A yẹ omẹ evaọ Ciudad Mante, okpẹwho nọ ọ rrọ wowoma evaọ Tamaulipas, Mexico. Ahwo ẹwho na a rrọ wowou, yọ a re ru ọghọ gaga. Rekọ itu ugbarugba e da okpẹwho na fia, fikiere ẹwho na ọ jọ yoyoma.

Mẹ họ ọmọ avivẹ evaọ usu emezae ene nọ ọsẹgboni mẹ a yẹ. Ọsẹgboni mẹ a họ omẹ ame evaọ ichọche Katọlik, uwhremu na me te kuomagbe ikuaya ichọche na. Mẹ jẹ daoma ru oware nọ o rẹ were Ọghẹnẹ keme mẹ gwọlọ nọ o gu omẹ ẹdhọ, je gbolo mẹ fihọ erae ehẹle he.

Okenọ mẹ jọ ikpe isoi ọsẹ mẹ ọ rọ dhẹ siọ omai ba. Oware nana o da omẹ ga te epanọ ofu o je ro dhe omẹ. Mẹ riẹ oware nọ o lẹliẹ e riẹ dhẹ siọ omai ba ha keme ma you rie gaga. Fikiere oni mẹ o te je ru iruo gaga re ọ sae rẹrote omai emezae ene na.

Fikinọ ọsẹ mẹ ọ gbẹ riẹ hẹ, yọ oni mẹ ọ rẹ kaki no iruo ze he, me te mu usu kugbe egbẹnyusu nọ e raha omẹ, yọ ẹsibuobu me re kpohọ isukulu hu. Egbẹnyusu mẹ na a wuhrẹ omẹ epanọ a re duwu iyei, vovo isigareti, thuji, jẹ họre. Fikinọ mẹ rẹ gwọlọ nọ ahwo a jọ otọ mẹ, me te wuhrẹ epanọ a rẹ bọwo ego, muabọ, jẹ fa ekareti, gbe epanọ a rẹ rehọ emegha gbe igbeke họre. Fikiere mẹ jọ uzoge nọ o je ru ozighi gaga. Fikinọ mẹ rẹ rọ igbeke họre gaga, ẹsibuobu a re kpe omẹ ukpe ẹsọ te epanọ a re ro roro nọ me whu no dede, kẹsena a vẹ nyase omẹ ba edhere. Yọ onana o rẹ lẹliẹ oni mẹ jọ ọkora gaga nọ ọ tẹ ruẹ omẹ evaọ edhere nọ mẹ rrọ otọ. Nọ ọ tẹ ruẹ omẹ, ọ vẹ wọ omẹ kpohọ ẹsipito.

Nọ mẹ jọ ikpe 16, ogbẹnyusu mẹ jọ nọ a re se Jorge o te weze ziọ uwou mai. Ọ vuẹ omai nọ ọyomariẹ yọ Osẹri Jihova, yọ ọ gwọlọ vuẹ omai oware jọ. Ọ tẹ rọ Ebaibol na ta kpahe eware nọ ọ rọwo kẹ omai. Fikinọ me ri se Ebaibol na ẹdẹvo ho, eva e were omẹ gaga nọ mẹ rọ riẹ odẹ Ọghẹnẹ gbe ẹjiroro riẹ. Jorge ọ tẹ ta nọ ọ gwọlọ wuhrẹ Ebaibol na kugbe omai. Ma tẹ ginẹ rọwo.

Eva e were omẹ gaga nọ mẹ riẹ uzẹme na kpahe erae ehẹle, inọ uwuhrẹ nana u  no Ebaibol ze he. (Olezi 146:4; Ọtausiuwoma Na 9:5) Nọ mẹ riẹ uzẹme na kpahe erae ehẹle no, ozọ Ọghẹnẹ u gbe je mu omẹ hẹ. Ukpoye, Ọghẹnẹ ọ tẹ jọ wọhọ ọsẹ oyoyou kẹ omẹ, ọnọ ọ gwọlọ ewoma emọ riẹ.

Nọ me bi wuhrẹ Ebaibol na haro na, mẹ tẹ ruẹ nọ u fo nọ me re ru inwene evaọ uzuazọ mẹ. O gwọlọ nọ me re wo omaurokpotọ jẹ siọ ozighi ba. Oria Ebaibol jọ nọ u fiobọhọ kẹ omẹ họ, obe 1 Ahwo Kọrint 15:33 nọ o ta nọ: “Usu uyoma o rẹ raha uruemu ezi.” Mẹ tẹ ruẹ vuhumu nọ mẹ tẹ ginẹ gwọlọ ru inwene evaọ uzuazọ mẹ, o gwọlọ nọ mẹ rẹ whaha ekpehre usu. Fikiere mẹ tẹ rehọ emamọ egbẹnyusu nọ e rrọ ukoko na nwene ekpehre egbẹnyusu nọ me wo vẹre, keme inievo ukoko na a rẹ rehọ izi Ebaibol ku ẹwhọ họ evaọ edhere udhedhẹ viukpenọ a rẹ họre hayo ru ozighi.

