Epọvo na re, mai kpobi ma be rria akpọ nọ owhe ologbo jọ o bi ku ze, wọhọ odẹme. Jesu o se rie “uye ulogbo.” (Matiu 24:21) U wo oria ovuovo nọ ohwo ọ rẹ dhẹ nya nọ ọ jẹ va uye ulogbo nana abọ họ. Rekọ u wo oware jọ nọ ma re ru re ma sae zọ. Eme oye?

Evaọ Ovuẹ obọ Ugbehru na, Jesu ọ ta oware nọ ma re ru inọ: “Hae kake gwọlọ Uvie [Ọghẹnẹ] gbe ẹrẹreokie riẹ ẹsikpobi.” (Matiu 6:33) Ẹvẹ ma sai ro ru ere?

Kake gwọlọ Uvie Ọghẹnẹ. Re ma kake gwọlọ Uvie na, u dhesẹ nọ oye ma rẹ rọ karo kẹ oware ofa kpobi evaọ uzuazọ. (Matiu 6:25, 32, 33) Fikieme? Keme ahwo-akpọ a rẹ sai ku ebẹbẹ akpọ na họ vievie he. Uvie Ọghẹnẹ ọvo o rẹ sai ru onana.

Gwọlọ ẹrẹreokie riẹ. O gwọlọ nọ ma rẹ daoma kpobi re ma koko izi ikiẹrẹe Ọghẹnẹ evaọ uzuazọ mai. Fikieme? Keme ma tẹ ta nọ oware nọ u je omai ma re ru, uye u re noi ze. (Itẹ 16:25) Rekọ ma te bi koko izi Ọghẹnẹ, ma re ru eva were iẹe, yọ eware i re woma kẹ omai.​—Aizaya 48:17, 18.

Gbẹ hae kake gwọlọ Uvie Ọghẹnẹ gbe ẹrẹreokie riẹ ẹsikpobi. Jesu ọ vẹvẹ ilele riẹ unu nọ ahwo jọ a te siọ ere ba eruo, bi roro nọ a te wo ugho gaga, ẹsiẹe a ti ro wo ufuoma. Amọfa jọ a sae ruawa kpahe epanọ a re ro wo eware nọ a gwọlọ evaọ uzuazọ, te epanọ a  gbe ro wo oke nọ a rẹ rọ gwọlọ Uvie Ọghẹnẹ hẹ.​—Matiu 6:19-21, 25-32.

Rekọ Jesu ọ ya eyaa nọ ahwo kpobi nọ a be gwọlọ Uvie Ọghẹnẹ a ti wo eware nọ a ginẹ gwọlọ evaọ uzuazọ, yọ a ti wo eghale ebẹdẹ bẹdẹ evaọ otọ esuo Uvie Ọghẹnẹ.​—Matiu 6:33.

Dede nọ ilele Jesu evaọ ikpe-udhusoi ọsosuọ a jẹ kake gwọlọ Uvie Ọghẹnẹ gbe ẹrẹreokie riẹ, uye-oruẹ gbe ebẹbẹ uzuazọ e gbẹ jariẹ ghele evaọ oke yena. Rekọ a wo ufuoma. Evaọ oghẹrẹ vẹ?

Fikinọ a je koko izi Ọghẹnẹ, o wha riẹ ze nọ ebẹbẹ nọ i je te ahwo nọ a je gbabọkẹ izi Ọghẹnẹ i gbe ro te ai hi. Ẹrọwọ ọgaga nọ a wo kpahe Uvie Ọghẹnẹ u fiobọhọ kẹ ai thihakọ ebẹbẹ ilogbo. Yọ Ọghẹnẹ ọ kẹ rai “ogaga nọ u vi ogaga” nọ a sai ro thihakọ ebẹbẹ nọ i te rai.​—2 Ahwo Kọrint 4:7-9.

Ileleikristi ikpe-udhusoi ọsosuọ na a ru lele ẹme Jesu na inọ a kake gwọlọ Uvie Ọghẹnẹ. A jẹ ta usi uwoma Uvie na evaọ ẹkwotọ rai soso. (Ahwo Kọlọsi 1:23) Kọ ahwo jọ a bi ru ere nẹnẹ?

Ee! Isẹri Jihova a riẹ nọ oke nọ u kiọkọ re Uvie Ọghẹnẹ o raha uyero-akpọ nana no u gbe tulo ho. Fikiere a be dawo ẹgba rai kpobi re a ru oware nọ Jesu ọ ta na inọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.”​—Matiu 24:14.

Eme who ti ru kpahe usi uwoma nọ who bi yo na? Ma tuduhọ owhẹ awọ nọ whọ rọ aro kele ahwo ikpe-udhusoi ọsosuọ jọ nọ e jẹ rria ẹwho Masidonia jọ nọ a re se Bẹria. Nọ Pọl ukọ na ọ ta usi uwoma kẹ ae kpahe Uvie Ọghẹnẹ, “a rọ osegboja ọgaga jẹ ẹme na rehọ.” Kẹsena a tẹ jẹ “romatotọ kiẹ Ikereakere na riwi” re a ruẹ sọ ere eware na e ginẹ rrọ, yọ a ru lele eware nọ a wuhrẹ na.​—Iruẹru Ikọ 17:11, 12.

Whọ sai ru epọvo na re. Whọ tẹ be kake gwọlọ Uvie Ọghẹnẹ gbe ẹrẹreokie riẹ, who ti wo ududhomẹno enẹna je wo udhedhẹ gbe omofọwẹ evaọ obaro bẹdẹ bẹdẹ.