Ọmọtẹ jọ nọ a re se Rosie ọ ta nọ: “Ẹsikpobi mẹ rẹ ruawa kpahe eware nọ e re via ha, yọ me re roro nọ e te jọ yoyoma.” Kọ eria Ebaibol vẹ i fiobọhọ kẹe? Ọjọ họ Matiu 6:​34, nọ o ta nọ: “Wha ruawa odẹnotha vievie he, keme odẹnotha o ti wo ẹkẹ ebẹbẹ riẹ. Ebẹbẹ ẹdẹ kpobi i te kẹ ẹdẹ yena.” Rosie ọ ta nọ eme Jesu yena i fiobọhọ kẹe nọ ọ gbẹ be rọ ruawa kpahe eware nọ e re te via ha. O fibae nọ, “Ebẹbẹ nọ mẹ be rẹriẹ ovao dhe i re buobu, mẹ tẹ be ruawa kpahe eware nọ e rẹ sae via gbe enọ e te tubẹ via ha yọ me bi fibae.”

Ọmọtẹ ọfa jọ nọ a re se Yasmine ọ jẹ ruawa gaga re. Ọ ta nọ: “Enwenọ ikẹdẹ kẹdẹ mẹ jẹ hae viẹ, yọ mẹ rẹ sae wezẹ evaọ aso ho. Iroro egaga i je ti kpe omẹ fihọ akpọ no.” Oria Ebaibol vẹ o fiobọhọ kẹe? Obe 1 Pita 5:7 nọ o ta nọ: ‘Gbolo awaọruọ ra kpobi kẹ Ọghẹnẹ, keme ọ be daezọ ra.’ Yasmine ọ ta nọ: “Nọ oke o be nyaharo na, mẹ ruabọhọ olẹ yọ Jihova o yo olẹ mẹ. O tẹ wọhọ ẹsenọ a wọ owha ogbẹgbẹdẹ no omẹ uzou. No oke te oke mẹ rẹ gbẹ ruawa ẹsejọ, rekọ mẹ riẹ oware nọ me re ru nọ iroro yena e tẹ be gwọlọ ziọ omẹ udu.”

Ọmọtẹ jọ nọ a re se Isabella ọ ta nọ: “Me roro nọ uruemu meti meti o rrọ omẹ azẹ keme ọsẹ mẹ o wo  uruemu nana re. Mẹ rẹ nyasiọ eware nọ u fo nọ me re ru ba, mẹ vẹ nyai rri etẹlẹvishọno. Uruemu nana o rẹ wha ẹbẹbẹ se ohwo, keme o rẹ lẹliẹ ohwo ruawa kpahe epanọ o ti ro ru eware kpobi nọ ọ nyaseba. Yọ fikinọ ọ te rọ okpakpa ru ai, i ti woma tere he.” Ohrẹ Ebaibol nọ o rrọ 2 Timoti 2:15 u fiobọhọ kẹe. Etẹe ọ ta nọ: “Dawo ẹgba ra kpobi re whọ jọ ọnọ Ọghẹnẹ ọ rẹ jẹrehọ, oruiruo nọ o wo oware ovo nọ o rẹ lẹliẹ oma vuọ iẹe he.” Isabella ọ ta nọ: “Mẹ gwọlọ jọ oruiruo nọ ọ rẹ wha omovuọ Jihova ha, fikinọ me bi me bi ru eware evaọ ẹruoke he.” Isabella ọ daoma nwene gaga no.

Ọmọtẹ ọfa jọ nọ a re se Kelsey ọ ta nọ: “Iruo e rẹ jọ otọ kẹ omẹ, rekọ mẹ rẹ nyasiọ iruo na ba bẹsenọ oke o rẹ va omẹ abọ no. U kuhọ riẹ mẹ gbẹ sae wezẹ hẹ, mẹ vẹ be ruawa, yọ ẹsejọ u re fou omẹ họ oviẹ. Uruemu nana u je ti fi omẹ họ uye ulogbo.” Obe Itẹ 13:16 u fiobọhọ kẹ Kelsey, oria na o ta nọ: “Ohwo owareghẹ ọ rẹ rehọ areghẹ ru koware koware, rekọ ohwo ogheghẹ ọ rẹ rehọ ugheghẹ riẹ vioma.” Nọ o roro didi kpahe oria ikere yena no, ọ tẹ ta nọ etẹe na o wuhrẹ i rie oware jọ inọ: “U fo re ohwo o wo osegboja jẹ ma omaa kpahe obaro. Enẹna me wo obe nọ me re kere omaa iruo mẹ họ nọ o rrọ emẹjẹ mẹ, onana u ru nọ me bi ro ruiruo mẹ evaọ ẹruoke, mẹ gbẹ be hẹrẹ bẹsenọ oke o rẹ va omẹ abọ no ho.”

