Ahwo buobu evaọ akpọ na soso a rọwo nọ Kresimesi yọ ehaa ẹdẹ-eyẹ Jesu. Kọ who roro nọ Ileleikristi ikpe-udhusoi ọsosuọ nọ e mae kẹle oke Jesu a ru Kresimesi? Kọ whọ riẹ oware nọ Ebaibol na ọ ta kpahe ehaa ẹdẹ-eyẹ? Ma tẹ riẹ uyo enọ nana, u ti fiobọhọ kẹ omai riẹ sọ Kresimesi yọ ehaa Ileleikristi.

Ma rẹ jọ Ebaibol na se ku oria ovo nọ o ta nọ Jesu o ru ehaa ẹdẹ-eyẹ hẹ, yọ odibo Ọghẹnẹ ọvuọvo evaọ oke anwae o ru ehaa ẹdẹ-eyẹ gbe he. Imava ọvo Ebaibol na ọ ta nọ a ru ehaa ẹdẹ-eyẹ rai. Imava na a jẹ gọ Jihova ha, yọ a ru oware nọ u yoma gaga evaọ okenọ a je ru ehaa ẹdẹ-eyẹ rai na. (Emuhọ 40:20; Mak 6:21) Obe ofeme nọ a re se Encyclopædia Britannica o ta nọ Ileleikristi ikpe-udhusoi ọsosuọ a mukpahe “ehaa ẹdẹ-eyẹ keme yọ ehaa egedhọ.”

Orọ ọsosuọ, Ebaibol na ọ fodẹ uzedhe ẹdẹ nọ a ro yẹ Jesu hu. Obe ofeme nọ a re se McClintock and Strong’s Cyclopedia o ta nọ: “A rẹ ruẹ ẹdẹ nọ a ro yẹ Jesu evaọ Ọvọ Okpokpọ na hayo evaọ oria ofa vievie he.” Avro ọ riẹ hẹ, o hae jọnọ Jesu ọ gwọlọ nọ ilele riẹ a ru ehaa ẹdẹ-eyẹ riẹ, ọ hae te vuẹ ae ẹdẹ nọ a ro yẹi.

Orọ avivẹ, Ebaibol na ọ ta nọ Jesu hayo ilele riẹ a ru Kresimesi hi. Wọhọ epanọ obe ofeme nọ a re se New Catholic Encyclopedia o ta, oria ọsosuọ nọ a jọ fodẹ nọ a ru Kresimesi họ “obe ukeledẹ Ahwo Rom nọ ọzae jọ nọ a re se Philocalus o kere, evaọ oware wọhọ ukpe 336 [C.E.].” Onana u dhesẹ nọ okenọ ahwo a ro mu Kresimesi họ eru yọ a kere Ebaibol na re kri no, yọ ikpe buobu e vrẹ no nọ Jesu o ro no otọakpọ. Fikiere, obe ofeme McClintock and Strong’s Cyclopedia na o tẹ ta nọ: “Obọ Ọghẹnẹ ehaa Kresimesi i no ze he, yọ whọ rẹ jọ Ọvọ Ọkpokpọ na ruẹ oware utioye gbe he.” *

Jesu Owuhrẹ Ologbo na ọ vuẹ ilele riẹ eware nọ ọ gwọlọ nọ a ru, yọ a kere i rai fihọ Ebaibol na. Rekọ ehaa Kresimesi ọ rrọ usu eware nọ ọ ta kẹ ae nọ a ru hu. Wọhọ epanọ iticha ọ rẹ gwọlọ nọ emọ nọ o bi wuhrẹ a rẹ lavrẹ uzi nọ ọ kẹ rai ha na, ere Jesu ọ gwọlọ nọ ilele riẹ a re “ru vrẹ eware nọ a kere” fihọ Ikereakere Efuafo na ha.​—1 Ahwo Kọrint 4:6.

Evaọ abọdekọ riẹ, u wo ekareghẹhọ jọ nọ u wuzou gaga nọ Ileleikristi ikpe-udhusoi ọsosuọ na a je ru, oye họ Ekareghẹhọ uwhu Jesu. Jesu ọvo ọ rọ unu riẹ ta kẹ ilele riẹ nọ a hae kareghẹhọ uwhu riẹ, o te je dhesẹ epanọ a re ru ei kẹ ai. Ekpọvio kpahe epanọ a re ru ekareghẹhọ na, gbe uzedhe ẹdẹ nọ a re ro ru ei e rrọ evaọ Ebaibol na.​—Luk 22:19; 1 Ahwo Kọrint 11:25.

O rrọ vevẹ inọ Kresimesi yọ ehaa ẹdẹ-eyẹ, yọ Ileleikristi ikpe-udhusoi ọsosuọ a ru ehaa egedhọ nana ha. U te no ere no, whọ rẹ jọ Ebaibol na se ku oria ovo nọ o ta nọ Jesu hayo omọfa jọ o ru Kresimesi hi. Onana u ru nọ Ileleikristi buobu evaọ akpọ na soso a rọ ruẹ vuhumu nọ Kresimesi yọ ehaa nọ ae omarai a re ru hu.