NỌ EWARE OKPẸTU E TẸ VIA, KỌ WHỌ BE HAE NỌ INỌ, ‘DIẸSE ỌGHẸNẸ Ọ JỌ?’ HAYO KỌ OWARE UYOMA JỌ O VIA KẸ OWHẸ NO ẸDẸJỌ NỌ O LẸLẸ OWHẸ RORO SỌ ỌGHẸNẸ Ọ BE GINẸ DAEZỌ RA?

Uyero ra o sae wọhọ orọ Sheila, ọnọ ọ be rria obọ America. Ọ whẹro evaọ uviuwou nọ u se egagọ Ọghẹnẹ gboja gaga. Ọ ta nọ: “No emaha ze mẹ rọ gwọlọ gọ Ọghẹnẹ keme mẹ riẹ nọ ọye ọ ma omai. Ghele na, mẹ kẹle Ọghẹnẹ tere he. O jọ omẹ oma nọ o bi muẹrohọ omẹ, rekọ evaọ ugbo. Mẹ riẹ nọ o mukpahe omẹ hẹ, rekọ evaọ oke ovona u mu omẹ ẹro nọ o you omẹ gbe he.” Eme ọ lẹlẹ Sheila je roro nọ Ọghẹnẹ o you rie he? Ọ ta nọ: “Uviuwou mẹ o jẹ rẹriẹ ovao dhe ebẹbẹ ilogbo unọjọ utọjọ, yọ o jọ wọhọ nọ Ọghẹnẹ o bi fiobọhọ kẹ omai vievie he.”

Wọhọ Sheila, o sai mu owhẹ ẹro nọ Ọghẹnẹ ọ rrọ. Rekọ whọ sai wo avro sọ ọ be ginẹ daezọ ra. Job ọ jọ ohwo nọ okiẹrẹe, yọ o fievahọ Ọghẹnẹ jẹ rẹroso iẹe. Ọ riẹ nọ Ọghẹnẹ o wo ogaga ulogbo gbe areghẹ. Ghele na, u wo okejọ nọ o ro wo avro. (Job 2:3; 9:4) Nọ idabolo i te Job unọjọ utọjọ ababọ ẹruore inọ i ti kuhọ, ọ tẹ nọ Ọghẹnẹ nọ: “Fikieme who je si ovao ra no omẹ, nọ who je kele omẹ wọhọ ọwegrẹ ra?”​—Job 13:24.

Eme Ebaibol na ọ ta? Kọ Ọghẹnẹ a rẹ fo nọ eware okpẹtu e tẹ via? Kọ imuẹro jọ e riẹ nọ i dhesẹ nọ Ọghẹnẹ ọ be daezọ ahwo-akpọ kpobi gbe omai omomọvo? Kọ imuẹro jọ e riẹ nọ i dhesẹ nọ Ọghẹnẹ o bi muẹrohọ omai omomọvo? Kọ Ọghẹnẹ ọ riẹ epanọ eware e rrọ kẹ omai je wo ọdawẹ kẹ omai, hayo kọ o bi fiobọhọ kẹ omai nọ ma te wo ebẹbẹ?

Evaọ izoẹme nọ e rrọ aro na, ma te ta kpahe eware nọ Ọghẹnẹ ọ ma gbe epanọ i ro dhesẹ nọ ọ be daezọ omai. (Ahwo Rom 1:20) Kẹsena ma vẹ te jọ Ebaibol na ta kpahe eware nọ e kẹ imuẹro inọ Ọghẹnẹ ọ be daezọ mai. Emama Ọghẹnẹ gbe Ebaibol na i re fiobọhọ kẹ owhẹ “riẹ” Ọghẹnẹ ziezi. Yọ epanọ whọ riẹ Ọghẹnẹ te, ere who ti wo imuẹro te inọ “ọ be daezọ” ra.​—1 Jọn 2:3; 1 Pita 5:7.