Evaọ Ebaibol na, ẹme Griki nọ a fa “oruọzewọ” na u dhesẹ “oware nọ u woma ziezi.” A rẹ sae jẹ rehọ iẹe dhesẹ uruemu nọ u kiehọ

Ileleikristi a re se ẹme Pọl ukọ na gboja, inọ: ‘Ma gwọlọ ru eware kpobi avọ oruọzewọ.’ Eme onana u dhesẹ?

Nẹnẹ, ahwo buobu a re rri ughẹgbe taure a te ti kpohọ oria nọ a be nya. Fikieme? Keme a gwọlọ riẹ sọ ẹgọ gbe osẹ rai o woma ziezi. Rekọ oware jọ o riẹ nọ u wuzou vi eto nọ a re ru gbe emamọ iwu nọ a re kuhọ. Uruemu mai o rẹ sai fiba hayo sino erru mai.

Ebaibol na ọ ta nọ ẹsikpobi omamai o rẹ gwọlọ wọ omai ru oware uyoma. Obe Emuhọ 8:21 o ta nọ: ‘Eva ohwo e vọ avọ umuomu no emaha ze.’ Fikiere re ma sae jọ ahwo oruọzewọ, ma rẹ daoma họre wọso oma sebaẹgba mai na. Pọl ukọ na ọ ta kpahe epanọ o je ro lele oma uzioraha riẹ muabọ inọ: “Evaọ udu mẹ, o rrọ isiuru mẹ re me koko uzi Ọghẹnẹ, rekọ mẹ be jọ oma mẹ ruẹ uzi ofa jọ nọ o be họre so uzi iroro mẹ, u te bi ru omẹ jọ igbo kẹ uzi uzioraha nọ o rrọ oma mẹ.”—Ahwo Rom 7:22, 23.

Wọhọ oriruo, nọ udu mai o tẹ be gwọlọ wọ omai re ma ta ọrue hayo wha ahwo re, o gba omai họ họ inọ ma re ru lele oware kpobi nọ udu mai o gwọlọ. Mai ọvo ma rẹ sae salọ sọ ma bi ru ere hayo ma bi ru ere he. Dede nọ ma be rria udevie ahwo nọ a kare oruọzewọ, ma tẹ daoma whaha iroro iyoma nọ e ziọ omai udu, ma rẹ sae jọ ahwo oruọzewọ.

Re ma sae jọ ahwo oruọzewọ, ma rẹ daoma ta họ omamai obọ. U yoma kẹhẹ inọ ahwo buobu nẹnẹ a be mae tẹrovi ẹgọ gbe osẹ rai vi uruemu rai. Fikiere a rẹ ta nọ u te oware ovo ho re ohwo ọ wha ahwo re hayo ta ọrue ọsese. Obe na The (Honest) Truth About Dishonesty o ta nọ: “Ma tẹ make be wha ahwo re, o rẹ nwane gahrọ họ, re ma gbẹ sai rri omamai inọ ma gbẹ rrọ ahwo oruọzewọ.” Kọ oware jọ o riẹ nọ o rẹ sai fiobọhọ kẹ omai riẹ sọ uruemu ababọ-oruọzewọ u woma hayo uyoma? Ee, oware utioye jọ o riẹ.

Ahwo buobu evaọ akpọ na a ruẹ no nọ Ebaibol na yọ obe nọ u re fiobọhọ kẹ ohwo vuhu oware uwoma gbe uyoma mu. Izi Ebaibol na i re fiobọhọ kẹ ohwo wo emamọ uruemu. (Olezi 19:7) Ma rẹ jọ Ebaibol na ruẹ ekpọvio nọ i re fiobọhọ kẹ ohwo evaọ uviuwou, iruo, uruemu, gbe evaọ egagọ Ọghẹnẹ. U kri no nọ a ro kere Ebaibol na, rekọ ehrẹ riẹ i gbe wo iruo nẹnẹ. Ehrẹ Ebaibol na i re fiobọhọ kẹ oghẹrẹ ahwo kpobi, makọ oria nọ ohwo o no ze kẹhẹ. Ma te bi se Ebaibol na kẹse kẹse, roro kpahe oware nọ ma se, jẹ daoma fi ei họ iruo, ma rẹ sae jọ ahwo oruọzewọ nọ a riẹ oware uwoma gbe uyoma.

 Rekọ re ma sae jọ ahwo oruọzewọ, eriariẹ Ebaibol nọ ma re wo ọvo, i te he. O rrọ ere keme ma be rria akpọ nọ o gbeku nọ ọ gwọlọ nọ ma rọ aro kele uruemu uyoma riẹ. Fikiere, o gwọlọ nọ ma lẹ se Ọghẹnẹ re o fiobọhọ kẹ omai, jẹ thọ omai uke. (Ahwo Filipai 4:6, 7, 13) Ma te ru ere, ma ti wo udu nọ ma sai ro dikihẹ kẹ oware uwoma, je ru eware kpobi avọ oruọzewọ.

