JORDAN o kru oware nọ a rẹ rọ kare epẹsoro nọ a ku wọhọ okọ họ obọ. Who te rri rie, u te oware ovo ho. Ghele na, onana o rrọ usu ekẹ nọ e mae ghare kẹe kpaobọ. Jordan ọ ta nọ: “Ọzae jọ nọ a re se Russell nọ ọ jẹ hae nyaze uwou mai ọye ọ rehọ e riẹ kẹ omẹ evaọ oke emaha mẹ.” Nọ Russell o whu no, Jordan ọ tẹ te riẹ nọ ọzae na o fiobọhọ kẹ ọsẹ-ologbo gbe ọsẹgboni riẹ gaga evaọ okenọ eware e jọ gaga kẹ ai. Jordan ọ ta nọ: “Enẹna nọ mẹ riẹ kpahe oware nọ Russell o ru kẹ ahwo uviuwou mẹ no na, okẹ nana o tẹ rrọ ghaghae kẹ omẹ vi epaọ anwẹdẹ kpobi.”

Wọhọ epanọ ma ruẹ evaọ oriruo Jordan na, okẹ o rẹ sae jọ kuẹku, yọ ahwo a sai tube rri rie nọ u te oware ovo ho. Ghele na, ohwo nọ o wo edẹro o re rri oware nọ a kẹ riẹ ghaghae, hayo wọhọ oware nọ a rẹ sae rọ ugho dẹ hẹ. Ebaibol na ọ ta kpahe okẹ jọ nọ a sae rọ ugho dẹ hẹ inọ: “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”​—⁠Jọn 3:⁠16.

A rẹ ruobọ okẹ nana ha keme ohwo nọ u te obọ kpobi o re wo uzuazọ ebẹdẹ bẹdẹ! Kọ okẹ jọ o rrọ nọ o ghare vi oyena? Dede nọ ahwo jọ a sae riẹ oghẹrẹ nọ okẹ nana o rro te he, rọkẹ Ileleikristi uzẹme o rrọ “ghaghae.” (Olezi 49:8; 1 Pita 1:​18, 19) Rekọ, fikieme Ọghẹnẹ ọ rọ rehọ uzuazọ ọmọ riẹ kẹ ahwo-akpọ?

Pọl ukọ na ọ fodẹ oware nọ o wha riẹ ze inọ: “Uzioraha o rọ ẹkwoma omọvo ruọ akpọ na, uwhu u je no uzioraha ze na, ere uwhu u ro te ahwo kpobi oma.” (Ahwo Rom 5:12) Nọ Adamu o keke aro fihọ ghẹmeeyo kẹ Ọghẹnẹ, ọ tẹ raha uzi je whu wọhọ epanọ Ọghẹnẹ ọ ta. Emọ Adamu a tẹ reuku uzioraha gbe uwhu, uwhu o tẹ vaha ruọ akpọ na soso.

“Uwhu họ osohwa uzioraha, rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori  mai.” (Ahwo Rom 6:23) Re ahwo-akpọ a sai no obrukpe uwhu, Ọghẹnẹ o te vi ọmọ riẹ Jesu Kristi ziọ otọakpọ, re ọ rọ uzuazọ ogbagba riẹ dhe idhe kẹ ahwo-akpọ kpobi. Ohwo kpobi nọ o fi ẹrọwo họ idhe yena nọ a re se “ẹtanigbo” na, o re wo uzuazọ ebẹdẹ bẹdẹ.​—Ahwo Rom 3:24.

Pọl o yere Ọghẹnẹ rọkẹ eghale buobu nọ ọ rọ ẹkwoma Jesu Kristi kẹ idibo riẹ inọ: “Uyere u te Ọghẹnẹ fiki okẹ ọvọvẹ riẹ nọ a rẹ sae ruẹ unu gbiku riẹ hẹ.” (2 Ahwo Kọrint 9:15) Ginọ uzẹme, okẹ ẹtanigbo na o ghare te epanọ a sae rọ ruẹ unu gbiku riẹ hẹ. Rekọ evaọ usu ekẹ nọ Ọghẹnẹ ọ kẹ ahwo-akpọ kpobi no, fikieme okẹ ẹtanigbo na o rọ rrọ obọdẹ okẹ? Oghẹrẹ vẹ okẹ nana u ro wo ohẹriẹ no ekẹ efa nọ Ọghẹnẹ ọ kẹ omai no? * Ẹvẹ ma sai ro dhesẹ nọ okẹ nana o da omai ẹro? Iviena se izoẹme ivẹ nọ e rrọ obaro na, re whọ ruẹ iyo nọ Ebaibol na ọ kẹ kpahe enọ nana.