Ọghẹnẹ ọ ma ugboma mai evaọ oghẹrẹ nọ ma tẹ make nwoma dede, u re ro kpo kẹ omariẹ. Nọ ohwo o te bru obọ hayo nọ oware jọ u te duwu iei, “eware buobu i re mu iruo họ evaọ oma na re omola na o sai kpo vẹrẹ, te o rrọ kakao hayo o rrọ ruaro.” (Johns Hopkins Medicine) Ugboma na kpobi u re mu iruo họ re o whaha azẹ nọ o bi hwẹ kufiẹ, ruẹrẹ oria na, ru eware nọ e rẹ lẹliẹ omola na kpo, je ru iriẹ oma na ga.

DAI RORO IEI: Otẹrọnọ Ọghẹnẹ ọ ma ugboma mai evaọ oghẹrẹ nọ omola o sai ro kpo kẹ omariẹ, kọ onana o gbẹ kẹ imuẹro nọ ma sai fievahọ eyaa nọ ọ ya inọ ọ te sasa omai oma nọ ma tẹ rrọ ọkora? Ọso-ilezi na o kere nọ: “O re siwi enọ e rrọ ọkora; Ọ rẹ gba emela rai.” (Olezi 147:3) Otẹrọnọ whọ rrọ ọkora fiki idhọvẹ akpọ, ẹvẹ o sai ro mu owhẹ ẹro nọ Jihova ọ te gba emela ra, koyehọ sasa owhẹ oma enẹna gbe evaọ obaro?

Ọghẹnẹ ọ ya eyaa nọ: “Ozọ umu owhẹ hẹ, keme mẹ avọ owhẹ a gbẹ rọ, who nyuhẹ hẹ, keme mẹ họ Ọghẹnẹ ra. Mẹ te kẹ owhẹ ogaga, me ti fiobọhọ kẹ owhẹ.” (Aizaya 41:10) Ohwo nọ ọ riẹ nọ Jihova ọ be daezọ riẹ o re wo udhedhẹ iroro, gbe ẹgba nọ o re ro thihakọ ebẹbẹ sa-sa. Pọl ukọ na ọ ta nọ udhedhẹ iroro nana yọ “udhedhẹ Ọghẹnẹ nọ u vi otoriẹ kpobi.” O te je fibae nọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.”​—Ahwo Filipai 4:4-7, 9, 13.

Ebaibol na o re fiobọhọ kẹ omai wo ẹrọwọ ọgaga je fievahọ eyaa nọ Jihova ọ ya kẹ ahwo-akpọ kpahe obaro na. Wọhọ oriruo, obe Eviavia 21:4, 5 o vuẹ omai eware nọ Ọghẹnẹ o ti ru gbe oware nọ ma sai ro fievahọ iẹe:

• “O ti ririe irui-oviẹ kpobi” no aro mai. Jihova o ti si uye-oruẹ gbe awa-ọruọ mai kpobi no otọ, makọ ebẹbẹ mai nọ amọfa a re rri nọ i te oware ovo ho.

• Jihova Ọghẹnẹ Erumeru nọ “ọ keria agbara-uvie” avọ oruaro na, ọ te rọ ogaga riẹ whaha uye-oruẹ kpobi jẹ tha omai uke nọ ma tẹ gwọlọ obufihọ.

• Jihova ọ ta nọ eyaa riẹ yọ eyaa nọ a re “fievahọ, e tẹ jẹ rrọ uzẹme.” Onana u dhesẹ nọ, fiki odẹ riẹ gbe oghẹrẹ ohwo nọ ọ rrọ, Jihova o re ru eyaa kpobi nọ ọ ya gba.

“O ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no. Ọnọ ọ keria agbara-uvie na ọ tẹ ta nọ: ‘Rri! Me bi ru eware kpobi họ ekpokpọ.’ Ọ tẹ jẹ ta nọ: ‘Kere, keme eme nana yọ eme nọ a re fievahọ, e tẹ jẹ rrọ uzẹme.’”​—Eviavia 21:4, 5.

