Eme họ ọdawẹ? Ọdawẹ họ epanọ ohwo “ọ rẹ daoma riẹ epanọ eware e rrọ omọfa oma je roro kpahe epanọ o hae jariẹ oma otẹrọnọ ọye ọ rrọ uyero ohwo na.” Ọgba-eriariẹ jọ nọ o wuhrẹ kpahe iroro nọ a re se Dr. Rick Hanson, ọ ta nọ “ọdawẹ ọ rrọ azẹ mai.”

DAI RORO IEI: Ẹvẹ o rọ rrọ nọ ọdawẹ o da omai ahwo-akpọ oma fia, rekọ emama efa a sai dhesẹ iẹe tere he? Ebaibol na ọ ta nọ Ọghẹnẹ ọ ma ahwo-akpọ evaọ uwoho riẹ. (Emuhọ 1:26) Onana u dhesẹ nọ Ọghẹnẹ ọ ma omai evaọ oghẹrẹ nọ ma sae rọ rehọ aro kele iei, je dhesẹ emamọ iruemu riẹ. Fikiere, nọ ahwo a te fiobọhọ kẹ amọfa fiki ọdawẹ nọ a wo kẹ ai, yọ a be rọ aro kele Jihova nọ ọ ma omai na, ọnọ ọ rrọ wowou jẹ vọ avọ ọdawẹ na.​—Itẹ 14:31.

Ọghẹnẹ o wo ọdawẹ kẹ omai, yọ o rẹ kẹe uye nọ ma tẹ be ruẹ uye. Okenọ emọ Izrẹl a jẹ rioja evaọ igbo Ijipti, gbe okenọ a rọ jọ udhude na evaọ ikpe 40 soso na, o jẹ kẹ Ọghẹnẹ uye. Ebaibol na ọ ta nọ: “Uye rai kpobi o bẹ riẹ.” (Aizaya 63:9) Oria nana u dhesẹ nọ orọnikọ Ọghẹnẹ o je muẹrohọ uye-oruẹ emọ Izrẹl na ọvo ho, rekọ o jẹ dae. Ọghẹnẹ ọ ta nọ: “Mẹ ruerẹ uye ahwo mẹ nọ a rọ evaọ Ijipti.” (Ọnyano 3:7) Ọ tẹ jẹ ta nọ: “Ọnọ rehọ obọ te owhẹ ọ rehọ obọ te ọmọ-ẹro mẹ.” (Zẹkaraya 2:8) Ahwo a te ru oware nọ o kẹ omai uye, o rẹ kẹ Ọghẹnẹ uye re.

O tẹ make rọnọ udu mai u bi brukpe omai, hayo ma roro nọ ma fioka ahwo nọ Ọghẹnẹ o re dhesẹ ọdawẹ kẹ hẹ, Ebaibol na ọ ta nọ: “Ọghẹnẹ ọ rro vi udu mai jẹ riẹ eware kpobi.” (1 Jọn 3:19, 20) Ọghẹnẹ ọ riẹ omai vi epanọ ma riẹ omobọ mai dede. Ọ riẹ uyero mai, eware nọ ma bi roro gbe enọ e be kẹ omai uye. O wo ọdawẹ kẹ omai.

 Ebaibol na ọ kẹ omai imuẹro inọ

• “Wha re ti se, ỌNOWO na o veti yo kẹ owhai; wha reti bo, o veti yo nọ, ‘Mẹ na.’”​—AIZAYA 58:9.

• “Keme mẹ riẹ oma nọ me wo kpahe kẹ owhai, ere ỌNOWO na ọ tae, ema ewoma, orọnọ eyoma ha, re mẹ kẹ owhai ẹruore obaro. Kẹsena wha vẹ te lẹ omẹ, je bose omẹ, me ve ti yo kẹ owhai.”​—JERIMAYA 29:11, 12.

• “Fi irui mẹ họ eva ololo ra! Kọ e gbẹ rọ eva obe ra?”​—OLEZI 56:8.

Ma tẹ riẹ nọ Ọghẹnẹ o wo ọdawẹ kẹ omai, o sai fiobọhọ kẹ omai thihakọ ebẹbẹ. Joma ta kpahe iku aye jọ nọ a re se Maria. Ọ ta nọ:

“Okenọ ọmọzae mẹ nọ ọ jọ ikpe 18 o whu fiki ẹyao ọta, o da omẹ gaga, yọ o jọ omẹ oma nọ akpọ o bi kienyẹ omẹ. Eva Jihova e jẹ dha omẹ gaga keme ọ sae dhogbo ze ti fiobọhọ kẹ omẹ jẹ whaha uwhu ọmọ mẹ na ha!

“Nọ ikpe ezeza e vrẹ no, ogbẹnyusu oyoyou mẹ jọ nọ ma gbẹ jọ ukoko Isẹri Jihova o te dhesẹ ọdawẹ kẹ omẹ. Ọ nabe gaviezọ kẹ omẹ evaọ euwa buobu nọ me je horie eva mẹ kpobi kẹe inọ Jihova o you omẹ hẹ. Nọ mẹ ta re no, o te se oria Ebaibol jọ kẹ omẹ nọ u duobọte omẹ udu gaga. Oria na họ obe 1 Jọn 3:19, 20 nọ o ta nọ: “Ọghẹnẹ ọ rro vi udu mai jẹ riẹ eware kpobi.” Ọ ta kẹ omẹ nọ Jihova ọ riẹ eware kpobi nọ e be kẹ omẹ uye.

“Ghele na, o jọ bẹbẹ kẹ omẹ re me si ofu no eva! Kẹsena me te se obe Olezi 94:19, nọ o ta nọ: ‘Okenọ iroro ibuobu e vọ omẹ eva, evaewerọ ra e tẹ sasa ẹzi mẹ.’ O jọ omẹ oma nọ fiki mẹ a ro kere oria Ebaibol nana! Uwhremu na, o tẹ lọhọ kẹ omẹ re me horie eva mẹ kẹ Jihova, keme mẹ riẹ nọ ọ be gaviezọ yọ ọ riẹ epanọ eware e rrọ kẹ omẹ.”

O rrọ oware omosasọ gaga inọ Ọghẹnẹ ọ riẹ epanọ eware e rrọ kẹ omai yọ o wo ọdawẹ kẹ omai! Rekọ fikieme uye-oruẹ o rọ da akpọ fia nẹnẹ? Kọ Ọghẹnẹ ọ be kẹ omai uye fiki iruthọ mai? Kọ Ọghẹnẹ o ti si uye-oruẹ no otọ ẹdẹjọ? Ma te ta kpahe enọ nana evaọ uzoẹme nọ o rrọ aro na.