekọ mai kpobi ma rẹ sai fiobọhọ kẹ inievo nọ e kpako no hayo iviuwou nọ e be rẹriẹ ovao dhe ebẹbẹ evaọ ukoko na.
Ẹkwoma ọbọga nọ whọ rẹ kẹ enọ e be rẹriẹ ovao dhe ebẹbẹ evaọ uzuazọ
Oniọvo-ọmọzae jọ nọ a re se Salvatore o wo ọkpọ obufihọ utioye na. Fiki ẹbẹbẹ ugho nọ o wo evaọ okejọ, ọ tẹ zẹ eware okọ riẹ no, uwou riẹ, gbe eware buobu nọ a wo evaọ uwou rai. Ọ jẹ ruawa kpahe ahwo uviuwou riẹ gaga. Uviuwou ofa jọ evaọ ukoko na u te muẹrohọ nọ oniọvo na ọ gwọlọ obufihọ. Fikiere, a tẹ kẹ Salvatore ugho jọ je fiobọhọ kẹe avọ aye riẹ wo iruo. Yọ ẹsibuobu uviuwou na o jẹ hai weze bru ai evaọ owọwọ, gaviezọ kẹ ae, jẹ tuduhọ ae awọ. Iviuwou ivẹ na i te zihe ruọ egbẹnyusu ekpekpe. Enẹna, nọ iviuwou ivẹ na a te roro kpemu, eva ọvo e rẹ were ae inọ a raha oke kugbe evaọ oke obẹbẹ yena.
Ileleikristi uzẹme a rẹ rọ ajọwha vuẹ amọfa kpahe eware nọ a rọwo. Ma rẹ rọ aro kele Jesu ta kẹ ohwo kpobi kpahe eyaa Ọghẹnẹ nọ i ti rugba evaọ obaro. O tẹ make rọnọ ma rẹ sae kwa kpohọ oria ofa hayo ma sae kwa ha, mai kpobi ma sai ru utho ẹgba mai re ma fiobọhọ kẹ inievo nọ e rrọ ukoko mai. (Ahwo Galesha 6:10) Nọ ma te fiobọhọ kẹ amọfa, eva e te were omai yọ ma te “ruabọhọ ru iruo iwoma kpobi.”—Ahwo Kọlọsi 1:10; Iruẹru Ikọ 20:35.