Uruemu oruọzewọ Hitoshi nọ ma fodẹ evaọ uzoẹme jọ nọ o vrẹ na, o wha erere sei. Enẹna o bi ruiruo evaọ oria nọ ọga iruo riẹ o jo rri uruemu oruọzewọ riẹ na ghaghae. Hitoshi ọ ta nọ: “Eva e be were omẹ gaga enẹna, keme mẹ ruẹ iruo nọ e kẹ omẹ uvẹ wo obroziẹ-iroro ọfuafo no.”

O via kẹ amọfa buobu ere no re. Joma ta kpahe iriruo ahwo jọ nọ uruemu oruọzewọ rai o wha erere se no fikinọ a fi ohrẹ Ebaibol nana họ iruo, onọ o ta nọ ma “ru eware kpobi avọ oruọzewọ.”

• Obruoziẹ-Iroro Ọfuafo

  “Me no isukulu evaọ okenọ mẹ jọ ikpe 13 re me kuomagbe iji. Fikiere, etho me tho enwenọ eware kpobi nọ me wo. Uwhremu na me te ti wo ọzae, mai imava ma te mu Ebaibol na họ ewuhrẹ kugbe Isẹri Jihova. Ma tẹ jọ Ebaibol na ruẹ vuhumu nọ uruemu ewhariọ gbe uji-utho kpobi o rẹ dha Jihova * eva, fikiere ma tẹ jiroro nọ ma re nwene uzuazọ mai. Evaọ ukpe 1990, ma tẹ roma mudhe kẹ Jihova jẹ họ-ame evaọ ukoko Isẹri Jihova.”—Itẹ 6:16-19

  “Evaọ okenọ u kpemu, uwou mẹ o vọ avọ eware nọ a tho, rekọ eware yena e gbẹ rrọ uwou mẹ enẹna ha, yọ onana o lẹliẹ omẹ wo obroziẹ-iroro ọfuafo no. Nọ me te roro kpemu kpohọ ikpe yena nọ me ro yeri ekpehre uzuazọ na, eva e rẹ were omẹ enẹna inọ Jihova o dhesẹ ohrọ kẹ omẹ. Enẹna mẹ be wezẹ dhedhẹ, keme mẹ riẹ nọ uzuazọ nọ me bi yeri obọnana o be were Jihova.”—Cheryl, evaọ obọ Ireland.

  “Nọ ọga iruo mẹ ọ riẹ nọ mẹ siọ udi-oriọ jọ nọ ọhreki mai jọ ọ jẹ kẹ omẹ, ọ tẹ ta kẹ omẹ nọ: ‘Ọghẹnẹ nọ whọ be gọ na họ ọnọ o ru owhẹ họ ohwo nọ a re fievahọ na! Whẹ yọ oghale ulogbo kẹ ekọmpene mai na.’ Uruemu oruọzewọ nọ me bi dhesẹ evaọ eware kpobi na u fiobọhọ kẹ omẹ wo emamọ obruoziẹ-iroro no. Yọ u bi fiobọhọ kẹ omẹ tuduhọ ahwo uviuwou mẹ gbe amọfa awọ re a jọ ahwo oruọzewọ re.”—Sonny, evaọ obọ Hong Kong.

• Udhedhẹ Iroro

  “Mẹ jọ ethabọ ọnọ o wuzou iruo mai evaọ ebanke jọ nọ a jọ akpọ na soso riẹ. Evaọ iruo nana, ahwo a rehọ e riẹ nọ whọ tẹ rrọ ohwo oruọzewọ, whọ sai fe he. A rẹ ta nọ, ‘oware ovo o jariẹ thọ họ otẹrọnọ who gu ọrue ọsese hayo whọ dina wha ahwo re evaọ iruo hayo ekiọthuọ, re whọ sai wo erere.’ Rekọ uruemu oruọzewọ mẹ o lẹliẹ omẹ wo udhedhẹ iroro. Mẹ gba riẹ mu nọ mẹ te gbẹ ruabọhọ uruemu oruọzewọ mẹ na, ghele oware kpobi nọ u re noi ze kẹhẹ. Ahwo nọ me bi ruiruo kẹ a riẹ nọ me ti gu ọrue kẹ ai hi.”—Tom, evaọ obọ America.

• Adhẹẹ

  “Ẹdẹjọ, ohwo nọ ọ be rẹrote abọ nọ me bi jo ruiruo evaọ oria iruo mai, ọ tẹ ta nọ me gu ọrue kpahe eware jọ nọ ma be zẹ nọ i bi vru, rekọ mẹ rọwo ho. Uwhremu na nọ a mu ahwo nọ a bi tho eware na, ohwo nọ ọ rehọ omẹ iruo na o te yere omẹ ziezi rọkẹ uruemu oruọzewọ mẹ na. O gwọlọ nọ ohwo o re wo udu re ọ sae ta uzẹme evaọ akpọ nana nọ ọ kare oruọzewọ na. Yọ o rẹ lẹliẹ amọfa fievahọ omai jẹ kẹ omai adhẹẹ.”—Kaori, evaọ obọ Japan.

Obroziẹ-iroro ọfuafo, udhedhẹ iroro, gbe adhẹẹ yọ irere jọ nọ i re te omai nọ ma tẹ rrọ ahwo oruọzewọ. Kọ whọ rọwo ere?