Didi Odẹ Ọghẹnẹ? Ọghẹnẹ omariẹ ọ ta nọ: “Mẹ họ Jihova. Odẹ mẹ oye.” (Aizaya 42:8) Odẹ oma Ọghẹnẹ o romavia unuẹse nọ u bu te idu ihrẹ (7,000) evaọ Ebaibol na. Ghele na, a jọ efafa Ebaibol buobu rọ odẹ-ova wọhọ “Olori” ro nwene odẹ oma Ọghẹnẹ. Ọghẹnẹ ọ gwọlọ nọ whọ jọ ogbẹnyusu riẹ, yọ ọ gwọlọ nọ who “se odẹ riẹ.”​—Olezi 105:1.

Edẹ-Ova Jihova. A jọ Ebaibol na rọ edẹ-ova sa-sa se Jihova, wọhọ “Ọghẹnẹ,” “Erumeru,” “Ọnọma,” “Ọsẹ,” “Olori,” gbe “Ọnọ Ọ Mai Kpehru.” Iriruo buobu e rrọ Ebaibol na nọ ahwo a jọ rọ odẹ-ova gbe odẹ oma Jihova sei evaọ elẹ rai.​—Daniẹl 9:4.

 Oghẹrẹ nọ Ọghẹnẹ Ọ Rrọ. Ọghẹnẹ yọ ẹzi, fikiere a rẹ ruẹ e riẹ hẹ. (Jọn 4:24) Ebaibol na ọ ta nọ “ohwo ọvo ọ re ruẹ Ọghẹnẹ evaọ oke ovo ho.” (Jọn 1:18) Ebaibol na o dhesẹ nọ oware nọ ma ru o rẹ sae da Ọghẹnẹ, hayo ru eva “were iẹe.”​—Itẹ 11:20; Olezi 78:40, 41.

Iruemu Ọghẹnẹ. Ọghẹnẹ o wo ọriẹwẹ hẹ, fikiere ọ rẹ jẹ ahwo erẹwho kpobi rehọ. (Iruẹru Ikọ 10:34, 35) Ọghẹnẹ o “wo ohrọ-oriọ gbe ọdawẹ,” ọ rẹ “kaki mu ofu hu yọ ọ vọ avọ uyoyou nọ o rẹ hiẹ hẹ gbe uzẹme.” (Ọnyano 34:6, 7) Ghele na, Ọghẹnẹ o wo iruemu ene jọ nọ e viodẹ.

Ogaga. Nọ orọnọ ọye họ “Ọghẹnẹ Erumeru” na, ogaga riẹ u wo umuo ho, fikiere ọ rẹ sai ru oware kpobi nọ ọ ya eyaa riẹ.​—Emuhọ 17:1.

Areghẹ. Ọghẹnẹ o wo areghẹ vi ohwo kpobi. Oyejabọ nọ Ebaibol ọ rọ ta nọ “ọye ọvo o wo areghẹ kpobi” na.​—Ahwo Rom 16:27.

Ẹdhoguo-Okiẹrẹe. Ọghẹnẹ o re ru oware uwoma ẹsikpobi. Iruo riẹ e rrọ “gbagba,” yọ “o re kienyẹ ohwo vievie he.”​—Iziewariẹ 32:4.

Uyoyou. Ebaibol na ọ ta nọ “Ọghẹnẹ họ uyoyou.” (1 Jọn 4:8) Orọnikọ Ọghẹnẹ o re dhesẹ uyoyou ọvo ho​—ọye họ uyoyou. Uyoyou o rẹ wọe ru oware kpobi nọ o bi ru, yọ ma bi wo irere buobu no uyoyou Ọghẹnẹ ze.

