Nọ eware e tẹ rrọ gaga kẹ owhẹ, who re rẹro nọ ohwo nọ ọ ginẹ rrọ emamọ ogbẹnyusu ra o ti fiobọhọ kẹ owhẹ. Oyejabọ nọ ahwo jọ a rọ ta nọ Ọghẹnẹ yọ emamọ ogbẹnyusu hu keme o bi ru oware ovo ro fiobọhọ kẹ ai hi. Uzẹme riẹ họ, Ọghẹnẹ o ru eware buobu no nọ ma bi wo erere no ze, yọ o ti ru oware jọ kpahe ebẹbẹ mai gbe uye-oruẹ nọ o da akpọ fia nẹnẹ na. Eme Ọghẹnẹ o ti ru?

Jihova Ọghẹnẹ ọ te raha ohwo nọ ọ be wha emuemu ze no, ọ vẹ te rọ enẹ si emuemu kpobi no otọ riẹriẹriẹ. Ebaibol na ọ ta kpahe ohwo yena nọ: “Akpọ na soso ọ rrọ otọ ogaga omuomu na.” (1 Jọn 5:19) Setan Ẹdhọ na họ “omuomu na,” yọ Jesu o se rie “osu akpọ nana.” (Jọn 12:31) Setan o bi ru nọ ahwo a bi ro ru eware iyoma nọ e be wha uye-oruẹ ze evaọ akpọ na. Eme Ọghẹnẹ o ti ru?

Kẹle na, Ọghẹnẹ ọ te rọ Ọmọ riẹ Jesu Kristi “raha ọnọ o wo ogaga nọ ọ rẹ rọ wha uwhu ze na, koyehọ Ẹdhọ.” (Ahwo Hibru 2:14; 1 Jọn 3:8) Ebaibol na o tube dhesẹ nọ Ẹdhọ omariẹ “ọ riẹ nọ omoke kakao o wo” taure a tẹ te raha iẹe. (Eviavia 12:12) Ọghẹnẹ ọ te jẹ raha ahwo omuomu kpobi no.—Olezi 37:9; Itẹ 2:22.

Nọ Ọghẹnẹ o te si emuemu kpobi no otọ no, o ve ti ru ẹjiroro riẹ gba kẹ ahwo-akpọ gbe otọakpọ na. Eware vẹ ma bi rẹro rai?

Udhedhẹ gbe omofọwẹ. “Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:11.

Emamọ emu ọ te dafia. “Emu ọ te dafia evaọ otọakpọ na; obọ ehru igbehru na o te vọ kpọhọhwẹ.”—Olezi 72:16, NW.

Emamọ iwou gbe emamọ iruo. “A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ. . . . Esanọ mẹ na a rẹ te re erere iruo abọ rai krẹkri.”—Aizaya 65:21, 22.

Kọ o gbẹ were owhẹ re whọ ruẹ orugba eware nana kpobi? Aikpobi i ti rugba kẹle na, yọ uzuazọ o te were gaga.

Nẹnẹ na, mai kpobi ma be mọ yọ ma riẹ nọ ma ti whu ẹdẹjọ, rekọ eware i ti nwene kẹle na. Ọghẹnẹ o ti ru re ahwo-akpọ a wo erere no idhe ẹtanigbo Jesu ze, “re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Eghale vẹ onana o te wha ze?

Ẹyao o ti no otọ. “Ohwo ọvo nọ ọ be ria eva riẹ nọ ọ rẹte ta [nọ], ‘Mẹ be mọ’, ọ rọ họ; Ahwo nọ a be ria etẹe kpobi a reti wo erọvrẹ izieraha rai.”—Aizaya 33:24.

Uwhu o gbẹ te jọ họ. “Ọ vẹ lọ uwhu no ri bẹdẹ, Ọnowo na ỌGHẸNẸ o veti ririe irui oviẹ no aro rai.”—Aizaya 25:8.

Ahwo a te rria bẹdẹ bẹdẹ. “Okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.”—Ahwo Rom 6:23.

A te kpare ahwo nọ a whu no ze. “Ẹkparomatha enọ i kiẹrẹe gbe enọ i kiẹrẹe he o te jọ.” (Iruẹru Ikọ 24:15) Ahwo nọ a whu no a ti wo erere no okẹ idhe ẹtanigbo na ze.

Ẹvẹ Ọghẹnẹ o ti ro ru eware nana kpobi?

Ọghẹnẹ o ti ru ẹjiroro riẹ kẹ ahwo-akpọ gbe otọakpọ na gba ẹkwoma egọmeti obọ odhiwu nọ Jesu ọ rrọ Osu riẹ. (Olezi 110:1, 2) Egọmeti hayo Uvie yena Jesu o wuhrẹ ilele riẹ nọ a lẹ kpahe inọ: “Ọsẹ mai nọ ọ rrọ obọ odhiwu, . . . jọ Uvie ra o ze.”—Matiu 6:9, 10.

Uvie Ọghẹnẹ u ti su otọakpọ na, u ve ti si ebẹbẹ gbe uye-oruẹ kpobi no otọ. A rẹ ruẹ obọ Uvie nana nọ u ti su otọakpọ na ha! Oyejabọ nọ Jesu ọ rọ daoma gaga re ọ vuẹ ahwo “usi uwoma Uvie na” evaọ okenọ ọ jọ otọakpọ, yọ ọ vuẹ ilele riẹ nọ a ru epọvo na re.—Matiu 4:23; 24:14.

Uyoyou nọ Jihova o wo kẹ ahwo-akpọ u ru nọ ọ rọ ya eyaa inọ o ti ru eware iwoma nana kpobi kẹ ae. Kọ onana u gbe ru nọ whọ rọ gwọlọ riẹ Ọghẹnẹ ziezi je si kẹle iẹe? Erere vẹ who ti wo nọ who te ru ere? Uzoẹme nọ o rrọ aro na o te kuyo nana.