KỌ U WO OWARE JỌ NỌ WHỌ RẸ SAI RU KPAHE OBARO AKPỌ RA? Ahwo jọ a rọwo nọ otatha o be kpọ uzuazọ mai, orọnikọ oware jọ nọ ma re ru hu. Nọ ahwo buobu a gbẹ sae nyate utee nọ a fihọ họ, a rẹ daezọ họ. A rẹ ta nọ: “Otatha rai oye he!”

Nọ amọfa jọ a te rri okienyẹ gbe ọriẹwẹ nọ e da akpọ na fiẹ, jẹ ruẹ nọ u wo oghẹrẹ ovo nọ ahwo-akpọ a sai ro ku ebẹbẹ nana họ họ, udu u ve whrehe ai. O sae jọ nọ a daoma bẹ no re a yeri emamọ uzuazọ. Rekọ ẹsibuobu, eware wọhọ ẹmo, ozighi, okpẹtu nọ a r’obọ so ho, gbe ẹyao e vẹ raha eware ku ai. A vẹ be nọ omarai nọ, ‘Keme mẹ be lahiẹ oma kẹ?’

Uzẹme riẹ họ, eware buobu nọ ma rẹro rai hi e sai kpomahọ omaa mai. (Ọtausiuwoma Na 9:11) Ghele na, evaọ ẹme nọ u kie kpahe uzuazọ ra evaọ obaro, u wo oware jọ nọ whọ rẹ sai ru. Ebaibol na o dhesẹ nọ oware nọ whọ salọ nẹnẹ, u re kpomahọ uzuazọ ra evaọ obaro. Joma ta kpahe oware nọ Ebaibol na ọ ta.

Taure emọ Izrẹl a tẹ te ruọ Ẹkwotọ Eyaa na, Mosis nọ ọ jọ osu rai ọ ta kẹ ae nọ: “Me fi uwhu gbe uzuazọ, oghale gbe eka họ kẹ owhai; fikiere wha rọ uzuazọ, re whai avọ emọ rai a ruẹse zọ, wha you ỌNOWO na Ọghẹnẹ rai, je yo uru riẹ, jẹ dhẹ gbalọ iẹe.”​—Iziewariẹ 30:​15, 19, 20.

“Me fi uwhu gbe uzuazọ, oghale gbe eka họ kẹ owhai; fikiere wha rọ uzuazọ.”​—Iziewariẹ 30:19

Okenọ Ọghẹnẹ o siwi emọ Izrẹl no igbo Ijipti no, ọ kẹ rae uvẹ nọ a rẹ rọ salọ uzuazọ ufuoma gbe evawere evaọ obọ Ekwotọ Eyaa na nọ a bi kpohọ na. Rekọ oghẹrẹ uzuazọ yena o sae nwani te ai obọ gheghe he. Re a sai wo eghale yena, o gwọlọ nọ a rẹ salọ “uzuazọ.” Evaọ oghẹrẹ vẹ? A re ‘you Ọghẹnẹ, yo uru riẹ, jẹ dhẹ gbalọ iẹe.’

Nẹnẹ, whọ rẹriẹ ovao dhe ẹsalọ otiọye re, yọ onọ whọ salọ kpobi u ti kpomahọ oghẹrẹ nọ obaro akpọ ra o te jọ. Whọ tẹ salọ nọ who re you Ọghẹnẹ, yo urru riẹ, jẹ dhẹ gbalọ iẹe, yọ uzuazọ whọ salọ na​—uzuazọ evaọ aparadase otọakpọ. Rekọ ẹvẹ whọ sai ro ru eware esa yena?

Uyoyou họ uruemu Ọghẹnẹ nọ o mae rro. Jọn ukọ na o kere nọ: “Ọghẹnẹ họ uyoyou.” (1 Jọn 4:8) Fiki onana, nọ a nọ Jesu kpahe uzi nọ o mae rro evaọ usu izi na, ọ ta nọ: “Whọ rẹ rehọ udu ra kpobi gbe uzuazọ ra kpobi gbe iroro ra kpobi ro you Jihova Ọghẹnẹ ra hrọ.” (Matiu 22:37) Uyoyou o rẹ wọ ohwo wo usu okpekpe kugbe Jihova je yoẹme kẹe, orọnikọ fiki ozọ oware jọ nọ Ọghẹnẹ o ti ru ei hi. Rekọ, fikieme o rọ gwọlọ nọ ma re you Ọghẹnẹ?

Jihova o you ahwo-akpọ wọhọ epanọ esẹgbini a re you emọ rai na. Dede nọ esẹgbini a gba ha, enọ i you emọ rai a rẹ kẹ ae ohrẹ, wuhrẹ ai, tuduhọ ae awọ, thọ ae uke jẹ whọku ai keme a gwọlọ nọ eware i woma kẹ ae evaọ obaro. Kọ eme esẹgbini a re rẹro riẹ mi emọ rai? Esẹgbini a re rẹro nọ emọ rai a re you rai, je ru lele eware kpobi nọ a wuhrẹ i rai rọkẹ ewoma rai. Epọvo na re, Ọsẹ obọ odhiwu mai ọ gwọlọ nọ ma you rie je dhesẹ nọ eware kpobi nọ o ru kẹ omai no e da omai ẹro fia.

