Ọzae-avọ-aye jọ nọ a re se Don gbe Margaret * a wo ọmọtẹ jọ nọ o wo ọzae je yẹ emọ no. Ẹdẹjọ ọmọtẹ rai na avọ uviuwou riẹ a te weze bru ai ze, yọ a reawere iweze na gaga. Margaret ọ jẹ hae ruiruo emu-othere vẹre, fikiere taure emọ riẹ a tẹ te ruọ edhere, o te there macaroni avọ cheese, emu nọ ọ rẹ were iruọmọ riẹ gaga re aikpobi a re kugbe.

Nọ ahwo uviuwou na kpobi a keria no, Margaret ọ tẹ wọ emu nọ o there na fihọ ehru emẹjẹ nọ aikpobi a keria wariẹ họ na. Nọ ọ nwani rovie emu na, akpọ o te gbei unu keme oware nọ o rrọ omodhe na kpobi họ cheese. O thọrọ Margaret ẹro re o fi macaroni nọ a rẹ rọ re cheese na họ iẹe! *

Makọ unuikpe nọ ma rrọ hayo epanọ ma riẹ oware eru te kẹhẹ, eware e sae thọ omai kpobi obọ. O sae jọ nọ ma ru oware jọ evaọ okenọ u kiehọ họ, ẹme nọ ma roro te he, oware jọ nọ ma rri vo, hayo oware nọ o thọrọ omai ẹro. Fikieme eware e rẹ rọ thọ omai obọ? Eme ma re ru nọ oware o tẹ thọ omai obọ? Kọ ma sae whaha ethobọ? Joma ta kpahe epanọ u fo nọ ma re rri ethobọ, onọ u ti fiobọhọ kẹ omai kẹ iyo enọ yena.

Nọ ahwo a te jiri omai fiki oware jọ nọ ma riẹ ru, eva e rẹ were omai gaga. Rekọ nọ ma te ru oware jọ thọ, o tẹ make rọnọ ethobọ gheghe hayo oware nọ amọfa a riẹ kpahe he, kọ ma te rọwo nọ oware na o ginẹ thọ omai obọ, manikọ ma ti gu ei no uzou? O gwọlọ omaurokpotọ re ma sae rọwo iruthọ mai.

Ma tẹ be hai roro nọ ma woma vi amọfa, o te whae ze nọ ma ti ro rri iruthọ mai vo, gu ei no uzou, hayo tubẹ gbenu dede. Uruemu utioye na o rẹ wha ẹbẹbẹ se omai. Yọ ẹbẹbẹ na ọ rẹ sai kaki kuhọ họ, ma ve ti mu amọfa họ ẹfo gheghe gheghe. Ma tẹ maki gu oware nọ ma ruthọ no uzou, hayo ẹbẹbẹ ọ gbẹ maki noi ze okioke yena ha, u fo nọ ma kareghẹhọ nọ “mai omomọvo o ti gu ẹkẹ-unu riẹ kẹ Ọghẹnẹ.”​—Ahwo Rom 14:12.

Ọghẹnẹ o wo eriwo owowa kpahe ethobọ. Ebaibol na o dhesẹ Ọghẹnẹ evaọ obe Olezi inọ, “ọ vọ avọ ohrọ gbe aruoriwo,” yọ ọ rẹ gwọlọ iruthọ evaọ obọ mai hi, hayo “muofu riẹ bẹdẹ hẹ.” Ọghẹnẹ ọ riẹ nọ mai ahwo-akpọ ma gba ha, yọ ọ riẹ elọhoma mai, jẹ “be kareghẹhọ nọ mai ẹkpẹ gheghe.”​—Olezi 103:​8, 9, 14.

Ofariẹ, wọhọ ọsẹ oyoyou, Ọghẹnẹ ọ gwọlọ nọ mai emọ riẹ ma rri ethobọ wọhọ epanọ o bi rri rai. (Olezi 130:3) Jihova ọ kẹ omai ehrẹ buobu evaọ Ebaibol na, enọ i re fiobọhọ kẹ omai riẹ oware nọ ma re ru kpahe ethobọ mai gbe erọ amọfa.

Ẹsibuobu nọ ahwo a te ru oware thọ, a rẹ raha oke roro kpahe epanọ a re ro gu ei no uzou, hayo gwọlọ ohwo nọ a re gu ei fihọ uzou. Ukpenọ ma ru ere, nọ ma te ru omọfa thọ, u fo nọ ma re wou unu, kpọ eware vi, jẹ ruẹrẹhọ kugbe ohwo na. Kọ who ru oware jọ thọ no ẹdẹjọ nọ o kẹ owhẹ uye gaga,  hayo nọ o kẹ omọfa uye no? Ukpenọ who rri omara nọ who fioka ha, hayo fo amọfa, kọ whọ gbẹ daoma re whọ kpọ eware vi? Ma te gu ei no uzou hayo gu ei fihọ amọfa uzou, ẹbẹbẹ na o re si otọ jẹ tubẹ ga viere, yọ ẹme na o re kuhọ họ. Ukpoye, kpọ eware vi, wuhrẹ noi ze, jẹ kpairoro vrẹ.

