“Okẹ uwoma kpobi gbe okẹ ogbagba kpobi obọ ehru u re no ze, obọ Ọsẹ elo na.” (Jemis 1:17) Oria ikere yena u dhesẹ nọ Jihova Ọsẹ obọ odhiwu mai na yọ ọkokẹ ologbo. Ghele na, evaọ usu ekẹ iwoma kpobi nọ Ọghẹnẹ ọ kẹ omai no, ọvo jọ ọ riẹ nọ ọ mae rro kpaobọ. Okẹ vẹ ye? Jesu ọ ta evaọ obe Jọn 3:16 inọ: “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”

Ababọ avro, Ọmọ ọvo riẹ nọ Ọghẹnẹ ọ rọ kẹ omai na họ okẹ nọ o mai woma kpaobọ nọ a kẹ omai no, keme ẹkwoma riẹ Ọghẹnẹ ọ rọ ta omai no igbo uzioraha, owho gbe uwhu. (Olezi 51:5; Jọn 8:34) Makọ epanọ ma daoma te kẹhẹ, mai ọvo ma sae ta omamai no igbo uzioraha gbe uwhu hu. Rekọ fikinọ Ọghẹnẹ o you omai gaga, ọ tẹ kẹ omai oware nọ ma gwọlọ re ma sai no otọ igbo yena. Jihova ọ ta omai no igbo ẹkwoma Ọmọ ọvo riẹ nọ o siobọno kẹ omai. Ọruẹrẹfihotọ ẹtanigbo na u rovie uvẹ kẹ ahwo-akpọ nọ a yoẹme kpobi re a wo uzuazọ ebẹdẹ bẹdẹ. Rekọ eme họ ẹtanigbo? Fikieme ma rọ gwọlọ iẹe? Didi erere ma re wo noi ze?

Ẹtanigbo yọ osa nọ a hwa rọ dẹ oware nọ u vru zihe ze, hayo osa nọ a hwa re a sai siobọno ohwo nọ a mu. Ebaibol na ọ ta nọ Ọghẹnẹ ọ ma ọsẹgboni ọsosuọ mai Adamu avọ Ivi gbagba, re a rria bẹdẹ bẹdẹ kugbe emọ nọ a ti yẹ. (Emuhọ 1:​26-28) U yoma kẹhẹ inọ Adamu avọ Ivi a ghẹmeeyo kẹ Ọghẹnẹ, a te ku uvẹ nana fiẹ je zihe ruọ erahaizi. Eme aghẹmeeyo rai o wha ze? Ebaibol na ọ ta nọ: “Uzioraha o rọ ẹkwoma omọvo ruọ akpọ na, uwhu u je no uzioraha ze . . . , ere uwhu u ro te ahwo kpobi oma keme aikpobi a raha uzi no.” (Ahwo Rom 5:12) Ukpenọ Adamu ọ rẹ nyasiọ ukuoriọ uzuazọ ogbagba ba kẹ emọ riẹ, kọ uzioraha gbe uwhu ọ nyase ba kẹ ae.

Nọ orọnọ ẹtanigbo yọ osa nọ a hwa na, osa na o rẹ jọ ẹrẹrẹe kugbe oware nọ u vru na. Nọ Adamu o keke aro fihọ ghẹmeeyo kẹ Ọghẹnẹ no, o te zihe ruọ ọrahauzi, ọ tẹ rọ enẹ ku uzuazọ ogbagba riẹ fiẹ. Wọhọ epanọ Ebaibol na ọ ta, enẹ Adamu ọ rọ zẹ emọ riẹ kpobi kpohọ igbo uzioraha gbe uwhu. Fikiere o te gwọlọ uzuazọ ogbagba omọfa re emọ Adamu a sai no igbo uzioraha gbe uwhu. Oyejabọ nọ Jesu ọ jẹ rọ uzuazọ ogbagba riẹ dhe idhe. (Ahwo Rom 5:19; Ahwo Ẹfẹsọs 1:7) Fiki uyoyou nọ Ọghẹnẹ o wo kẹ omai ọ rọ hwosa ẹtanigbo na, re ahwo-akpọ a sae reawere uzuazọ ebẹdẹ bẹdẹ nọ Adamu avọ Ivi a kufiẹ na.​—Eviavia 21:​3-5.

Nọ ma te roro kpahe oware nọ ẹtanigbo na u ru kẹ omai, avro ọ riẹ vievie he inọ okẹ Ọghẹnẹ nana nọ u ru uzuazọ ebẹdẹ bẹdẹ lọhọ na họ okẹ nọ o mai woma kpaobọ. Re ma ginẹ ruẹ vevẹ nọ “okẹ ogbagba” nana họ okẹ nọ o mai woma kpaobọ, joma ta kpahe epanọ okẹ na u ro ru eware nọ ma fodẹ evaọ uzoẹme nọ o vrẹ na gba, enọ i re fiobọhọ kẹ omai riẹ okẹ nọ o mai woma kpaobọ.

