ISI NỌ A RẸ RỌ GBẸVA: Ahwo jọ a rọwo nọ oghẹrẹ nọ isi obehru na i dhe uhie họ evaọ oke nọ a ro yẹ ai, oye u re dhesẹ epanọ uzuazọ rai o te jọ. A rẹ nyabru ahwo nọ a rẹ rọ isi gbẹva re a kiẹ otọ kẹ ae, re a riẹ eware iyoma nọ e te via kẹ ae evaọ uzuazọ gbe epanọ a sae rọ whaha ae.

FENG SHUI: Amọfa a rọwo nọ eware e rẹ sai woma kẹ ohwo fiki oghẹrẹ nọ ọ bọ uwou riẹ hayo oghẹrẹ nọ ọ ruẹrẹ eware họ evaọ uwou riẹ. Ọzae jọ nọ a re se Lo Wing * nọ ọ be rria Hong Kong ọ ta nọ, “Ohwo jọ nọ ọ riẹ kpahe feng shui gaga ọ ta kẹ omẹ nọ me te fi oghẹrẹ utho jọ họ uzedhe oria jọ evaọ uwou-eki mẹ, eki mẹ ọ te nya ziezi.”

EGAGỌ ESEMỌ: Amọfa jọ a rọwo nọ u wuzou gaga re a gọ esemọ hayo eghẹnẹ efa. Nọ a te ru ere, ẹsiẹe esemọ hayo eghẹnẹ efa na e rẹ thọ ae jẹ ghale ae. Aye jọ nọ a re se Van nọ ọ be rria orẹwho Vietnam ọ ta nọ, “Mẹ riẹ nọ mẹ tẹ be hae gọ esemọ, me ti yeri emamọ uzuazọ enẹna, yọ eware i ti woma kẹ omẹ avọ emọ mẹ evaọ obaro.”

OHWO NỌ A RẸ WARIẸ YẸ: Ahwo buobu a rọwo nọ mai kpobi na yọ ahwo nọ a whu no nọ a wariẹ yẹ, yọ ere a roro nọ o rrọ notọ ze. A re roro nọ eware iwoma hayo iyoma nọ e be via kẹ ae enẹna, yọ fiki eware nọ a ru evaọ akpọ nọ a rria vrẹ no.

Rekọ ahwo buobu a rẹ ta nọ eware nana nọ ahwo a rọwo na yọ ugbẹrọwọ. Ghele na, ahwo nana a rẹ nyabru ebo nọ e rẹ gbẹva hayo ruẹaro kẹ ae hayo ru eware itienana efa. A roro nọ eware nana i re fiobọhọ kẹ ae riẹ epanọ uzuazọ rai o te jọ evaọ obaro.

Kọ ahwo nọ a rọwo eware nana a bi gine yeri emamọ uzuazọ? Kọ a ginẹ wo ẹruore nọ eware i ti woma kẹ ae evaọ obaro?

Joma ta kpahe oriruo ọzae jọ nọ a re se Hào nọ ọ be rria orẹwho Vietnam. Ọzae nana ọ rehọ isi gbẹva, o ru eware nọ ahwo nọ a rọwo feng shui a re ru, ọ tẹ jẹ gọ esemọ sọ eware i ti kiehọ kẹe. Kọ eware i gine kiehọ kẹe? Hào ọ ta nọ, “Eki mẹ o kiekpe omẹ, mẹ re esa vọ uzou, ebẹbẹ e da uviuwou mẹ fia, yọ iroro egaga i je ti kpe omẹ no.”

Ọzae jọ nọ a re se Qiuming nọ ọ be rria orẹwho Taiwan ọ rọwo uwuhrẹ otatha, ohwo nọ a rẹ wariẹ yẹ, feng shui, isi nọ a rẹ rọ gbẹva, gbe egagọ esemọ. Rekọ nọ ọ romatotọ kiẹ kpahe iwuhrẹ nana no, ọ ta nọ: “Me muẹrohọ nọ iwuhrẹ gbe iruemu nana e wọso ohwohwo, yọ i re reghe ohwo. Mẹ ruẹ nọ eware nọ ahwo nọ a rẹ rọ isi gbẹva a rẹ ta, i re rugba ha. Rọ kpahe uwuhrẹ ohwo nọ a rẹ wariẹ yẹ, otẹrọnọ ohwo ọ kareghẹhọ oware ovo evaọ akpọ nọ ọ ze vẹre he, ẹvẹ ọ sai ro nwene je ru eware nọ e rẹ lẹliẹ uzuazọ riẹ woma nọ a tẹ wariẹ yẹe?”

Wọhọ epanọ Hào, Qiuming, gbe amọfa buobu a ruẹ vuhumu, otatha, isi obehru, esemọ, hayo ọwariẹ-yẹ, i re fiobọhọ kẹ ohwo yeri emamọ uzuazọ họ. Kọ onana u dhesẹ nọ ma sai ru oware ovo nọ u re fiobọhọ kẹ omai yeri emamọ uzuazọ họ?

Ahwo buobu a roro nọ oware nọ a re ru re a sai yeri emamọ uzuazọ evaọ obaro họ, a re kpohọ isukulu ikpehru jẹ daoma re a fe. Rọkẹ ahwo nọ salọ nọ a re ru onana, eme u no rie ze no?