Nọ oware o tẹ thọ omọfa obọ, o rẹ vẹrẹ omai obọ gaga re ma fo ohwo na. Rekọ u fo nọ ma re ru lele ohrẹ nọ Jesu ọ kẹ inọ: “Eware kpobi nọ wha gwọlọ nọ ahwo a ru kẹ owhai, wha ru ere kẹ ae re.” (Matiu 7:12) Nọ oware o tẹ thọ owhẹ obọ, o tẹ make rọnọ u tulo ho, ababọ avro whọ te gwọlọ nọ amọfa a wo ororokẹ kẹ owhẹ, hayo tubẹ kpairoro vrẹ oware nọ who ru na. Kọ u gbe fo re who ru epọvo na kẹ amọfa re?​—Ahwo Ẹfisọs 4:32.

Obe ofeme jọ o ta nọ ohwo o re ru oware thọ fikinọ “o rri oware jọ mu hu, ọ riẹ kpahe oware jọ tere he, hayo fikinọ iroro riẹ e jọ oware nọ o je ru hu.” Uzẹme riẹ họ, eware nọ obe na o fodẹ na e rẹ via kẹ ohwo kpobi. O make rrọ ere na, ma sae whaha iruthọ jọ nọ ma te fi ehrẹ Ebaibol nọ ma te ta kpahe na họ iruo.

Ma rẹ jọ evaọ obe Itẹ 18:13 ruẹ ohrẹ jọ. Ebaibol na ọ jọ etẹe ta nọ: “Ọnọ o ri yo ẹme he ọ vẹ kẹ uyo, yọ ugheghẹ gbe omovuọ obọ riẹ.” Uzẹme, ohwo ọ tẹ romatotọ gaviezọ kẹ ẹme je roro ziezi kpahe ẹme nọ ọ te ta, onana u re fiobọhọ kẹe nọ ọ gbẹ rọ rehọ okpakpa kpahe ẹme ọgaga ha. Ohwo ọ tẹ ginẹ gaviezọ ziezi je wo otoriẹ ẹme nọ a ta kẹe, o re rri eware mu jẹ whaha iruthọ jọ.

Ohrẹ Ebaibol ofa jọ o ta na: “O tẹ lọhọ, wha dawo ẹgba rai kpobi re wha lele ahwo kpobi rria dhedhẹ.” (Ahwo Rom 12:18) Daoma re who ru udhedhẹ kugbe ahwo kpobi. Who te bi ruiruo kugbe amọfa, wo ororokẹ gbe adhẹẹ kẹ ai, hae daoma jiri ai jẹ tuduhọ ai awọ. Nọ udhedhẹ gbe okugbe avọ evawere e tẹ rrọ udevie ahwo nọ a bi ruiruo kugbe, o rẹ lọhọ re a rọvrẹ ohwohwo nọ ohwo jọ ọ tẹ ta ẹme hayo ru oware jọ thọ, yọ a sae ku ebẹbẹ họ dhedhẹ.

Daoma wuhrẹ oware jọ no ethobọ ra ze. Ukpenọ who re gu inoma, hayo gwọlọ ohwo nọ who re gu ei fihọ uzou, roro kpahe oware nọ whọ rẹ sai wuhrẹ no ethobọ ra ze. Ẹsejọhọ o gbẹ gwọlọ nọ who re dhesẹ iruemu wọhọ odiri, uwowou, oma-onyẹ, ẹwolẹ, udhedhẹ, gbe uyoyou. (Ahwo Galesha 5:​22, 23) Ohwo o te wuhrẹ no iruthọ riẹ ze je wo iruemu nana, ọ te riẹ oware nọ u fo nọ o re ru oke ọfa nọ oware utioye o tẹ gwọlọ via. Dede nọ ma re rri iruthọ mai vo ho, u fo re ma hai roro kpahe ai kẹdẹ kẹdẹ hẹ. Ahwo a tẹ be hwẹ omai fiki ethobọ jọ, ma sai lele ai hwẹ ukpenọ ma re muofu.

Ma te wo eriwo owowa kpahe ethobọ mai, u ti fiobọhọ kẹ omai riẹ oware nọ ma re ru nọ o tẹ via. Ma ti wo ufuoma iroro, jẹ rria dhedhẹ kugbe amọfa. Ma tẹ daoma wuhrẹ no ethobọ mai ze, ma ti wo areghẹ yọ eva mai e te were amọfa. Udu u ti brukpe omai gahrọ họ, yọ ma te whaha iroro me fioka ha. Ma tẹ kareghẹhọ nọ eware e rẹ thọ amọfa obọ yọ o rẹ kẹ ae uye, u ti fiobọhọ kẹ omai si kẹle ai. Maero na, ma ti wo erere ziezi nọ ma tẹ be hae rọ aro kele uyoyou Ọghẹnẹ, jẹ rọvrẹ amọfa no eva ze.​—Ahwo Kọlọsi 3:13.

Kọ ethobọ Margaret nọ ma fodẹ evaọ obọ emuhọ na, o wha ẹwhọ fihọ uviuwou riẹ? Vievie! Ahwo na kpobi a rọ oware nọ o via na ru emiehwẹ, makọ Margaret dede, yọ a re emu na avọ evawere ababọ macaroni na! Evaọ ikpe buobu nọ i lele i rie, iruọmọ ivẹ Margaret na a gbiku oware nọ o via na kẹ emọ rai, jẹ kareghẹhọ epanọ eva e jẹ hae were ai te nọ a tẹ rrọ kugbe ọsẹ gbe oni ologbo rai. A rri oware nọ o via na wọhọ ethobọ gheghe!