EVAỌ egagọ buobu wariẹ akpọ na họ wọhọ ichọche Katọlik, egagọ Budha, gbe ichọche efa sa-sa, o gbahọ nọ isu rai a rẹ rọo ho. Ẹsibuobu ma re yo kpahe isu egagọ nọ e be wezẹ kugbe ahwo egagọ rai, yọ ahwo buobu a roro nọ uruemu seba-ẹrọo nana o be whae ze.

Fikiere ohwo ọ rẹ sai nọ inọ, kọ Ebaibol na ọ ta nọ o gbahọ inọ isu egagọ a rẹ rọo ho? Re ma sae kuyo onọ nana, joma ta kpahe epanọ uruemu nana u ro muhọ gbe epanọ Ọghẹnẹ o rri rie.

Obe na Encyclopædia Britannica o ta nọ re a seba-ẹrọo u dhesẹ nọ “ohwo o re wo aye hayo ọzae he, yọ ọ rẹ kẹnoma kẹ owezẹ ọzae-avọ-aye fikinọ ọ roma kẹ egagọ hayo ọ rrọ osu egagọ.” Evaọ ovuẹ nọ Pope Benedict XVI ọ kẹ evaọ ukpe 2006, ọ ta nọ seba-ẹrọo “yọ uruemu nọ u muhọ nọ oke ikọ na o nwane vrẹ no.”

Rekọ Ileleikristi ikpe udhusoi ọsosuọ a nya lele uruemu nana ha. Pọl ukọ na dede nọ ọ rria evaọ ikpe udhusoi ọsosuọ, ọ vẹvẹ Ileleikristi unu kpahe ahwo nọ a te ta “eme eviẹhọ nọ a ta nọ i no obọ Ọghẹnẹ ze” gbe enọ e rẹ “ghọ orọo.”​—⁠1 Timoti 4:​1-3.

Evaọ etoke ikpe udhusoi avivẹ, uruemu seba-ẹrọo u ro muhọ evaọ ichọche buobu, enọ i zihe ruọ ichọche Katọlik uwhremu na. Obe na Celibacy and Religious Traditions o ta nọ, onana o “nwane rọwokugbe owezẹ ọzae-avọ-aye nọ ahwo a jẹ seba, onọ u muhọ evaọ otọ esuo ahwo Rom evaọ etoke ikpe udhusoi avivẹ na.”

Evaọ ikpe buobu nọ i lele i rie, ogbẹgwae ichọche buobu gbe efada rai a tẹ whobọhọ uruemu seba-ẹrọo rọkẹ izerẹ egagọ rai. A roro nọ owezẹ  ọzae-avọ-aye u re zue ohwo oma, yọ u kiehọ rọkẹ iruo ozerẹ hẹ. Ghele na, obe na Encyclopædia Britannica o ta nọ, “makọ rite ikpe udhusoi avọ ikpe dede, izerẹ buobu gbe ikọ-Ọghẹnẹ jọ a wo eyae.”

Evaọ ẹgwae nọ isu egagọ a jọ obọ Rom gba evaọ ukpe 1123 gbe 1139, a rọwo fihọ inọ izerẹ gbe ikọ-Ọghẹnẹ a re wo aye he, yọ makọ rite enẹna a gbe bi ru ere evaọ ichọche Katọlik. Ichọche na e tẹ rọ enẹ ru ei bẹbẹ kẹ izerẹ ichọche na re a rehọ ọkwa gbe igho ichọche ghale uku kẹ emọ rai.

A rẹ jọ Ebaibol na ruẹ epanọ Ọghẹnẹ o rri uzuazọ seba-ẹrọo. Ma rẹ jọ eva Ebaibol na ruẹ ẹme nọ Jesu ọ ta kpahe ahwo nọ a rọo ho, wọhọ ọyomariẹ fiki “Uvie odhiwu.” (Matiu 19:12) Nọ Pọl ọ jẹ ta kpahe ẹme nana re, ọ ta kpahe Ileleikristi nọ e salọ nọ a rẹ rọo ho, wọhọ ọyomariẹ “fiki usi uwoma na.”​—1 Ahwo Kọrint 7:​37, 38; 9:23.

