A yẹ omẹ evaọ iwhre jọ nọ e jọ ubrotọ Saxony, evaọ orẹwho nọ a je se German Democratic Republic (GDR). Evawere gbe uyoyou e jọ uviuwou mai, yọ ọsẹgboni mẹ a wuhrẹ omẹ epanọ mẹ sae rọ jọ emamọ ọmọ. Oke yena yọ German Democratic Republic ọ jọ otọ esuo-ọrekugbe nọ egọmeti ọ rẹ jọ ghale eware kpobi ẹrẹrẹe, fikiere ahwo buobu evaọ ubrotọ Saxony a se egagọ gboja ha. Rọkẹ omẹ, mẹ rọwo nọ Ọghẹnẹ ọ rrọ họ. Bẹsenọ mẹ rọ kpako te ikpe 18, eware ivẹ jọ nọ i kpomahọ uzuazọ mẹ gaga họ esuo-ọrekugbe orẹwho na, gbe orọwọ inọ Ọghẹnẹ ọ rrọ họ.

Fikieme esuo-ọrekugbe na ọ rọ were omẹ tere? Keme mẹ rọwo nọ ahwo kpobi a rrọ ẹrẹrẹe. Ofariẹ, mẹ rọwo nọ a tẹ be hae ghale eware kẹ ahwo kpobi ẹrẹrẹe, u ti ru nọ ohwo ọvo o gbe ti fe hrọ hayo yogbe ga hrọ họ. Fikiere me te kuomagbe utu izoge jọ nọ e rẹ họre kẹ esuo-ọrekugbe. Nọ mẹ jọ ikpe 14, me te je ru iruo kugbe utu ahwo nọ a re ru okegbe fo. Evaọ iruo na, ma re koko ebe nọ ahwo a gbolo kufiẹ họ, ma vẹ rehọ ae ru eware efa. Iruo nọ me je ru na e were ahwo nọ a jẹ rria ẹwho jọ nọ a re se Aue gaga, fikiere isu ẹwho na a tẹ kẹ omẹ okẹ jọ. Dede nọ mẹ gbẹ maha oke yena, me mu usu kugbe ahwo jọ nọ a viodẹ evaọ esuo-ọrekugbe German Democratic Republic na. Me je roro nọ omamọ oware mẹ jẹ obọ kru na, gbe nọ akpọ o ti woma kẹ omẹ.

Idudhe na, eware i te nwene. Evaọ ukpe 1989 a kporo ugbẹhẹ Berlin nọ o hẹriẹ orẹwho Germany fihọ otọ, onana u te ru nọ esuo-ọrekugbe German Democratic Republic na o ro kie. Eware buobu i te muhọ ẹvia unọjọ utọjọ. U kri hi, me te muẹrohọ nọ okienyẹ ọ jọ otọ esuo-ọrekugbe na. Wọhọ oriruo, a je ru ahwo nọ a rọwokugbe esuo-ọrekugbe na ha gaga. Ẹvẹ a je ro ru ai ere? Kọ mai enọ e jọ otọ esuo-ọrekugbe na, ma gbẹ rọwo inọ ahwo kpobi a rrọ ẹrẹrẹe? Kọ a faki se esuo na esuo-ọrekugbe? Iroro e tẹ gba dhe omẹ udu.

Fikiere me te nwene utee mẹ evaọ uzuazọ, me te mu ile họ ekporo je mu eware họ ẹdrọ. Me kpohọ isukulu nọ a rẹ jọ wuhrẹ ile-ikporo, yọ mẹ jẹ gwọlọ nọ me re gbe wuhrẹ haro evaọ yunivasiti. Me je rẹro nọ mẹ te jọ ọgba ile-ikporo gbe ọnọ ọ rẹ drọ eware. Ofariẹ, me te gbabọkẹ eware nọ ọsẹgboni mẹ a wuhrẹ omẹ nọ mẹ jọ ọmaha. Oware nọ o mae jọ omẹ oja họ epanọ mẹ rẹ rọ reakpọ kuoma, fikiere me je lele emetẹ sa-sa evaọ oke ovona. Rekọ ile-ikporo, eware nọ mẹ jẹ drọ, gbe uzuazọ odode nọ me je yeri, e kẹ omẹ evawere he, ukpoye mẹ jẹ ruawa kpahe obaro.  Makọ iwoho nọ mẹ jẹ hae drọ na dede i dhesẹ nọ ozọ u bi mu omẹ. Mẹ jẹ hae nọ omamẹ nọ, ‘Ẹvẹ akpọ mẹ ọ te jọ evaọ obaro? Kọ eme họ ẹjiroro uzuazọ?’

U gbe omẹ unu gaga nọ mẹ ruẹ iyo enọ na uwhremu na. Owọwọ ẹdẹjọ nọ ma jọ obọ isukulu, mẹ avọ ibe emọ isukulu mẹ jọ ma tẹ jẹ ta kpahe obaro na. Ọmọtẹ jọ nọ a re se Mandy * nọ ọ rrọ Osẹri Jihova ọ jariẹ re. Owọwọ yena, Mandy o te fiobọhọ kẹ omẹ riẹ oware nọ me re ru. Ọ ta kẹ omẹ nọ: “Andreas, whọ tẹ gwọlọ riẹ iyo enọ nọ whọ be nọ kpahe uzuazọ gbe obaro na, romatotọ wuhrẹ Ebaibol na.”