Aye jọ nọ a re se Kirsten ọ ta nọ: “Ọzae mẹ ọ dhẹ siọ omẹ avọ emọ ene ba.” Oria Ebaibol vẹ u fiobọhọ kẹe? Obe Itẹ 17:​17, onọ o ta nọ: “Ogbẹnyusu ọ rọ rọkẹ eyowo ẹsikpobi, rekọ oniọvo ọ rẹ ruẹ uye oniọvo.” Kirsten o bo bru ahwo nọ a gbẹ rrọ ukoko Isẹri Jihova rọkẹ obufihọ. Kọ a fiobọhọ kẹe? Ọ ta nọ: “Ahwo nọ ma gbẹ rrọ ukoko na a dhogbo ze ti fiobọhọ kẹ omẹ! A jẹ hae rehọ eware buobu ru omẹ ọghọ. Isiasa soso a fiobọhọ kẹ omẹ avọ emọ mẹ kua no uwou jọ ruọ ofa. Omọvo jọ ọ gwọlọ iruo nọ me re ru kẹ omẹ. Aikpobi a jẹ dhẹ wariẹ omẹ họ ẹsikpobi.”

Aye nọ a re se Delphine nọ ma fodẹ evaọ izoẹme nọ e vrẹ na, ọ jọ goli re. Nọ eware na kpobi e via kẹe no, ọ ta nọ: “O jọ omẹ oma wọhọ ẹsenọ akpọ o kiuke ku omẹ, keme ahwo a je yeri uzuazọ rai vrẹ yọ me bi rri ughe. Akpọ mẹ ọ jọ goli.” Oria Ebaibol jọ nọ u fiobọhọ kẹe họ, obe Olezi 68:6 nọ o ta nọ: “Ọghẹnẹ ọ rẹ rehọ uwou kẹ oruori ria.” Ọ ta nọ: “Mẹ riẹ nọ orọnikọ uwou dẹẹ oria Ebaibol na o be ta nọ Ọghẹnẹ ọ rẹ bọ kẹ oruori na ha. Ukpoye, uwou na u dikihẹ kẹ ọruẹrẹfihotọ egagọ Jihova, oria ufuoma nọ o wọhọ uwou kẹ enọ e be gọe. Ahwo nọ a be gọ Jihova a re mu usu kugbe ohwohwo je dhesẹ uvi ọdawẹ gbe ororokẹ keme a you Jihova. Rekọ mẹ riẹ nọ taure ohwo o te ti si kẹle enọ e be gọ Jihova, o re mu usu kugbe Jihova tao. Obe Olezi 37:4 u fiobọhọ kẹ omẹ evaọ abọ nana, etẹe ọ ta nọ: ‘Eva e were owhẹ eva ỌNOWO, ọ te kẹ owhẹ ẹgwọlọ ra kpobi.’”

Ọ ta uwhremu na nọ: “Mẹ ruẹ vuhumu inọ o gwọlọ nọ me re mu usu okpekpe kugbe Jihova, keme ọye họ ogbẹnyusu nọ ọ mai woma kpaobọ. Kẹsena me te kere eware jọ nọ mẹ rẹ sai kuomagbe amọfa ru họ otọ, re mẹ sai mu usu kugbe ahwo nọ a gine you Jihova. Onana u fiobọhọ kẹ omẹ wuhrẹ epanọ a rẹ kpairoro vrẹ ethobọ amọfa, jẹ tẹrovi ewoma rai.”

Uzẹme riẹ họ, ohwo ọvo ọ gba ha, makọ ahwo nọ a be gọ Jihova dede. Isẹri Jihova dede a be rẹriẹ ovao dhe ebẹbẹ wọhọ epanọ o be via kẹ ahwo kpobi. Rekọ eware nọ ohwo o bi wuhrẹ no Ebaibol na ze e rẹ wọe rọ unevaze fiobọhọ kẹ amọfa nọ a tẹ gwọlọ obufihọ. Yọ u fo re ohwo o mu usu kugbe ahwo otiọye. Rekọ, ẹvẹ ehrẹ Ebaibol e sai ro fiobọhọ kẹ omai thihakọ ebẹbẹ nọ ma sai kuhọ họ, wọhọ ẹyao ọgaga gbe uweri?