Kọ O Gwọlọ nọ Ohwo Ọ rẹ Jọ Emamọ Ohwo re Ọ Sai Yeri Emamọ Uzuazọ?
U kri akpọ no nọ ahwo buobu a bi ro roro nọ re ohwo ọ sai yeri emamọ uzuazọ, ọ rẹ jọ emamọ ohwo je wo emamọ uruemu. Wọhọ oriruo, ahwo nọ a be rria ofẹ ovatha-ọre, a rri ẹme nọ ọgba-eriariẹ jọ nọ a re se Confucius (551-479 B.C.E.) ọ ta fihọ ẹme areghẹ. Ọ ta nọ: “Oware nọ whọ gwọlọ nọ a ru kẹ owhẹ hẹ, who ru ei kẹ amọfa ha.” *
OWARE NỌ AHWO BUOBU A SALỌ
Ahwo buobu a gbe bi roro nọ re a sai yeri emamọ uzuazọ, u fo nọ a rẹ jọ emamọ ohwo. A rẹ daoma kẹ amọfa adhẹẹ, dhesẹ emamọ uruemu, ru oware kpobi nọ u fo nọ a re ru, je ru eware nọ a sai ro wo emamọ obruoziẹ-iroro. Aye jọ nọ a re se Linh nọ ọ be rria Vietnam ọ ta nọ: “Notọ avọ otọ ze, mẹ jẹ hai roro nọ mẹ tẹ be hae ta uzẹme je ru eware oruọzewọ, eghale i re te omẹ.”
Ahwo jọ a rẹ daoma ru eware iwoma kẹ amọfa fiki egagọ rai. Ọzae jọ nọ a re se Hsu-Yun nọ ọ be rria Taiwan ọ ta nọ, “A wuhrẹ omẹ nọ eware nọ ohwo o ru evaọ oke nọ ọ rọ rrọ uzuazọ, eye i re dhesẹ sọ o ti yeri emamọ uzuazọ hayo ruẹ uye nọ o te whu no.”
EME U NO RIE ZE NO?
Irere buobu e sai gine te omai nọ ma te ru eware iwoma kẹ amọfa. Rekọ ahwo buobu nọ a rẹ daoma ru eware iwoma kẹ amọfa a rẹ ruẹ nọ, orọnikọ ẹsikpobi ahwo a re ru eware iwoma kẹ ai zihe he. Aye jọ nọ a re se Shiu Ping nọ ọ be rria Hong Kong ọ ta nọ: “Eware nọ e via kẹ omẹ i wuhrẹ omẹ nọ, orọnikọ ẹsikpobi emamọ oware u re noi ze he nọ ohwo ọ tẹ be maki ru oware uwoma. Mẹ jẹ daoma rẹrote uviuwou mẹ je ru oware uwoma. Ghele na, me wo ebẹbẹ evaọ orọo mẹ, yọ ọzae mẹ ọ dhẹ siọ omẹ avọ ọmọzae mẹ ba.”
Ahwo buobu a muẹrohọ no nọ orọnikọ ẹsikpobi egagọ i re fiobọhọ kẹ ohwo jọ emamọ ohwo ho. Aye jọ nọ a re se Etsuko nọ ọ be rria Japan ọ ta nọ: “Me kuomagbe egagọ jọ je zihe ruọ ọnọ o wuzou eware nọ izoge na a re ru evaọ egagọ na. Akpọ o gbe omẹ unu nọ mẹ ruẹ oghẹrẹ nọ ahwo egagọ na a je ro gbe-ofariẹ, họre fiki ọkwa, je tho igho nọ u fo nọ a re ro ru eware evaọ egagọ na.”
“Mẹ jẹ daoma rẹrote uviuwou mẹ je ru oware uwoma. Ghele na, me wo ebẹbẹ evaọ orọo mẹ, yọ ọzae mẹ ọ dhẹ siọ omẹ avọ ọmọzae mẹ ba.”—SHIU PING, HONG KONG
Fikinọ ahwo jọ a kru ga ziezi evaọ egagọ rai jẹ be daoma ru oware uwoma, o rẹ dae wumuo ho nọ oware uyoma o tẹ via kẹe. Ere o jọ kẹ aye jọ nọ a re se Van nọ ọ rrọ ohwo orẹwho Vietnam. Ọ ta nọ: “Kẹdẹ kẹdẹ mẹ jẹ hae dẹ ibi-ire, idodo, gbe emu nọ me re ro dhe idhe kẹ esemọ. Me je rẹro nọ a te ghale omẹ evaọ uzuazọ. Rekọ ghelọ eware iwoma nọ me je ru gbe idhe nọ me je dhe kẹ esemọ evaọ ikpe buobu na, okpẹyao o kie ọzae mẹ. Kẹsena ọmọtẹ mẹ nọ ọ gbẹ maha nọ o je kpohọ isukulu evaọ orẹwho ofa, o te je whu.”
Wọhọ epanọ ma ruẹ na, dede nọ u wuzou re ohwo ọ jọ emamọ ohwo, onana ọvo o sae lẹliẹ ohwo yeri emamọ uzuazọ họ. Rekọ ẹvẹ ohwo ọ sai ro yeri emamọ uzuazọ enẹna gbe evaọ obaro? Re ma sae kuyo onọ nana, ma gwọlọ oware nọ ma rẹ sai fievahọ nọ ọ rẹ kpọ omai. Yọ o gwọlọ nọ oware na ọ rẹ kiyo enọ mai je fiobọhọ kẹ omai riẹ epanọ ma sai ro yeri emamọ uzuazọ. Diẹse ma sae jọ ruẹ oware nana?
^ edhe-ẹme 2 Whọ tẹ gwọlọ gbẹ riẹ kpahe eware nọ Confucius ọ ta, se uzou avọ 7 obe na, Mankind’s Search for God, edhe-ẹme avọ 31-35, onọ Isẹri Jihova a kere, yọ whọ rẹ ruẹ e riẹ evaọ oria itanẹte mai www.pr418.com.
Enana E Sae jẹ Were Owhẹ
AWAKE!
Oware nọ U ro Wuzou re A Riẹ Oware nọ U Woma gbe Onọ U Woma Ha
Nọ who te wuhrẹ emọ ra re a riẹ oware nọ u woma gbe onọ u woma ha, u re fiobọhọ kẹ ae jọ emamọ ahwo nọ a tẹ kpako no.
ENỌ NỌ EBAIBOL Ọ KẸ IYO RAI
Ẹvẹ Jesu Ọ Ta nọ Ma Lele Amọfa Yeri?
Oke nọ Jesu ọ rọ ta nọ ma lele amọfa yeri ziezi na, ọ tubẹ ta nọ ma ru ewoma kẹ ewegrẹ mai.
UWOU-ERORO NA
Fikieme Eware Iyoma E be rọ Via kẹ Ahwo Owoma?
Ebaibol na ọ fodẹ eware esa nọ e be wha uye-oruẹ ahwo-akpọ ze.
