A TẸ kẹ omai obọdẹ okẹ, o rẹ wọ omai dhesẹ edẹro kẹ ohwo nọ ọ kẹ okẹ na. Jesu ọ ta kpahe emamọ uruemu nana nọ o siwi ezae ikpe jọ nọ e jẹ mọ ẹyao oti. Nọ omọvo ezae ikpe nana jọ ọ ruẹ nọ oti riẹ o kpo no, “o te kuomarẹriẹ zihe, be rọ urru oruarua jiri Ọghẹnẹ.” Jesu ọ ta nọ: “Ikpe na a ru fo, o gbẹ rrọ ere? Kọ izii nọ i kiọkọ e rrọ?” (Luk 17:​12-17) Eme ma rẹ sai wuhrẹ no onana ze? O rrọ lọlọhọ re oware uwoma nọ a ru kẹ omai o thọrọ omai ẹro.

Okẹ ẹtanigbo na yọ okẹ nọ u wo ohẹriẹ no ekẹ efa kpobi. Oye họ okẹ nọ o mae rro kpaobọ nọ a kẹ no. Eme u fo nọ who re ru kpahe okẹ nana nọ Ọghẹnẹ ọ kẹ owhẹ na?

• Riẹ ọnọ ọ kẹ okẹ na. Ẹtanigbo na o rẹ nwane rọ ere wha uzuazọ se ohwo kpobi hi. Nọ Jesu ọ jẹ lẹ se Ọghẹnẹ, ọ ta nọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.” (Jọn 17:3) Ohwo jọ ọ tẹ ta kẹ owhẹ nọ ọzae jọ o siwi uzuazọ ra evaọ okenọ whọ jọ ọmaha, kọ o gbẹ te were owhẹ re whọ riẹ oghẹrẹ ohwo nọ ọzae na ọ rrọ, gbe oware nọ o wha riẹ ze nọ o ro siwi owhẹ? Jihova Ọghẹnẹ  nọ ọ kẹ owhẹ okẹ ẹtanigbo nọ o rẹ wha uzuazọ ze na, ọ gwọlọ nọ whọ riẹ oghẹrẹ ohwo nọ ọ rrọ, jẹ jọ ogbẹnyusu ọkpekpe riẹ. Ebaibol na ọ ta nọ: “Si kẹle Ọghẹnẹ, o re ti si kẹle owhai.”​—Jemis 4:8.

• Fi ẹrọwọ họ ẹtanigbo na. “Ọnọ o fi ẹrọwọ họ Ọmọ na o re wo uzuazọ ebẹdẹ bẹdẹ.” (Jọn 3:36) Eme u dhesẹ re a fi ẹrọwọ họ oware? O gwọlọ nọ ohwo o re ru oware jọ. Koyehọ re ohwo o dhesẹ nọ o fi ẹrọwọ họ ẹtanigbo na, ọ rẹ jowọ. (Jemis 2:17) Oghẹrẹ owojẹ vẹ? Taure okẹ u te ti zihe ruọ ora, who re mi okẹ na. Fikiere o gwọlọ nọ whọ rẹ jowọ, re who mi okẹ ẹtanigbo na re. Evaọ oghẹrẹ vẹ? Wuhrẹ re whọ riẹ oghẹrẹ nọ Ọghẹnẹ ọ gwọlọ nọ who yeri uzuazọ ra, who ve ru lele eware nọ who wuhrẹ na. * Lẹ se Ọghẹnẹ re ọ rọ izieraha ra vrẹ owhẹ, re who je wo eva efuafo. Lẹ se Ọghẹnẹ avọ imuẹro inọ evaọ obaro, ẹtanigbo na o te wha udhedhẹ, omofọwẹ, gbe eware iwoma se ahwo nọ a fi ẹrọwọ họ okẹ ẹtanigbo na!​—Ahwo Hibru 11:1.

• Kpohọ Ekareghẹhọ uwhu Jesu. Jesu ọ to ekareghẹhọ nana họ re o kareghẹhọ omai okẹ ẹtanigbo na. Jesu ọ ta kpahe ekareghẹhọ na inọ: “Wha hai ru onana rọ kareghẹhọ omẹ.” (Luk 22:19) Isẹri Jihova a ti ru ekareghẹhọ uwhu Jesu evaọ Edivẹ-Oka, Ane 11, 2017, nọ ọre o te kie diwi no. Enwenọ auwa ọvo a re ro ru ekareghẹhọ na, yọ a te jariẹ ta kpahe oware nọ uwhu Jesu u ro wuzou, gbe eghale nọ o te wha ze enẹna gbe evaọ obaro. Evaọ ukpe nọ ukpo, ahwo nọ a bu te ima udhe (20,000,000) evaọ akpọ na soso ae a nyaze ekareghẹhọ na. Ma zizie owhẹ nọ who kuomagbe omai dhesẹ nọ who wo edẹro kẹ okẹ Ọghẹnẹ nọ o mae rro na.