Emama Jihova nọ e rrọ ehrugbakpọ na gbe Ebaibol na i dhesẹ iruemu-aghae gbe oruaro riẹ via. Eware nọ Ọghẹnẹ ọ ma e rẹ gwọlọ wọ omai wuhrẹ kpahe iẹe jẹ gwọlọ jọ egbẹnyusu riẹ. Ebaibol na ọ vuẹ omai vevẹ nọ: “Wha si kẹle Ọghẹnẹ, o re ti si kẹle owhai.” (Jemis 4:8) Obe Iruẹru Ikọ 17:27 o ta nọ: “O thabọ no omai omomọvo ho.”

Epanọ who wuhrẹ kpahe Ọghẹnẹ jẹ riẹe te, ere u ti mu owhẹ ẹro te re inọ “ọ be daezọ” ra. (1 Pita 5:7) Eghale vẹ i re te omai nọ ma te fievahọ Jihova riẹriẹriẹ?

Joma ta kpahe iku Toru, nọ ọ rrọ ohwo Japan. Oni nọ ọ yọrọ e riẹ o kru egagọ Ọghẹnẹ ga gaga, ghele na o kuomagbe utu ugbarugba orẹwho Japan nọ a re se yakuza. Toru ọ ta nọ: “Mẹ riẹ nọ Ọghẹnẹ o mukpahe omẹ, yọ me roro nọ uwhu ahwo uviuwou mẹ gbe ahwo nọ e kẹle omẹ gaga na yọ osa nọ Ọghẹnẹ ọ be hwa omẹ fiki imuemu mẹ.” Ọ ta nọ fiki utu ugbarugba nọ o kuomagbe na gbe ekpehre iroro nọ e jariẹe udu, o gbe wo “ororokẹ hẹ, ọ tẹ jẹ geva thesiwa.” Ọ ta oware nọ o jariẹ iroro inọ: “Mẹ jẹ gwọlọ nọ me re kpe ohwo jọ nọ ọ viodẹ gaga, re ahwo kpobi a riẹ odẹ mẹ o tẹ make rọnọ u ti si uwhu kpe omẹ.”

Rekọ nọ Toru avọ aye riẹ a wuhrẹ Ebaibol na no, o te nwene uruemu uyoma riẹ gbe eriwo riẹ. Aye  riẹ Hannah ọ ta nọ: “Iraro obọmẹ na ọzae mẹ ọ jọ nwene.” Enẹna Toru ọ rẹ ta avọ imuẹro inọ: “Ọghẹnẹ jọ ọ riẹ nọ ọ be daezọ mai omomọvo. Ọ gwọlọ nọ ohwo ọvo o whu hu, yọ ọ rẹ rọvrẹ ohwo kpobi nọ o siobọno iruemu iyoma riẹ je kurẹriẹ no eva ze. Ọ rẹ gaviezọ kẹ omai nọ ma tẹ make vuẹe eware nọ ma sae vuẹ omọfa ha, gbe eware nọ omọfa ọ sai wo otoriẹ rai hi. Kẹle na, Jihova o ti si ebẹbẹ, uye-oruẹ, gbe edada kpobi no otọ. Makọ enẹna dede, ọ be thọ omai evaọ idhere nọ ma riẹ hẹ. Ọ be daezọ mai jẹ sasa omai oma nọ ma tẹ rrọ ọkora.”​—Olezi 136:23.

Wọhọ epanọ ma muẹrohọ evaọ iku Toru na, ma tẹ riẹ nọ Ọghẹnẹ ọ be daezọ mai, gbe nọ kẹle na o ti si uye-oruẹ kpobi no otọ je ririe irui-oviẹ kpobi no aro mai, o rẹ lẹliẹ omai wo ẹruore ọgaga inọ eyaa Ọghẹnẹ kpahe obaro na i ti rugba, yọ u re je fiobọhọ kẹ omai yeri emamọ uzuazọ enẹna. Fikiere, dede nọ ma be rria akpọ nọ uye-oruẹ o dafia, jọ u mu owhẹ ẹro nọ ma sai wo eghale Ọghẹnẹ keme o you omai jẹ be daezọ mai.