Evaọ ẹvẹrẹ ọsosuọ nọ a ro kere Ebaibol na, ẹme na “yo” hayo gaviezọ, u dhesẹ epanọ a re “yoẹme.” Wọhọ oriruo, ma tẹ ta kẹ ọmọ nọ, “Gaviezọ kẹ ọsẹgboni ra,” yọ ma be ta kẹ ọmọ na nọ o yoẹme kẹ ọsẹgboni riẹ. Fikiere, re a yo hayo gaviezọ kẹ urru Ọghẹnẹ, u dhesẹ nọ ohwo o re yoẹme kẹ Ọghẹnẹ. Nọ orọnọ Ọghẹnẹ ọ be ta ẹme kẹ ahwo-akpọ no obo odhiwu ze nẹnẹ hẹ na, ma sae gaviezọ kẹ Ọghẹnẹ nọ ma te bi se Ebaibol na je ru lele eware nọ ma bi se na.​—1 Jọn 5:3.

Ẹme nọ Jesu ọ ta u dhesẹ nọ u wuzou gaga re ma gaviezọ kẹ urru Ọghẹnẹ. Ọ ta nọ: “Orọnikọ ẹkwoma ebrẹdi ọvo ohwo ọ rẹ rọ jọ uzuazọ họ, rekọ ẹkwoma ẹme kpobi nọ o bi no unu Jihova ze.” (Matiu 4:4) Wọhọ epanọ o gwọlọ nọ ma rẹ re emu kẹdẹ kẹdẹ na, ere ọvona o gwọlọ nọ ma re wuhrẹ kpahe Ọghẹnẹ jẹ riẹe ziezi re. Fikieme? Keme Solomọn ovie owareghẹ na ọ ta nọ, areghẹ ọ rẹ thọ ohwo wọhọ epanọ ugho o rẹ thọ ohwo na, rekọ oware nọ eriariẹ o rọ mai woma họ, areghẹ ọ rẹ sẹro uzuazọ ọnọ o wo rie. (Ọtausiuwoma Na 7:12) Eriariẹ gbe areghẹ nọ i no obo Ọghẹnẹ ze e rẹ thọ omai nẹnẹ, je fiobọhọ kẹ omai salọ oghẹrẹ uzuazọ nọ u re su kpohọ uzuazọ ebẹdẹ bẹdẹ.

Evaọ ọtadhesẹ Jesu nọ ma fodẹ evaọ uzoẹme nọ o vrẹ na, Jesu ọ ta nọ: “Edhere nọ o bi su kpohọ uzuazọ ọ rrọ kekeke, unuẹthẹ riẹ ọ rrọ hwahwa, yọ umutho ahwo a bi duku ei.” (Matiu 7:​13, 14) Nọ whọ tẹ be nya edhere otiọye, ababọ avro, whọ te gwọlọ ohwo nọ ọ riẹ kpahe edhere na ziezi nọ ọ rẹ sai su owhẹ te obonọ whọ be nya​—uzuazọ ebẹdẹ bẹdẹ. Fikiere, o rrọ oware areghẹ re ma dhẹ gbalọ Ọghẹnẹ. (Olezi 16:8) Rekọ, ẹvẹ ma sai ro ru ere?

Kẹdẹ kẹdẹ, u wo eware buobu nọ i wuzou nọ ma re ru, gbe efa nọ ma gwọlọ ru. Eware itieye na e sae rehọ oke mai, hayo mi omai oke nọ ma hai ro ru eware nọ Ọghẹnẹ ọ gwọlọ mi omai. Oye o whariẹ ze nọ Ebaibol na ọ jẹ ta nọ: “Wha fiẹrohọ otọ ziezi re wha ruẹ nọ oghẹrẹ nọ wha bi yeri o rrọ wọhọ igheghẹ hẹ rekọ iwoareghẹ, wha rehọ oke rai ruiruo ziezi, keme edẹ na e rrọ muomu.” (Ahwo Ẹfisọs 5:​15, 16) Nọ usu mai kugbe Jihova o tẹ rrọ oware ọsosuọ evaọ uzuazọ mai, yọ ma be dhẹ gbalọ iẹe.​—Matiu 6:33.

Dede nọ whọ sai ru oware ovo kpahe uzuazọ nọ who yeri vrẹ no ho, whọ sai ru oware nọ u re fiobọhọ kẹ owhẹ avọ uviuwou ra wo uzuazọ ebẹdẹ bẹdẹ evaọ obaro. Ebaibol na o dhesẹ nọ Jihova o you omai gaga, yọ o dhesẹ oware nọ ma re ru kẹ omai. Maeka ọruẹaro na ọ ta nọ:

“Whai ahwo, o dhesẹ eware iwoma kẹ owhai no; eme ỌNOWO na ọ jọ obọ rai gwọlọ rekọ re wha ru onọ u kiẹrẹe, wha ve kielele uyoyou, re wha jẹ rehọ oma kpotọ nya lele Ọghẹnẹ rai?”​—Maeka 6:8.

Kọ whọ te jẹ uzizie Jihova rehọ, re who wo eghale ebẹdẹ bẹdẹ nọ e rrọ obaro tha na? Obọ ra o rrọ!