Kọ whọ romatotọ se uvitha Uwou-Eroro nọ i kpozi kẹle na? Dai rri sọ whọ sae kẹ iyo enọ nọ e rrọ obotọ na:

Eware ene vẹ ma rẹ sai ru nọ u re fiobọhọ kẹ omai so ile ziezi?

Ma re dikihẹ kpomavi je kru obe ole mai kpehru ziezi. Ma rẹ daoma sẹwẹ totọ ziezi. Ma re rovie unu mai ziezi, jẹ so ole na do via.​—w17.11, ẹwẹ. 5.

Eme ọ were omai kpahe eria nọ ikpewho adhẹzọ na e jọ evaọ Izrẹl gbe oghẹrẹ nọ a ru idhere rai?

Ikpewho adhẹzọ ezeza e jọ eria sa-sa evaọ Izrẹl, yọ a nabi ru idhere rai wowoma. Fikiere ohwo ọ rẹ sae dhẹ kpohọ ai lọlọhọ.​—w17.11, ẹwẹ. 14.

Fikieme okẹ ẹtanigbo nọ Ọghẹnẹ ọ kẹ omai ẹkwoma Jesu na o rọ rrọ okẹ nọ o mai woma kpaobọ?

O rrọ isiuru mai re ma rria bẹdẹ bẹdẹ, je no igbo uzioraha gbe uwhu. Okẹ ẹtanigbo na u ru onana lọhọ. Fikinọ Ọghẹnẹ o you omai gaga, o siobọno Ọmọ riẹ Jesu re o whu kẹ omai nọ ma gbẹ jọ erahaizi.​—wp17.6, ẹwẹ. 6-7.

Ẹvẹ Olezi 118:22 o rọ riobọ kpohọ ẹkparomatha Jesu?

A siọ Jesu nọ ọ jọ Mesaya na je kpei. Re ọ sae jọ “utho ubienẹ,” o gwọlọ nọ ọ rẹ kparoma no uwhu ze.​—w17.12, ẹwẹ. 9-10.

Kọ uyẹ enwara ọvo Mesaya na o no ze?

Enwara e jọ usu ahwo nọ Jesu o no uyẹ rai ze, rekọ orọnọ ẹsikpobi hi. Devidi ọ jọ ọnwara Jẹsi hi; rekọ Mesaya na o no uyẹ riẹ ze.​—w17.12, ẹwẹ. 14-15.

Didi ehrẹ kpahe usiwo-imu whọ rẹ ruẹ evaọ Ebaibol na?

Uzi nọ Ọghẹnẹ ọ kẹ emọ Izrẹl o ta nọ a re si ahwo nọ a be mọ oghẹrẹ eyao jọ no udevie ahwo. Ohwo nọ o dhobọ te ohwo nọ o whu no ọ rẹ wozẹ abọ riẹ. Uzi na o ta re nọ a rẹ tọ isọ họ otọ. A rẹ yawo ọmọ evaọ ẹdẹ avọ eree, onana u kiehọ keme oke nana ọ rẹ nwani hwẹ azẹ tere he.​—wp18.1, ẹwẹ. 7.

Fikieme o gbẹ rọ thọ họ nọ Oleleikristi o te you omariẹ te umuo?

O gwọlọ nọ ma re you erivẹ mai epanọ ma you omamai. (Mak 12:31) Ezae a re “you eyae rai wọhọ ugboma obọrai.” (Ẹf. 5:28) Rekọ u fo ho re ma you omobọ mai vrẹta.​—w18.01, ẹwẹ. 23.

Eware jọ vẹ ma rẹ sai ru re ma wo ẹnyaharo evaọ usu mai kugbe Ọghẹnẹ?

Ma re wuhrẹ Ebaibol na, roro kpahe eware nọ ma wuhrẹ je fi ai hiruo evaọ uzuazọ. Ma rẹ kuvẹ re ẹzi ọfuafo na ọ kpọ omai, jẹ jẹ obufihọ amọfa rehọ.​—w18.02, ẹwẹ. 26.

Fikieme isi nọ a rẹ rọ gbẹva gbe ẹva-ọgba e gbẹ sai ro fiobọhọ kẹ omai riẹ kpahe obaro ho?

U wo ẹjiroro sa-sa nọ e gbẹ sai ro fiobọhọ kẹ omai hi. Rekọ onọ o mai wuzou họ, Ebaibol na o mukpahe iruemu itieye.​—wp18.2, ẹwẹ. 4-5.

Ẹvẹ u fo nọ ma re rri rie nọ ohwo o te zizie omai kpohọ uwou riẹ kẹ emuọriọ?

Ma tẹ rọwo kẹ ohwo nọ o zizie omai kpohọ uwou riẹ inọ ma te nya no, ajọ ma daoma ru ẹme mai gba. (Ol. 15:4) Ma du mu va uzizie na ha nọ ma tẹ rọwo no. O sae jọnọ ohwo na ọ ruẹ uye there emu na kpahe no.​—w18.03, ẹwẹ. 18.

Eme ekpako ukoko gbe idibo iruiruo a rẹ sai wuhrẹ mi Timoti?

Timoti ọ jẹ hae daezọ amọfa ziezi, yọ ọ rọ iruẹru egagọ Ọghẹnẹ karo. O ru iruo gaga evaọ egagọ Jihova, yọ o fi eware nọ o je wuhrẹ hiruo. Ọ jẹ hai wuhrẹ omariẹ noke toke yọ ọ rẹroso ẹzi ọfuafo Ọghẹnẹ. Ekpako ukoko gbe amọfa a rẹ sae rọ aro kele emamọ oriruo riẹ.​—w18.04, ẹwẹ. 13-14.