Avro ọ jọ omẹ udu, rekọ fikinọ mẹ gwọlọ ginẹ riẹ iyo enọ na, mẹ tẹ jiroro nọ me re se Ebaibol na. Mandy ọ tẹ vuẹ omẹ nọ me se obe Daniẹl izou 2, yọ oware nọ mẹ jọ etẹe se u gbe omẹ unu gaga. Eruẹaruẹ nọ me se kpahe evaọ etẹe e ta kpahe egọmeti sa-sa nọ i ti su unọjọ utọjọ, enọ i ti kpomahọ akpọ nana makọ rite inẹnẹ. Mandy o dhesẹ eruẹaruẹ efa kẹ omẹ evaọ Ebaibol na, enọ e ta kpahe obaro na. Whaọ enẹna, me mu iyo enọ mẹ na họ ẹruẹ no! Rekọ ono o kere eruẹaruẹ yena? Kọ ono ọ rẹ sae ta eware nọ e te via evaọ obaro gbagba ere? Kọ o sae jọnọ Ọghẹnẹ ọ ginẹ rrọ?

Mandy o te dhesẹ omẹ kẹ Horst avọ Angelika, ọzae-avọ-aye jọ nọ a rrọ Isẹri Jihova, a te je wuhrẹ Ebaibol na kugbe omẹ. O raha oke he, me te muẹrohọ nọ Isẹri Jihova ọvo họ egagọ nọ e rẹ rehọ odẹ Ọghẹnẹ ru iruo ẹsikpobi, je wuhrẹ amọfa kpahe odẹ na, Jihova. (Olezi 83:18; Matiu 6:9) Mẹ jọ Ebaibol na wuhrẹ nọ Jihova ọ kẹ ahwo-akpọ ẹruore nọ a sae rọ rria bẹdẹ bẹdẹ evaọ aparadase otọakpọ. Olezi 37:9 ọ ta nọ: “Enọ e be hẹrẹ ỌNOWO kpobi, a rẹ te rehọ otọ na reuku.” Eva e were omẹ gaga nọ mẹ riẹ nọ eyaa nana e rrọ kẹ ahwo kpobi nọ a be daoma yeri uzuazọ rai rọwokugbe izi Ọghẹnẹ nọ e rrọ Ebaibol na.

Dede na, o jọ bẹbẹ kẹ omẹ gaga re me nwene uruemu mẹ, je yeri uzuazọ nọ o rọwokugbe izi Ọghẹnẹ. Fikinọ mẹ viodẹ evaọ ile-ikporo gbe eware nọ mẹ jẹ drọ, mẹ jẹ hai fu uke. Fikiere o tẹ gwọlọ nọ me re wuhrẹ omaurokpotọ. U te no ere no, o jọ bẹbẹ kẹ omẹ re me siobọno uzuazọ ọfariẹ nọ me je yeri na. Eva e were omẹ nọ Jihova ọ rẹ re-ohrọ je wo odiri kẹ ahwo kpobi nọ a be daoma re a ru lele izi Ebaibol na, yọ o re dhesẹ ororokẹ kẹ ae!

Eware nọ e jẹ kpọ uzuazọ mẹ bẹsenọ me ro te ikpe 18 họ, esuo-ọrekugbe orẹwho na gbe orọwọ nọ me wo inọ Ọghẹnẹ ọ rrọ họ. Anwọ oke yena ze, Ebaibol na o bi fiobọhọ kẹ omẹ nwene uzuazọ mẹ. Oware nọ mẹ jọ Ebaibol na wuhrẹ u ru nọ mẹ gbẹ be rọ ruawa kpahe obaro ho. Me bi yeri emamọ uzuazọ enẹna je wo ẹruore kpahe obaro. Evaọ ukpe 1993, mẹ tẹ họ-ame evaọ ukoko Isẹri Jihova, yọ evaọ ukpe 2000, mẹ avọ Tabitha nọ ọ rrọ Osẹri Jihova re ma tẹ ruọ orọo. Mẹ avọ aye mẹ ma rẹ raha oke ziezi ta usiuwoma je wuhrẹ amọfa Ebaibol na. Ahwo buobu nọ ma rẹ ta usiuwoma kẹ yọ ahwo nọ a roma kẹ esuo-ọrekugbe, jẹ rọwo inọ Ọghẹnẹ ọ rrọ họ wọhọ epanọ me je ru vẹre. Eva e rẹ were omẹ gaga nọ me te bi wuhrẹ ai kpahe Jihova.

Evaọ oke ọsosuọ nọ me je kuomagbe Isẹri Jihova, eva e jẹ dha ọsẹgboni mẹ gaga. Rekọ anwọ oke yena ze, a ruẹ oghẹrẹ nọ uzuazọ mẹ u ro nwene no. Eva e were omẹ gaga inọ enẹna, a bi se Ebaibol na jẹ be hai kpohọ iwuhrẹ Isẹri Jihova.

Eva e be were omẹ avọ aye mẹ gaga yọ orọo mai o rrọ ziezi, keme ma bi fi ehrẹ Ebaibol na họ iruo evaọ orọo mai. Wọhọ oriruo, fikinọ ma be nya lele ohrẹ Ebaibol nọ o ta nọ ma zue ehwa orọo mai hi, u ru nọ orọo mai o rọ rrọ gaga.​—Ahwo Hibru 13:4.

Ozọ u gbe bi mu omẹ hẹ yọ mẹ gbẹ be ruawa kpahe obaro ho. Enẹna mẹ rrọ usu uviuwou akpọ soso nọ a wo orọwọ ovona, yọ ma be reawere uvi udhedhẹ gbe okugbe. Evaọ uviuwou nana, ma rri omamai nọ ma rrọ ẹrẹrẹe, yọ ere ma bi yerikugbe ohwohwo. Oye họ oware nọ mẹ rọwo notọ avọ otọ ze, yọ oye mẹ jẹ gwọlọ le tobọ.