Kọ o sai gine mu omai ẹro nọ eyaa Ọghẹnẹ kpobi i ti rugba? U mu Jesu ẹro nọ eyaa Ọghẹnẹ kpobi i ti rugba, yọ o wuhrẹ ahwo re a fievahọ eyaa Ọghẹnẹ. Joma ta kpahe oriruo jọ nọ Jesu ọ kẹ evaọ Ovuẹ obọ Ugbehru riẹ, onọ o rrọ obe Matiu 5:18: “Uzẹme mẹ be ta kẹ owhai inọ odhiwu gbe akpọ e tẹ make vrẹ, ẹmẹwẹ ubiẹme ovo evaọ Uzi na o rẹ vrẹ hẹ, bẹsenọ eware na kpobi i re rugba no.”

Ubiẹme nọ o mae kawo evaọ ibieme Hibru họ י (yod), yọ oye họ ubiẹme ọsosuọ evaọ usu ibiẹme ene nọ i dikihẹ kẹ odẹ Ọghẹnẹ, koyehọ Tetragrammaton, odẹ ofuafo Ọghẹnẹ, Jihova. * U te no eme gbe ibieme nọ e rrọ Uzi Ọghẹnẹ no, otu ikere-ebe gbe ahwo Farisi a rri “ẹmẹwẹ ubiẹme ovo evaọ Uzi na” ghaghae.

Jesu ọ ta nọ ukpenọ ẹme nọ ọ mae kawo evaọ Uzi na ọ rẹ seba erugba, kiyọ odhiwu gbe akpọ e rẹ vrẹ. Rekọ Ebaibol na ọ kẹ omai imuẹro inọ odhiwu gbe akpọ na e te jọ bẹdẹ bẹdẹ. (Olezi 78:69) Fikiere ẹme nana o dhesẹ nọ makọ oware nọ o mae kawo evaọ Uzi na u re rugba hrọ.

Kọ Jihova ọ rẹ daezọ eware nọ e maki tulo ho? Ee. Dai roro kpahe onana: Ọghẹnẹ o juzi kẹ emọ Izrẹl nọ a re wiri ugbonwa ovuọvo evaọ omogodẹ nọ a re ro ru Ehaa Ọnyavrẹ na vievie he. (Ọnyano 12:46) Ohwo ọ sai roro nọ uzi nana u te oware ovo ho. Kọ a gine wo otoriẹ oware nọ a gbe ro wiri ugbonwa omogodẹ na ovuọvo ho? Ẹsejọhọ a riẹ hẹ. Rekọ Jihova ọ riẹ nọ onana yọ eruẹaruẹ nọ i kie kpahe Mesaya na, inọ a ti wiri ugbonwa riẹ ovuọvo ho evaọ okenọ a ti kpei evaọ ure-oja na.​—Olezi 34:20; Jọn 19:​31-33, 36.

Kọ eme ma wuhrẹ no eme Jesu na ze? O rẹ sai mu omai ẹro inọ eyaa Jihova kpobi i ti rugba riẹriẹriẹ, ovuọvo u ti fiabọ kpo ho. Imuẹro nọ ubiẹme nọ o mae kawo evaọ Hibru o kẹ omai, u gbunu kẹhẹ!