Rekọ Jesu hayo Pọl a gba ohwo ọvo họ họ inọ ọ seba ẹrọo. Jesu ọ ta nọ seba-ẹrọo yọ “okẹ” rekọ orọnikọ ilele riẹ kpobi a wo okẹ na ha. Nọ Pọl o kere kpahe “enọ e re rọo ẹdẹvo ho,” ọ ta vevẹ nọ: “Me wo uvumọ uzi no obọ Olori na ze he, rekọ mẹ be ta iroro mẹ.”​—Matiu 19:11; 1 Ahwo Kọrint 7:​25, ẹme-obotọ.

Ofariẹ, Ebaibol na o dhesẹ nọ Ileleikristi ikpe udhusoi ọsosuọ buobu wọhọ Pita ukọ na, a wo eyae. (Matiu 8:14; Mak 1:​29-31; 1 Ahwo Kọrint 9:5) Evaọ uzẹme, fiki uruemu ẹnwae-obro nọ o da oria kpobi fia evaọ ekwotọ nọ ahwo Rom a je su, Pọl ukọ na o kere nọ otẹrọnọ Oleleikristi nọ ọ rrọ ọsẹro ọ rọo, ọ rẹ jọ “ọzae nọ o wo aye ọvo,” yọ emọ riẹ a rẹ “romakpotọ avọ osegboja.”​—1 Timoti 3:​2, 4.

Ahwo nana nọ a fodẹ nọ a rọo na a je lele eyae rai wezẹ keme Ebaibol na ọ ta nọ “ọzae o ru ẹgwọlọ aye riẹ kẹe,” yọ enọ e rọo no a rehọ owezẹ “gbọ ohwohwo ogbọ họ.” (1 Ahwo Kọrint 7:​3-5) O rrọ vevẹ inọ, seba-ẹrọo o rọ utee nọ Ọghẹnẹ o fihọ kẹ idibo riẹ hẹ, yọ o rọ ọgbahọ kẹ isu egagọ gbe he.

Otẹrọnọ seba-ẹrọo o rọ ọgbahọ họ, kọ fikieme Jesu avọ Pọl a rọ ta emamọ ẹme kpahe uzuazọ seba-ẹrọo? Fikinọ ohwo nọ ọ rọo ho o re wo uvẹ ziezi nọ ọ rẹ rọ ta usiuwoma kẹ amọfa. Ohwo nọ ọ rọo ho ọ rẹ sai wobọ ziezi evaọ iruo Ọghẹnẹ, yọ ọ te ruawa kpahe uzuazọ wọhọ ohwo nọ ọ rọo no ho.​—1 Ahwo Kọrint 7:​32-35.

Roro kpahe oriruo ọzae jọ nọ a re se David. O no iruo nọ a jẹ jọ whae okposa evaọ okpẹwho Mexico, ọ tẹ kwa kpohọ ẹmẹwho jọ evaọ orẹwho Costa Rica nyae ta usiuwoma je wuhrẹ ahwo Ebaibol na. David ọ sai ru inwene nana keme ọ re rọo ho. Ọ ta nọ: “Oke ọsosuọ o nwane lọhọ kẹ omẹ tere he re me nwene uzuazọ mẹ rọwokugbe oghẹrẹ uzuazọ ahwo na gbe okegbe na, rekọ fikinọ mẹ re rọo ho, me ru inwene na.”

Aye jọ nọ a re se Claudia nọ ọ re rọo ho, ọ kwa kpohọ oria nọ a jọ gwọlọ ahwo nọ a rẹ ta usiuwoma. Ọ ta nọ: “Mẹ be reawere usiuwoma nọ mẹ be ta na. Ẹrọwọ mẹ gbe usu mẹ kugbe Ọghẹnẹ u bi dhe ẹgẹga, nọ mẹ be ruẹ epanọ ọ be rọ rẹrote ẹgwọlọ mẹ na.”

Orọnikọ uzuazọ seba-ẹroo o rẹ jọ oware ọgbahọ họ. Claudia nọ ma fodẹ ẹsiẹ na ọ wariẹ ta nọ: “U muẹme he, te ohwo ọ rọo no hayo ọ re rọo ho, eva e rẹ were iẹe ghele otẹrọnọ ọ be rọ eva riẹ kpobi ru iruo kẹ Jihova.”​—Olezi 119:​1, 2.