Okẹ na u ru isiuru mai gba. O rrọ isiuru mai ahwo-akpọ re ma rria bẹdẹ bẹdẹ. (Ọtausiuwoma Na 3:11) Rekọ mai ọvo ma sai ru isiuru nana gba ha, ẹtanigbo na họ oware nọ u ru rie lọhọ nọ ma te sae rọ rria bẹdẹ bẹdẹ. Ebaibol na ọ ta nọ: “Keme uwhu  họ osohwa uzioraha, rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.”​—Ahwo Rom 6:23.

Okẹ na u ru ẹgwọlọ mai gba. Ohwo-akpọ ọvo ọ sae ta omai no igbo ho. Ebaibol na ọ ta nọ: “Uzẹme ohwo ọ sae ta omaobọ riẹ hẹ, hayo hwaosa uzuazọ riẹ kẹ Ọghẹnẹ hẹ, keme ẹta uzuazọ riẹ o rẹ ghaghae, o re te he.” (Olezi 49:8) Fikiere, ma gwọlọ obufihọ Ọghẹnẹ re ma sai no igbo uzioraha gbe uwhu. Ọghẹnẹ o gine ru ẹgwọlọ mai nana gba “ẹkwoma osa ẹtanigbo nọ Kristi Jesu ọ hwa ro si [omai] no igbo.”​—Ahwo Rom 3:​23, 24.

Ọghẹnẹ ọ kẹ okẹ na evaọ ẹruoke. Ebaibol ọ ta kẹ omai nọ: “Nọ ma gbẹ jọ erahaizi, Kristi o [te] whu kẹ omai.” (Ahwo Rom 5:8) Fikinọ Ọghẹnẹ ọ kẹ omai okẹ ẹtanigbo na “nọ ma gbẹ jọ erahaizi,” u dhesẹ nọ o you omai makọ okenọ ma gbẹ jọ erahaizi. Dede nọ ma gbẹ be ruẹ uye nọ uzioraha Adamu o wha ze, ma wo ẹruore inọ ma ti wo ufuoma no igbo uzioraha gbe uwhu ẹdẹjọ.

Ọghẹnẹ ọ rọ emamọ ẹjiroro kẹ okẹ na. Ebaibol na ọ vuẹ omai oware nọ o wọ Ọghẹnẹ siobọno ọmọ riẹ kẹ omai, inọ: “Ẹkwoma onana Ọghẹnẹ o ro dhesẹ uyoyou riẹ kẹ omai, Ọghẹnẹ o vi Ọmọ ọvo riẹ ziọ akpọ na re ma ruẹsi wo uzuazọ ẹkwoma riẹ. Enẹ o ro dhesẹ uyoyou na, orọnọ fikinọ ma you Ọghẹnẹ hẹ, rekọ ọye o you omai.”​—1 Jọn 4:​9, 10.

Ẹvẹ whọ sai ro dhesẹ nọ okẹ ẹtanigbo na o da owhẹ ẹro? Jesu ọ ta evaọ obe Jọn 3:16 inọ ohwo nọ o “fi ẹrọwọ” họ iẹe ọvo o ti wo uzuazọ ebẹdẹ bẹdẹ. Ebaibol na ọ tẹ jẹ ta nọ ‘ẹrọwọ họ imuẹro inọ oware nọ ohwo o bi rẹro riẹ o te via.’ (Ahwo Hibru 11:1) Re ohwo ọ sai wo imuẹro yena, o gwọlọ nọ o re wo eriariẹ egbagba. Fikiere ma be tuduhọ owhẹ awọ nọ who gbe wuhrẹ kpahe Jihova Ọghẹnẹ, ọnọ ọ kẹ omai “okẹ ogbagba” na, jẹ daoma riẹ oware nọ who re ru re whọ sai wo uzuazọ ebẹdẹ bẹdẹ nọ ẹtanigbo Jesu u ru lọhọ kẹ omai na.

Whọ sai wuhrẹ kpahe eware nana kpobi ẹkwoma Ebaibol na gbe ebe nọ a kere noi ze nọ wo re se evaọ oria itanẹte mai www.pr418.com/iso. O te were Isẹri Jihova re a wuhrẹ Ebaibol na kugbe owhẹ. U mu omai ẹrọ nọ who bi wuhrẹ kpahe Jihova na, who ti wo irere buobu no okẹ obọdẹ nana ze, yọ whọ te ta ọkpọ ẹme Pọl ukọ na, inọ: “Uyere u te Ọghẹnẹ ẹkwoma Jesu Kristi Olori mai!”​—Ahwo Rom 7:25.