AHWO a wo ọvuọ eriwo riẹ kpahe uzuazọ gbe uwhu. Ahwo jọ a re roro nọ ohwo o te whu no, o ve kpohọ akpọ ọfa nyae rria. Amọfa a re roro nọ ohwo o te whu no, a vẹ wariẹ yẹe evaọ oria ofa. Yọ amọfa a re roro nọ ohwo o te whu no yọ u re no.

O sae jọ nọ who wo eriwo ọfa kpahe ẹme nana fiki oria nọ a jọ yọrọ owhẹ hayo oria nọ whọ jọ whẹro. Nọ orọnọ ahwo a wo ọvuọ eriwo riẹ kpahe uzuazọ gbe uwhu na, kọ u wo ohwo jọ nọ ọ rẹ sae vuẹ omai uzẹme ẹme na, hayo kọ u wo oria jọ nọ ma rẹ sai kpohọ re ma ruẹ uzẹme ẹme na?

Anwọ ikpe buobu ze na, isu egagọ a bi wuhrẹ ahwo nọ ohwo o te whu no, u wo oware jọ nọ u re no omariẹ kpohọ oria ofa nyae rria. Ahwo buobu nọ a rrọ egagọ nọ e mai viodẹ evaọ akpọ na wọhọ Ileleikristi, Hindu, Muslim, Ju, gbe egagọ efa, a rọwo uwuhrẹ nana inọ ohwo o te whu no, oware jọ u re no oma ohwo na kpohọ akpọ izi nyae rria. Evaọ abọdekọ riẹ, ahwo nọ a rrọ egagọ Buddha a rọwo nọ ohwo o te whu no, a rẹ wariẹ yẹi unuẹse buobu bẹsenọ o re te oria akpọriọ nọ a re se Nirvana.

Fiki iwuhrẹ nana, ahwo buobu evaọ akpọ na soso a rọwo nọ uwhu u re rovie uvẹ fihọ kẹ ohwo kpohọ akpọ ọfa nyae rria. Fikiere rọkẹ ahwo buobu, ohwo o gbe whu hu a sae wariẹ yẹi hi, hayo ọ sai kpohọ akpọ ọfa nyae rria ha, a re roro nọ uwhu o rrọ ẹjiroro Ọghẹnẹ no emuhọ ze. Rekọ eme Ebaibol na ọ ta kpahe ẹme nana? Iviena se uzoẹme nọ o rrọ aro na re whọ ruẹ uyo na. Uyo na o sai gbe owhẹ unu.