“Fikiere, wha ruabọhọ erou, keme wha riẹ ẹdẹ na hayo auwa na ha.”​—MATIU 25:13.

“Wha muẹrohotọ ẹsikpobi, wha jaja aro vi ẹsikpobi, keme wha riẹ oke nọ a fihọ na ha.”​—MAK 13:33.

Fikiere, ohwo ọvo ọ riẹ oke nọ uyero-akpọ nana u ti ro kuhọ họ. Rekọ Ọghẹnẹ o “fi oke họ” no, koyehọ uzedhe “ẹdẹ gbe auwa” nọ akpọ na o ti ro kuhọ. (Matiu 24:36) Kọ onana u dhesẹ nọ ohwo ọvo ọ sae riẹ hẹ nọ ekuhọ akpọ na ọ tẹ be kẹle no? Vievie. Jesu ọ vuẹ ilele riẹ kpahe eware jọ nọ e te via nọ i ti fiobọhọ kẹ ae riẹ nọ ekuhọ akpọ na ọ tẹ kẹle no.

Eware nana eye e te jọ oka “oke urere uyero-akpọ na.” Jesu ọ ta nọ: “Orẹwho o te kpareso orẹwho, uvie o te kpareso uvie, yọ no oria ruọ oria ohọo u ti mu, etọ i ti nuhu.” (Matiu 24:3, 7) Ọ tẹ jẹ ta nọ “ikpeyao” nọ i re vo e te jọ. (Luk 21:11) Kọ eware nana nọ Jesu ọ ruẹaro rai na e be ginẹ via?

Nẹnẹ na, ahwo a be ruẹ uye fiki ohọo, etọ nọ i bi nuhu, gbe eyao nọ e da oria kpobi fia. Wọhọ oriruo, evaọ ukpe 2004, otọ nọ u nuhu evaọ India u ru nọ ame abade o ro kporo ruọ ẹwho je kpe ahwo nọ a bu te oware wọhọ idu egba ivẹ gbe udhegbisoi (225,000). Evaọ ikpe esa, okpẹyao COVID-19 na o kpe ahwo nọ a bu te oware wọhọ ima ezeza gbe idu egba izii (6,900,000). Jesu ọ ta nọ eware itienana e tẹ be via, u dhesẹ nọ ekuhọ akpọ na o kẹle no.

Ebaibol na o dhesẹ etoke nọ a ti no no taure akpọ na o te kuhọ wọhọ “edẹ urere na.” (2 Pita 3:3, 4) Evaọ obe 2 Timoti 3:1-5, Ebaibol na ọ ta nọ uruemu ahwo u ti yoma gaga evaọ edẹ urere na. (Rri ẹkpẹti na “ Taure Akpọ na O te ti Kuhọ.”) Nẹnẹ na, ahwo a be hai dhesẹ uruemu oriobọ, mu ofu-ọkpoo, yọ ahwo a gbe wo uyoyou kẹ erivẹ rai hi. Onana yọ oka jọ nọ u dhesẹ nọ ekuhọ akpọ na ọ kẹle no.

Ẹvẹ edẹ urere na i ti kri te? Ebaibol na ọ ta nọ “omoke kakao” ọvo u kiọkọ. Kẹsena Ọghẹnẹ ọ vẹ te “raha enọ e be raha otọakpọ na” no.​—Eviavia 11:15-18; 12:12.

Ọghẹnẹ o fi oke gbe ẹdẹ họ no nọ ọ te rọ raha akpọ omuomu nana no. (Matiu 24:36) Rekọ oware jọ o riẹ nọ o rẹ sae lẹliẹ eva were owhẹ. Ọghẹnẹ “ọ gwọlọ nọ a raha ohwo ọvo ho.” (2 Pita 3:9) Ọghẹnẹ ọ be kẹ ahwo-akpọ uvẹ nọ a sai ro kurẹriẹ je yoẹme kẹe. Fikieme? Keme ọ gwọlọ nọ ma zọ evaọ okenọ ọ te raha akpọ na no, re ma sae rria otọakpọ na evaọ okenọ o te ru ei fihọ aparadase no.

Ọghẹnẹ o ru rie lọhọ nọ a be rọ ta usi uwoma na evaọ akpọ na soso, re a sai wuhrẹ ahwo kpahe epanọ a sae rọ zọ ruọ akpọ ọkpokpọ na evaọ otọ esuo Uvie riẹ. Jesu ọ ta nọ a te ta usi uwoma Uvie Ọghẹnẹ “evaọ akpọ na soso.” (Matiu 24:14) Evaọ ukpe 2019, Isẹri Jihova a rehọ euwa nọ i bu vrẹ ima-idu ivẹ (2,000,000,000) rọ ta usi uwoma je wuhrẹ ahwo Ebaibol na. Jesu ọ ta nọ a te ta usi uwoma na evaọ akpọ na soso taure akpọ na o te ti kuhọ.

Oke nọ u kiọkọ kẹ isuẹsu ahwo-akpọ u gbe tulo ho. Rekọ emamọ usi jọ o riẹ. Whọ sae zọ evaọ ekuhọ akpọ na jẹ rria aparadase nọ Ọghẹnẹ ọ ya eyaa riẹ na. Ma te jọ uzoẹme nọ o rrọ aro na ta kpahe oware nọ who re ru re whọ sae rria akpọ ọkpokpọ na.