Kẹle na, nọ egọmeti nọ Ọghẹnẹ o ro mu evaọ obọ odhiwu o te mu akpọ na họ esu no, eva e te were ahwo evaọ otọakpọ na. Ahwo kpobi a te rria kugbe dhedhẹ je ru iruo nọ e rẹ were ae. Ọghẹnẹ ọ rehọ Jesu mu no re o su otọakpọ na. Nẹnẹ na, ahwo buobu nọ a rrọ isu a rẹ daezọ ahwo nọ a bi su hu. Rekọ Jesu o wo ohẹriẹ keme o ti ru oware nọ ahwo a gwọlọ rọkẹ ae. Uyoyou o te wọe ru oware kpobi nọ o ti ru. Yọ ọ te jọ wowou, ọ te re ohrọ ahwo je bruoziẹ ababọ okienyẹ.​—Aizaya 11:4.

Ahwo nọ a te rria akpọ ọkpokpọ na a ti wo okugbe. Ohẹriẹ o te jariẹ hẹ fiki orẹwho hayo uyẹ nọ ohwo o no ze. (Eviavia 7:9, 10) Ahwo kpobi nọ a te rria otọakpọ na a ti you Ọghẹnẹ gbe erivẹ rai, yọ a ti ru iruo kugbe dhedhẹ jẹ rẹrote otọakpọ na re ẹjiroro nọ Ọghẹnẹ o wo kẹ otọakpọ na o ruẹsi rugba.​—Olezi 115:16.

Nọ Uvie Ọghẹnẹ u te mu otọakpọ na họ esu no, Ọghẹnẹ o ti ru nọ ofou, oso gbe eware itieye na efa e gbẹ rọ raha eware he. (Olezi 24:1, 2) Evaọ okenọ Jesu ọ jọ otọakpọ, o ru nọ ofou ọgaga o ro serihọ. Ọ rọ enẹ dhesẹ oware nọ ọ te rehọ ogaga nọ Ọghẹnẹ ọ kẹ riẹ ro ru evaọ obaro. (Mak 4:39, 41) Nọ Jesu o te mu otọakpọ na họ esu no, ahwo a te gbẹ dhozọ okpẹtu nọ ofou, oso, hayo eware itieye na efa e rẹ wha ze he. Uvie Ọghẹnẹ u ti ru nọ ahwo-akpọ a te rọ rria dhedhẹ kugbe erao, yọ ahwo a ti gbe ru eware nọ e rẹ raha eware nọ Ọghẹnẹ ọ ma fihọ otọakpọ na ha.​—Hosia 2:18.

Ohwo kpobi o ti wo omokpokpọ. Ohwo ọvo ọ te mọ họ, yọ ohwo ọvo ọ te who hayo whu gbe he. (Aizaya 35:5, 6) Ahwo kpobi a te rria akpọ nọ ọ rrọ wowoma jẹ rrọ fuafo wọhọ epanọ o jọ nọ Adamu avọ Ivi a jẹ rria ọgbọ Idẹn. Wọhọ epanọ eware e jọ evaọ ọgbọ Idẹn, ere o te jọ evaọ akpọ ọkpokpọ na. Ekakọ gbe ire nọ i woma kẹ emuore e te dhẹ no otọ na ze, yọ onana u ti ru nọ emuore o te rrọ da oria kpobi fia. (Emuhọ 2:9) Wọhọ epanọ o jọ kẹ ahwo Izrẹl evaọ oke anwae, ahwo kpobi nọ a te rria aparadase a “te re ebrẹdi rai bẹ.”​—Iruo-Izerẹ 26:4, 5.

Evaọ otọ esuo egọmeti Ọghẹnẹ, ahwo kpobi a te rria dhedhẹ, jọ uwowou, je yerikugbe ohwohwo ababọ okienyẹ. Ahwo a ti fi ẹmo ho, enọ i ti su a ti kienyẹ enọ e rrọ otọ rai hi, yọ ahwo kpobi a ti wo eware nọ a gwọlọ. Ọghẹnẹ ọ ya eyaa evaọ Ebaibol na inọ: “Omomọvo rai ọ te keria ọvuọ otọ ure evaene gbe otọ ure ifigi riẹ, ohwo ọvo o ti ru ozọ mu ai hi.”​—Maeka 4:3, 4.

Uviuwou kpobi u ti wo emamọ uwou nọ a rẹ rria, yọ iruo nọ ma ti ru e te wha evawere se omai. Ebaibol na ọ ta nọ ahwo nọ a te rria akpọ ọkpokpọ na a “te ruẹ uye kufiẹ hẹ.”​—Aizaya 65:21-23.

Ebaibol na ọ ta nọ: “Eriariẹ Jihova e te ginẹ vọ otọakpọ na.” (Aizaya 11:9) Ahwo nọ a te rria otọ esuo Uvie Ọghẹnẹ a ti wuhrẹ eware buobu kpahe Jihova nọ ọ ma odhiwu gbe otọakpọ na, epanọ ereghẹ riẹ i diwi te, je wuhrẹ kpahe eware nọ ọ ma. Ahwo a te rehọ eriariẹ nọ a wo ro ku eware ẹmo ho hayo nwa amọfa oma ha. (Aizaya 2:4) Ukpoye, a ti wuhrẹ kpahe epanọ a rẹ rọ rria kugbe ohwohwo dhedhẹ gbe epanọ a sae rọ rẹrote otọakpọ na.​—Olezi 37:11.

Ọghẹnẹ ọ romatotọ ma otọakpọ na evaọ oghẹrẹ nọ ahwo-akpọ a sae rọ rriae avọ evawere. Yọ ẹjiroro riẹ họ, re ahwo-akpọ a rria otọakpọ na bẹdẹ bẹdẹ. (Olezi 37:29; Aizaya 45:18) Re Ọghẹnẹ ọ sai ru ẹjiroro riẹ gba, “ọ te lọ uwhu no bẹdẹ bẹdẹ.” (Aizaya 25:8) Ebaibol na ọ ta nọ: “Uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.” (Eviavia 21:4) Ọghẹnẹ ọ te kẹ ahwo-akpọ kpobi uvẹ nọ a te rọ rria bẹdẹ bẹdẹ, te ahwo nọ a te zọ evaọ okenọ ọ te raha akpọ omuomu nana, gbe ima ahwo buobu nọ ọ te kpare ziọ uzuazọ evaọ akpọ ọkpokpọ na.​—Jọn 5:28, 29; Iruẹru Ikọ 24:15.

 Makọ enẹna, ima ahwo buobu a be ruẹrẹ oma kpahe kẹ epanọ a te rọ rria akpọ ọkpokpọ nọ ọ kẹle no na. Dede nọ ahwo nana a gba ha, a be daoma re a ru oware nọ Ọghẹnẹ ọ gwọlọ keme oghẹrẹ ahwo otiọye na ọvo a te rria akpọ ọkpokpọ na. Oghẹrẹ vẹ a bi ro ru onana? A bi wuhrẹ kpahe Ọghẹnẹ gbe Jesu Kristi ọnọ o vi ze na.​—Jọn 17:3.

Gbe wuhrẹ eware efa nọ who re ru re whọ sae zọ evaọ ekuhọ uyero-akpọ omuomu nana, re whọ sae rria akpọ ọkpokpọ nọ ọ rrọ obaro tha na. Whọ sae ta kẹ Osẹri jọ re ọ rehọ obe na Reawere Uzuazọ Bẹdẹ Bẹdẹ! ro wuhrẹ owhẹ Ebaibol na.