Delphine nọ ma fodẹ evaọ uzoẹme nọ o vrẹ na ọ ta nọ fikinọ ọ jẹ ruawa kpahe ebẹbẹ riẹ gaga, o te mu idi họ ẹda thomawa. Ebaibol na ọ ta nọ o thọ re ma da udu hi, rekọ ọ ta nọ: “Who ku oma ra gbe udevie egbidi hi.” (Itẹ 23:20) Ekiakiẹ i dhesẹ nọ idi-eda thomawa o be lẹliẹ ahwo mọ oghẹrẹ eyao sa-sa, nọ erọo e be rọ fa, je bi ru ima ahwo buobu whu kufiẹ kukpe kukpe. Ahwo a sae whaha ebẹbẹ nana otẹrọnọ a bi fi ehrẹ Ebaibol họ iruo.

Ere Delphine o ru. Ọ ta nọ: “Me muẹrohọ nọ udi nọ mẹ jẹ da vrẹta na u je ru awaruọ mẹ kpotọ họ. Me te fi ohrẹ nọ o rrọ obe Ahwo Filipai 4:​6, 7 họ iruo, onọ o ta nọ: ‘Wha ruawa kpahe oware ovo ho, rekọ . . . ta ayare rai via kẹ Ọghẹnẹ.’ Aso kpobi nọ mẹ tẹ be ruawa, mẹ rẹ lẹ se Jihova. Me re horie eva mẹ kpobi kẹe, ta eware nọ e be lẹliẹ ofu dhe omẹ, enọ e be kẹ omẹ uye, gbe enọ e be kẹ omẹ ọkora kẹe, re o fiobọhọ kẹ omẹ wo udu udhedhẹ je ru awaruọ mẹ kpotọ. Nọ oke o tẹ ke no, mẹ rẹ daoma kpairoro vrẹ eware nọ e be kẹ omẹ uye na. Olẹ u fiobọhọ kẹ omẹ je roro kpahe eware nọ me gbe wo, ukpenọ me re roro kpahe eware nọ i vru mi omẹ. Mẹ tẹ gbaemu nọ mẹ rẹ gbẹ da udi nọ u re mu ofa ha. Me wo udhedhẹ iroro yọ eva e were omẹ gaga, fikiere mẹ gbẹ gwọlọ ruawa kpahe ebẹbẹ mẹ hẹ.”

Ẹnwae-obro o be wha edada se ahwo jẹ lẹliẹ erọo buobu fa. Rekọ ehrẹ Ebaibol e rẹ sai fiobọhọ kẹ  omai whaha ebẹbẹ yena. Wọhọ oriruo, ma te ru lele ehrẹ Ebaibol, onana u ti fiobọhọ kẹ omai whaha eware nọ i re su kpohọ ẹnwae-obro wọhọ oma nọ a rẹ rọ lẹliẹ amọfa, gbe iwoho ẹbẹba nọ a re riwi. Ọmọzae jọ nọ a re se Samuel ọ ta nọ: “O jọ lọlọhọ kẹ omẹ re mẹ rọ oma lẹliẹ emetẹ. Ẹsejọ ọmọtẹ nọ ọ dhẹ ruọ omẹ oma ha o re wo isiuru kẹ omẹ​—yọ onana o rẹ gwọlọ wọ omẹ roma lẹliẹ ọmọtẹ na dede nọ me wo isiuru kẹe he.” Unuẹse buobu ahwo a rẹ ta nọ Samuel ọ be roma lẹliẹ ae dede nọ ọ riẹ nọ o bi ru ere he. Fikiere ọ tẹ tubẹ ta nọ o re keke aro fihọ roma lẹliẹ emetẹ. Rekọ o jẹ hae kẹe uye. Uwhremu na ọ ta nọ: “Uruemu na o rẹ wha uye ze, keme o rẹ lẹliẹ ohwo roro kpahe omobọ riẹ ọvo.”

Samuel ọ tẹ jọ oria itanẹte jw.org se kpahe uzoẹme jọ nọ a kere kpahe izoge. O te je roro didi kpahe obe Itẹ 20:​11, onọ o ta nọ: ‘Ọmaha dede ọ rẹ rehọ uruemu riẹ dhesẹ omariẹ via, makinọ o bi ru uvi oware gbe onọ ukiete.’ Ẹvẹ onana u ro fiobọhọ kẹe? Samuel o vuhumu nọ oma nọ a rẹ rọ lẹliẹ emetẹ yọ oware nọ u kiete he. Ọ ta uwhremu na nọ: “Mẹ ruẹ nọ uzoge nọ ọ be rọma lẹliẹ emetẹ o re wo iruemu nọ e rẹ raha orọo kuotọ nọ ọ tẹ rọo no evaọ obaro. Me te roro kpahe epanọ o te jọ aye nọ mẹ te rehọ oma nọ ọ tẹ ruẹ omẹ nọ mẹ be rọ oma lẹliẹ emetẹ efa. Onana u te fiobọhọ kẹ omẹ ruẹ nọ uruemu na o te wha uye se omẹ. Uruemu nana u yoma gaga dede nọ o lọlọ eru.” Samuel o te nwene. Uruemu nana nọ ọ whaha na u ru nọ o gbe ro kie ruọ ẹnwae-obro ho.

Oware nọ u kiọkọ re Antonio omariẹ o kie ruọ ẹnwae-obro u tulo ho, keme o je riwi ifoto ẹbẹba. Dede nọ o you aye riẹ gaga, o jọ bẹbẹ kẹe re ọ se ifoto ẹbẹba ba eriwo. Ọ ta nọ oware nọ u fiobọhọ kẹe họ, obe 1 Pita 5:8 nọ o roro didi kpahe. Obe 1 Pita 5:8 o ta nọ: “Wha sẹro iroro rai, wha hai rou. Ọwegrẹ rai, Ẹdhọ, ọ be nya kpenẹ avọ enẹ wọhọ okpohrokpo nọ o bi do enu, be gwọlọ ohwo nọ ọ rẹ re no.” Antonio ọ ta nọ: “Ifoto ẹbẹba e vọ oria kpobi, yọ ohwo o te rri rai, e rẹ kake thọrọ iẹe ẹro ho. Oria ikere yena u fiobọhọ kẹ omẹ vuhu oria nọ odawọ nana u bi no ze. Nọ isiuru ifoto ẹbẹba iriwo e tẹ gwọlọ ziọ omẹ iroro, u fo nọ mẹ rẹ kareghẹhọ ẹsikpobi inọ Setan họ ọnọ ọ be rehọ ifoto ẹbẹbẹ kpahe ẹta. Mẹ ruẹ nọ Jihova ọvo họ ohwo nọ ọ rẹ sai fiobọhọ kẹ omẹ ‘sẹro iroro mẹ’ je muẹrohọ otọ, re mẹ sai mugba kẹ isiuru nana, jẹ sẹro orọo mẹ.” Ebaibol na o fiobọhọ kẹ Antonio nọ ọ sae rọ whaha ekpehre uruemu nana uwhremu na. Yọ onana u fiobọhọ kẹe nọ o gbe ro kie ruọ ebẹbẹ ilogbo efa ha.

Iriruo nọ ma ta kpahe no na, i dhesẹ nọ Ebaibol na ọ sai gine fiobọhọ kẹ omai whaha ebẹbẹ ilogbo. Rekọ, ẹvẹ kpahe ebẹbẹ nọ e dowọ muotọ no, hayo enọ e be rọwo kuhọ họ? Joma ta kpahe epanọ Ebaibol na ọ sai ro fiobọhọ kẹ omai ku ebẹbẹ itieye na họ.