Ahwo jọ a roro nọ . . .

Amagẹdọn yọ ẹmo nọ ahwo-akpọ a te jọ rehọ ekwakwa ẹmo ilogbo raha akpọ na muotọ. Ẹvẹ who roro?

Ẹme nọ Ebaibol na ọ ta

Amagẹdọn yọ “ẹmo ẹdẹ ologbo Ọghẹnẹ Erumeru na,” ẹmo nọ ọ te rọ raha irumuemu no.​—Eviavia 16:​14, 16.

Eme ọfa ma rẹ sai wuhrẹ no Ebaibol na ze?

• Orọnikọ Ọghẹnẹ ọ te rọ ẹmo Amagẹdọn raha otọakpọ na no ho, rekọ ọ te rehọ iẹe thọ otọakpọ na no obọ ahwo nọ a be raha iẹe.​—Eviavia 11:18.

• Ọghẹnẹ ọ te rọ ẹmo Amagẹdọn ku emo kpobi họ.​—Olezi 46:​8, 9.

Kọ whọ te ta nọ

• Ee

• Ijo

• Hayo ẹsejọhọ?

Ẹme nọ Ebaibol na ọ ta

“Ogbotu obuobu” nọ a rẹ sae kele mu hu nọ i no erẹwho sa-sa ze a te zọ evaọ “uye ulogbo na,” onọ u ti kuhọ evaọ ẹmo Amagẹdọn.​—Eviavia 7:​9, 14.

Eme ọfa ma rẹ sai wuhrẹ no Ebaibol na ze?

• Ọghẹnẹ ọ gwọlọ nọ ahwo kpobi a kurẹriẹ re a sae zọ evaọ ẹmo Amagẹdọn. Rekọ ọ te raha ahwo kpobi nọ a kurẹriẹ hẹ no.​—Izikiẹl 18:32.

• Ebaibol na ọ ta oware nọ ma re ru re ma sae zọ evaọ ẹmo Amagẹdọn.​—Zefanaya 2:3.