Kọ Whọ Ginẹ Riẹ Ọghẹnẹ?
Ahwo buobu a rẹ ta nọ a riẹ Ọghẹnẹ. Rekọ whọ tẹ nọ ae oghẹrẹ ohwo nọ Ọghẹnẹ ọ rrọ, iyo nọ a rẹ kẹ i re wo ohẹriẹ. Rọkẹ ahwo jọ, Ọghẹnẹ yọ obruoziẹ ọgeva nọ ọ rẹ gwọlọ kẹ ahwo uye ẹsikpobi fiki iruthọ rai. Rọkẹ amọfa, Ọghẹnẹ ọ rrọ yoyou yọ ọ rẹ rọvrẹ ẹsikpobi ghelọ oware nọ a ru kẹhẹ. Ghele na, amọfa a roro nọ Ọghẹnẹ o thabọ no omai yọ ọ be daezọ mai hi. Eriwo sa-sa nana u ru nọ ahwo buobu a bi ro roro nọ a sae riẹ Ọghẹnẹ hẹ.
Kọ u wuzou re a riẹ Ọghẹnẹ? Ee, u wuzou gaga. Whọ tẹ riẹ Ọghẹnẹ ziezi, whọ te riẹ ẹjiroro nọ Ọghẹnẹ ọ rọ ma ahwo, je yeri emamọ uzuazọ. (Iruẹru Ikọ 17:26-28) Epanọ who si kẹle Ọghẹnẹ te, ere o re you owhẹ je fiobọhọ kẹ owhẹ te re. (Jemis 4:8) Mai wuzou na, whọ tẹ riẹ Ọghẹnẹ ziezi, whọ sai wo uzuazọ ebẹdẹ bẹdẹ.—Jọn 17:3.
Ẹvẹ whọ sae rọ riẹ Ọghẹnẹ? Dai roro kpahe ogbẹnyusu ra jọ nọ whọ riẹ ziezi. Ẹvẹ usu ra kugbei u ro muhọ? Ẹsejọhọ whọ kake riẹ odẹ riẹ, uruemu riẹ, eware nọ e rẹ were iẹe gbe enọ e rẹ dhae eva, eware nọ o ru no gbe enọ ọ gwọlọ ru, gbe eware itieye efa. Eware nana nọ whọ riẹ kpahe ohwo na i ru nọ who ro si kẹle iẹe.
Epọvo na re, ma sae riẹ Ọghẹnẹ nọ ma tẹ riẹ iyo enọ nọ e rrọ obotọ na:
Uwou-Eroro nana o ta kpahe iyo nọ Ebaibol na ọ kẹ kpahe enọ nọ e rrọ obehru na. Izoẹme nọ e rrọ eva riẹ i ti fiobọhọ kẹ owhẹ riẹ ohwo nọ Ọghẹnẹ ọ rrọ. Whọ te jẹ riẹ irere nọ i re te owhẹ nọ who te mu usu okpekpe kugbe Ọghẹnẹ.
Enana E Sae jẹ Were Owhẹ
UWOU-ERORO NA
Didi Odẹ Ọghẹnẹ?
Kọ whọ riẹ nọ Ọghẹnẹ o wo odẹ nọ u ru rie wo ohẹriẹ no eghẹnẹ efa kpobi?
