USIUWOMA ota mai u wuzou jẹ rrọ ghaghae. Rekọ orọnikọ ahwo kpobi nọ ma be ta usiuwoma kẹ a riẹ onana ha. O tẹ make rọnọ ahwo jọ a wo isiuru kpahe oware nọ Ebaibol na ọ ta, a nwane riẹ epanọ u wuzou te he re ma wuhrẹ Ebaibol kugbe ai.

Jọ ma ta kpahe oriruo Gavin. Ọ jẹ hai kpohọ ewuhrẹ, rekọ ọ gwọlọ nọ a wuhrẹ Ebaibol kugbei hi. Gavin ọ ta nọ ọ riẹ Ebaibol na tere he, yọ ọ gwọlọ nọ amọfa a riẹ onana ha. Ozọ u je mu ei re inọ a te vuẹe nọ o kuomagbe egagọ na, yọ ọ gwọlọ nọ ohwo ọvo ọ viẹe họ họ. Ẹvẹ who roro? Kọ o lọhọ re a fiobọhọ kẹ Gavin? Roro kpahe epanọ iwuhrẹ Ebaibol i re ro nwene uzuazọ ohwo wowoma. Jihova ọ ta kẹ ahwo Izrẹl nọ: “[Ẹme] unu mẹ [ọ te] wọhọ ewhrọwhrọ, wọhọ oso owowolẹ nọ ọ rẹ rọ ku ẹbe ọboba.” (Iziewariẹ 31:19, 30; 32:2) Joma wuhrẹ eware jọ kpahe ewhrọwhrọ jẹ rehọ iẹe wawọ usiuwoma ota mai, re ma sai wo onaa nọ ma re ro fiobọhọ kẹ “oghẹrẹ ahwo kpobi.”—1 Timoti 2:3, 4.

Ewhrọwhrọ e rrọ wowolẹ. Igrigri nọ i re kie eye e rẹ rọ ẹmẹrera zihe ruọ ewhrọwhrọ. Ẹvẹ ẹme Jihova ọ rọ jọ “wọhọ ewhrọwhrọ”? Ọ jẹ hae rọ unu uwowolẹ avọ ọdawẹ ta ẹme kẹ idibo riẹ. U re dhesẹ nọ ma be rọ aro kele iei nọ ma gbe bi wo orivo kẹ amọfa ha fiki oware nọ a rọwo. Ma rẹ tuduhọ ae awọ re a jiroro kẹ omarai. Ma tẹ be hai dhesẹ oghẹrẹ ọdawẹ otiọna kẹ ahwo, a te hae gwọlọ jẹ oware nọ ma ta rehọ, onọ o te lẹliẹ emamọ iyẹrẹ no usiuwoma ota mai ze.

Ewhrọwhrọ e rẹ kẹ erri. Ma tẹ be hai roro kpahe idhere sa-sa nọ ma re ro fiobọhọ kẹ amọfa wuhrẹ uzẹme na, usiuwoma ota mai o te kẹ ae erri. Oniọvo-ọmọzae nọ a re se Chris nọ ọ kake vuẹ Gavin kpahe uwuhrẹ Ebaibol, ọ jẹ gbae họ họ. Ukpoye, ọ dawo idhere sa-sa re Gavin ọ ruẹsi wo isiuru kẹ uwuhrẹ Ebaibol na. Chris ọ vuẹ Gavin nọ u wo obọdẹ ovuẹ jọ nọ o dhẹ Ebaibol na duwu, gbe inọ o te wuhrẹ kpahe ovuẹ nana u ti ru ei wo otoriẹ eware nọ ma be ta kpahe evaọ obọ ewuhrẹ ukoko na ziezi. Kẹsena Chris ọ tẹ ta kẹ Gavin nọ eruẹaruẹ Ebaibol e kẹ ọyomariẹ imuẹro inọ eme nọ e rrọ Ebaibol na kpobi uzẹme. Ukuhọ riẹ, aimava a tẹ ta kpahe epanọ eruẹaruẹ Ebaibol sa-sa i ro rugba. Onana u ru eva were Gavin, uwhremu na ọ tẹ jẹ uwuhrẹ Ebaibol rehọ.

Ewhrọwhrọ i wuzou kẹ uzuazọ. Evaọ oke ivo egaga, emerae buobu e rẹ ruemu taure oso o te ti kie ku otọ evaọ Izrẹl. Fikiere, nọ ewhrọwhrọ i gbe kie ku otọ oke nana ha, ekakọ e rẹ ya fia je whu no. Jihova ọ ta nọ oke mai na o te jọ wọhọ ezi ivo egaga, koyehọ urru “ẹme ỌNOWO na” u ti kpe ahwo. (Emọs 8:11) Jihova ọ ta nọ, Ileleikristi nọ a rehọ ẹzi wholo na a te “wọhọ ewhrọwhrọ nọ i no obọ ỌNOWO na ze” evaọ okenọ a te ta usiuwoma Uvie na avọ “igodẹ efa” na nọ e te thae uke. (Maeka 5:7; Jọn 10:16) Ovuẹ nọ ma bi whowho na yọ edhere jọ nọ Jihova ọ te rọ rehọ uzuazọ kẹ ahwo nọ ohọo uzẹme na u bi kpe. Kọ ma rri ovuẹ nana ghaghae?

Ewhrọwhrọ yọ oghale nọ u bi no obọ Jihova ze. (Iziewariẹ 33:13) Usiuwoma ota mai o sae jọ oghale hayo okẹ rọkẹ enọ e jẹ riẹe rehọ. Uwuhrẹ Ebaibol o jọ oghale kẹ Gavin keme u fiobọhọ kẹe ruẹ iyo kẹ enọ riẹ kpobi. Ọ nyaharo ziezi evaọ uwuhrẹ riẹ jẹ họ-ame, yọ enẹna tei te aye riẹ Joyce, a be reawere usiuwoma ota na.

Ma te rri usiuwoma ota mai wọhọ ewhrọwhrọ, u re je fiobọhọ kẹ omai ruẹ nọ omodawo mai omomọvo evaọ iruo na o rrọ ghaghae. Ẹvẹ o rọ rrọ ere? Ubi owhrọwhrọ o sai ru emamọ oware ovo ho, rekọ nọ ewhrọwhrọ buobu i te kie ku otọ, i re ru otọ vo. Epọvo na re, ma rẹ sai rri nọ oma nọ mai omomọvo ọ be dawo evaọ iruo Uvie na u tulo ho. Rekọ fiki omodawọ idibo Jihova buobu evaọ iruo Uvie na, ma be sae ta usiuwoma “kẹ erẹwho na kpobi.” (Matiu 24:14) Kọ usiuwoma ota mai o te jọ oghale nọ u bi no obọ Jihova ze se amọfa? Ẹhẹ, ovuẹ mai o te jọ wọhọ ewhrọwhrọ nọ e rrọ wowolẹ, nọ e rẹ kẹ erri, nọ i re ru ohwo wo uzuazọ!