“O Ọnọ o re yo olẹ, whẹ họ ọnọ oghẹrẹ ahwo kpobi a rẹ nyabru ze.”​—Olezi 65:2.

Ahwo jọ a rẹ ta nọ oware nọ a be rọ lẹ họ, nọ a tẹ lẹ no, udu u re te ae otọ orọnikọ fikinọ u mu ae ẹro nọ ohwo jọ ọ be gaviezọ kẹ elẹ rai hi. Rekọ ere o rrọ họ. Olẹ yọ oware nọ a re ru re udu o ruẹsi te ohwo otọ ọvo ho. Ebaibol na ọ vuẹ omai nọ “Jihova * ọ kẹle enọ i bi bo sei kpobi, enọ e rẹ ta uzẹme nọ a te bi bo sei. . . . O re yo ubo rai rọkẹ obufihọ.”​—Olezi 145:18, 19.

Fikiere u mu omai ẹro nọ Jihova ọ rẹ gaviezọ nọ ahwo nọ a be gọe a tẹ be lẹ sei. Ọ ta nọ: “Wha ti se omẹ jẹ nyaze te lẹ se omẹ, mẹ vẹ te gaviezọ kẹ owhai.”​—Jerimaya 29:12.

“Ruabọhọ olẹ.”​—Ahwo Rom 12:12.

Ebaibol na ọ vuẹ omai nọ ma “hae lẹ ẹsikpobi” re ma jẹ “hae jọ evaọ uyero kpobi lẹ.” Onana u dhesẹ vevẹ nọ Jihova ọ gwọlọ nọ ma hae lẹ sei.​—Matiu 26:41; Ahwo Ẹfisọs 6:18.

Fikieme Ọghẹnẹ ọ rọ gwọlọ nọ ma hae lẹ sei? Roro kpahe onana: Kọ eva e gbẹ were ọsọmọ, nọ ọmọ ọsese riẹ ọ tẹ nyabru ei ze jẹ vuẹe nọ o fiobọhọ kẹe ru oware jọ? O sae jọ nọ ọsẹ na ọ tubẹ riẹ oware nọ ọmọ na ọ gwọlọ no vẹre taure ọmọ na ọ tẹ te ta dede. Rekọ nọ ọmọ na ọvo ọ rọ unu riẹ ta na, u re ru eva were ọsẹ na keme ọ riẹ nọ ọmọ na o fievahọ iẹe, o te je rri rie nọ ọsẹ oyoyou ọ ginẹ rrọ. Epọvo na re, nọ ma tẹ be hae lẹ se Jihova, u re dhesẹ kẹe nọ ma gine fievahọ iẹe yọ ma gwọlọ si kẹle iẹe.​—Itẹ 15:8; Jemis 4:8.

“Wha gbolo awaọruọ rai kpobi kẹe, keme ọ be daezọ rai.”​—1 Pita 5:7.

Ọghẹnẹ ọ gwọlọ nọ ma lẹ sei, keme o you omai gaga jẹ be daezọ mai. Ọ riẹ ebẹbẹ mai gbe eware nọ ma be ruawa rai, yọ ọ ginẹ gwọlọ fiobọhọ kẹ omai.

Kẹse kẹse Devidi ovie na ọ jẹ hae lẹ se Jihova re o fiobọhọ kẹe, yọ ọ jẹ hae vuẹe oware kpobi nọ o be kẹe uye. (Olezi 23:1-6) Kọ ẹvẹ Ọghẹnẹ o rri Devidi? Ọghẹnẹ o you Devidi, yọ ọ jẹ gaviezọ kẹ elẹ riẹ ghele epanọ i bu te kẹhẹ. (Iruẹru Ikọ 13:22) Ere ọvona re, Ọghẹnẹ o re yo elẹ mai keme ọ be daezọ mai.

Omọvo ahwo nọ a kere obe Ilezi na ọ ta ẹme yena. U mu rie ẹro nọ Ọghẹnẹ o bi yo elẹ riẹ, yọ oyena u fiobọhọ kẹe gaga. U ru nọ o ro si kẹle Ọghẹnẹ, o te wo ẹgba nọ o je ro thihakọ ebẹbẹ kpobi nọ i te rie evaọ uzuazọ.​—Olezi 116:1-9.

U te gine mu omai ẹro nọ Ọghẹnẹ ọ be gaviezọ kẹ elẹ mai, u ti ru nọ ma te hae rọ lẹ sei ẹsikpobi. Joma ta kpahe ọzae jọ nọ a re se Pedro nọ ọ be rria ofẹ jọ evaọ Spain. Asidẹnte o kpe ọmọzae riẹ nọ ọ jọ ikpe ikpegbizii. Onana u ru nọ uweri ogaga o rọ jariẹ oma. Fikiere ọ jẹ lẹ se Ọghẹnẹ kẹse kẹse inọ o fiobọhọ kẹe jẹ sasa iẹe oma, yọ ọ jẹ ta oware nọ o rrọ eva riẹ kpobi kẹe. Kọ Ọghẹnẹ o yo elẹ Pedro na? Ee. Ọ ta nọ: “Jihova o yo elẹ mẹ na, ọ tẹ rehọ inievo nọ ma gbẹ rrọ ukoko ro fiobọhọ kẹ omẹ avọ aye mẹ jẹ sasa omai oma.”

Ginọ uzẹme nọ elẹ nọ Pedro ọ jẹ lẹ na i zihe ọmọzae riẹ na ze he, rekọ i fiobọhọ kẹe avọ uviuwou riẹ gaga. Aye riẹ nọ a re se María ọ ta nọ: “Olẹ u fiobọhọ kẹ omẹ thihakọ edada nọ e jọ omẹ oma. Mẹ riẹ nọ Jihova ọ riẹ epanọ oware na o jẹ da omẹ te, keme ẹsikpobi nọ mẹ tẹ lẹ sei, udu u re te omẹ otọ.”

Ma te se Ebaibol na je yo iku eware nọ e via kẹ ahwo, u re ru omai riẹ nọ Ọghẹnẹ o re gine yo elẹ. O make rrọ ere na, orọnikọ elẹ kpobi Ọghẹnẹ o re yo ho. Kọ fikieme Ọghẹnẹ o re ro yo elẹ jọ nọ o gbe ro yo ejọ họ?