Ọghẹnẹ O re Mu Usu Kugbe Ahwo-Akpọ. Ọghẹnẹ yọ Ọsẹ oyoyou mai nọ ọ rrọ obọ odhiwu. (Matiu 6:9) Ma te fi ẹrọwọ họ iẹe, ma sae jọ egbẹnyusu riẹ. (Olezi 25:14) Ọghẹnẹ o tube zizie owhẹ nọ whọ lẹ sei re whọ sai si kẹle iẹe je “gbolo awaọruọ [ra] kpobi kẹe, keme ọ be daezọ [ra].”​—1 Pita 5:7; Jemis 4:8.

Jesu Họ Ọghẹnẹ Hẹ. Jesu o wo ohẹriẹ no emama Ọghẹnẹ efa​—ọye ọvo họ omama nọ Ọghẹnẹ ọ rọ obọ riẹ ma. Oyejabọ nọ Ebaibol na o ro se Jesu Ọmọ Ọghẹnẹ na. (Jọn 1:14) Nọ Jihova ọ ma Jesu no, Jesu ọ tẹ jọ “ọnọ o wo onaa iruo ziezi,” yọ ọye Ọghẹnẹ ọ rọ ma eware nọ i kiọkọ kpobi.​—Itẹ 8:30, 31; Ahwo Kọlọsi 1:15, 16.

 Jesu o se omariẹ Ọghẹnẹ ẹdẹvo ho. Ukpoye, ọ ta nọ: “Mẹ yọ ọnọ o no [obọ Ọghẹnẹ] ze ti dikihẹ kẹe, yọ Ọye o vi omẹ ze.” (Jọn 7:29) Nọ Jesu ọ jẹ ta ẹme kẹ olele riẹ jọ, o se Jihova “Ọsẹ mẹ gbe Ọsẹ rai;” o te je sei “Ọghẹnẹ mẹ gbe Ọghẹnẹ rai.” (Jọn 20:17) Nọ Jesu o whu no, Jihova ọ tẹ kpare iẹe kpobọ odhiwu jẹ kẹe udu-esuo re ọ jọ obọze riẹ.​—Matiu 28:18; Iruẹru Ikọ 2:32, 33.

Jesu Kristi Ọ rẹ Sai Fiobọhọ kẹ Owhẹ Si Kẹle Ọghẹnẹ

Jesu ọ nyaze otọakpọ na re o wuhrẹ omai kpahe Ọsẹ riẹ. Jihova omariẹ ọ ta kpahe Jesu inọ: “Ọnana họ Ọmọzae mẹ, oyoyou mẹ na. Wha gaviezọ kẹe.” (Mak 9:7) Jesu ọ riẹ Ọghẹnẹ vi ohwo kpobi. Ọ ta nọ: “Ohwo ọvo ọ riẹ Ọsẹ na ha ajokpaọ Ọmọ na gbe ohwo kpobi nọ u je Ọmọ na nọ o re dhesẹ Ọsẹ na kẹ.”​—Luk 10:22.

Jesu o dhesẹ iruemu Ọghẹnẹ via gbagba. Jesu ọ rọ aro kele iruemu Ọsẹ riẹ te epanọ ọ rọ ta nọ: “Ohwo kpobi nọ ọ ruẹ omẹ ọ ruẹ Ọsẹ na no re.” (Jọn 14:9) Jesu ọ rọ eme gbe uruemu riẹ dhesẹ ọkpọ uyoyou Ọghẹnẹ kẹ ahwo, yọ onana u si ahwo kẹle Ọghẹnẹ. Ọ ta nọ: “Mẹ họ edhere na gbe uzẹme na gbe uzuazọ na. Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.” (Jọn 14:6) Ọ tẹ jẹ ta nọ: “Egegagọ uzẹme a te rọ . . . ẹzi gbe uzẹme gọ Ọsẹ na, keme evaọ uzẹme, Ọsẹ na ọ be gwọlọ oghẹrẹ ahwo otiọnana re a gọe.” (Jọn 4:23) Dai roro iei! Jihova ọ be gwọlọ ahwo wọhọ owhẹ na nọ e gwọlọ riẹ uzẹme na kpahe iẹe.