Oria Ebaibol ofa nọ u duobọte omẹ gaga họ, obe Ahwo Rom 12:​17-19 nọ o ta nọ: “Wha rọ eyoma hwosa eyoma kẹ ohwo ọvo ho. . . . O tẹ lọhọ, wha dawo ẹgba rai kpobi re wha lele ahwo kpobi rria dhedhẹ. . . .Wha kioja kẹ omobọ rai hi, . . . keme a kere nọ: ‘“Orukele ọmẹ; mẹ te hwa zihe,” ere Jihova ọ ta.’” Mẹ tẹ te ruẹ vuhumu nọ Jihova ọvo o ti gu ahwo nọ a bi kienyẹ amọfa ẹdhọ evaọ oke nọ o fihọ. Ẹmẹrera na mẹ tẹ te siọ ozighi ba.

Oware nọ o via kẹ omẹ evaọ owọwọ ẹdẹjọ nọ me je kpo o rẹ thọrọ omẹ ẹro vievie he. Utu izoge jọ nọ i re ru ozighi a te kru omẹ evaọ edhere, kẹsena osu rai ọ tẹ rọ abọ fa omẹ, jẹ va ku omẹ nọ, “Kpọ obọ!” Mẹ tẹ nwane lẹ se Jihova re o fiobọhọ kẹ omẹ thihakọ. Dede nọ oma o jẹ wọ omẹ nọ me ru ei kele, mẹ sae nyẹ omamẹ, kẹsena mẹ tẹ nyavrẹ dhedhẹ. Okiokiọ riẹ, mẹ tẹ wariẹ ruẹ osu utu na ọvo evaọ oria jọ. Oma o tẹ jẹ wariẹ wọ omẹ nọ me dhesẹ akpọ kẹe, rekọ mẹ tẹ wariẹ lẹ se Jihova nọ o fiobọhọ kẹ omẹ kpọ ofu mẹ. Oware nọ o via u gbe omẹ unu, keme uzoge na ọ nyabru omẹ ze, ọ tẹ ta nọ: “Ivie rọvrẹ omẹ fiki oware nọ me ru owhẹ evaọ owọwọ odẹ na. Uzẹme riẹ họ, mẹ gwọlọ jọ wọhọ owhẹ, mẹ gwọlọ wuhrẹ Ebaibol na.” Eva e were omẹ gaga inọ mẹ sae kpọ ofu mẹ. No umuo ẹdẹ yena vrẹ, me te je wuhrẹ Ebaibol na kugbei.

Dede nọ mai uviuwou na soso ma je wuhrẹ Ebaibol na evaọ oke ọsosuọ, uwhremu na a tẹ te seba. Ghele na, mẹ gba riẹ mu nọ me re wuhrẹ Ebaibol na makọ oware kpobi nọ u re noi ze kẹhẹ. Mẹ riẹ nọ me te bi kuomagbe inievo ukoko na ẹsikpobi, u ti fiobọhọ ru edada nọ e rrọ omẹ udu kpotọ, yọ a te jọ wọhọ uviuwou kẹ omẹ. Nọ me wuhrẹ Ebaibol na te oria jọ, evaọ ukpe 1991, mẹ tẹ họ-ame je zihe ruọ Osẹri Jihova.

Ofu ọ jẹ hai dhe omẹ, mẹ jẹ hae gwọlọ nọ ahwo a jọ otọ mẹ, yọ mẹ jẹ hai ru ozighi gaga. Rekọ Ẹme Ọghẹnẹ o nwene uzuazọ mẹ riẹriẹriẹ. Enẹna mẹ be ta usiuwoma kẹ oghẹrẹ ahwo kpobi kpahe ovuẹ Ebaibol na. Anwọ ikpe 23 nọ e vrẹe na, mẹ be rọ rehọ oke mẹ kpobi ta usiuwoma kpahe Uvie Ọghẹnẹ.

Evaọ oke jọ, me je ru iruo evaọ uwou ogha Isẹri Jihova nọ o rrọ Mexico, yọ iruo nana iruo unevaze. Evaọ etẹe, mẹ jọ ruẹ aye mẹ nọ a re se Claudia, kẹsena ma tẹ rọo evaọ ukpe 1999. Eva e were omẹ gaga inọ Jihova ọ rọ emamọ aye nana ghale omẹ!

Ukoko ẹvẹrẹ obọ rọ t’ẹme evaọ Mexico ma jọ evaọ oke jọ, je fiobọhọ kẹ ahwo nọ a di ezọ wuhrẹ kpahe Jihova. Uwhremu na a te zizie omai kpohọ orẹwho Belize nyae ta usiuwoma. Dede nọ ma wo eware bu hu, eva e be were omai, keme Jihova ọ be kẹ omai eware kpobi nọ ma gwọlọ. Uzuazọ nana o mai woma kpaobọ.

Nọ oke o be nyaharo na, oni mẹ ọ tẹ wariẹ mu Ebaibol na họ ewuhrẹ jẹ họ-ame. Enẹna oniọvo ọkpako mẹ, aye riẹ, gbe emọ rai a zihe ruọ Isẹri Jihova no re. Egbẹnyusu jọ nọ mẹ jẹ hae ta usiuwoma kẹ, a zihe ruọ Isẹri Jihova no re.

Rekọ o da omẹ gaga kẹ ahwo uviuwou mẹ jọ, keme a whu fikinọ a siọ uzuazọ ozighi nọ a je yeri ba ha. Me gbe nwene uzuazọ mẹ hẹ, ẹsejọhọ enẹ yọ me whu no re. Me yere Jihova gaga inọ o si omẹ kẹle oma gbe ukoko riẹ, ọnọ o wuhrẹ omẹ odiri, uwowou, gbe epanọ a re fi izi Ebaibol họ iruo evaọ uzuazọ.