“Otẹrọnọ wha tẹ yare Ọsẹ na oware jọ kpobi, ọ te rehọ iẹe kẹ owhai evaọ odẹ mẹ.”​—Jọn 16:23.

Eme nọ Jesu ọ ta na i dhesẹ vevẹ nọ Jihova ọ gwọlọ nọ odẹ Jesu ma rẹ rọ lẹ orọnikọ iwoho, odẹ erẹri na, odẹ ikọ-odhiwu hayo odẹ esẹ-esẹ anwae mai hi. Nọ ma tẹ rọ odẹ Jesu lẹ se Ọghẹnẹ, u re dhesẹ nọ ma vuhumu nọ ogbẹrọ Jesu nọ o whu kẹ omai hi, Ọghẹnẹ ọ hai yo elẹ mai hi. Jesu omariẹ ọ ta nọ: “Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.”​—Jọn 14:6.

“Wha ta eva rai kpobi kẹe.”​—Olezi 62:8.

Nọ ma tẹ be lẹ se Jihova, u fo nọ ma rẹ ta ẹme kẹe wọhọ ẹsenọ ma be ta ẹme kẹ ọsẹ oyoyou mai. O gwọlọ nọ ma rẹ ta eva mai kẹe avọ adhẹẹ, orọnikọ ma re se olẹ na no obe ze hayo ta eme nọ ma se fihọ uzou no ho.

“Oware kpobi nọ ma yare riẹ nọ o rọwokugbe oreva riẹ, ọ rẹ gaviezọ kẹ omai.”​—1 Jọn 5:14.

Jihova ọ jọ Ebaibol na vuẹ omai oware nọ o ti ru kẹ omai gbe oware nọ ọ gwọlọ nọ ma ru. Fikiere, re Jihova ọ sai yo elẹ mai, elẹ na e rẹ “rọwokugbe oreva riẹ.” Yọ, re elẹ mai e sae jọ ere, o gwọlọ nọ ma re wuhrẹ Ebaibol na re ma sae riẹ Ọghẹnẹ ziezi. Ma te ru ere, elẹ mai e te were Ọghẹnẹ.

Lẹ Se Ọghẹnẹ Kpahe Eware nọ Whọ Gwọlọ. Ma sae lẹ re Ọghẹnẹ o fiobọhọ kẹ omai wo emu okpẹdoke, iwu, gbe uwou nọ ma rẹ rria. Ma sae jẹ lẹ re ọ kẹ omai areghẹ nọ ma rẹ rọ jẹ emamọ iroro gbe ẹgba nọ ma re ro thihakọ ebẹbẹ. Ma rẹ jẹ lẹ re Ọghẹnẹ o fiobọhọ kẹ omai wo ẹrọwọ, re ọ rọvrẹ omai, hayo re o fiobọhọ kẹ omai nọ ma tẹ gwọlọ ru oware jọ.​—Luk 11:3, 4, 13; Jemis 1:5, 17.

Lẹ Roro Amọfa. Eva e rẹ were esẹgbini nọ a tẹ ruẹ nọ emọ rai a you ohwohwo. Ere ọvona eva e rẹ were Jihova nọ ọ tẹ ruẹ nọ mai emọ riẹ nọ e rrọ obọ otọakpọ obonẹ ma you ohwohwo. Fikiere, u fo nọ ma lẹ roro ọzae hayo aye mai, emọ mai, imoni mai, gbe egbẹnyusu mai. Jemis olele na ọ ta nọ ma “lẹ kẹ ohwohwo.”​—Jemis 5:16.

Hai Yere Ọghẹnẹ. Ebaibol na ọ ta kpahe Ọghẹnẹ nọ ọ ma omai na nọ: “O bi ru ewoma ẹkwoma iso gbe ezi-ezi nọ ekakọ e rẹ rọ mọ ziezi nọ ọ be kẹ owhai, ọ be kẹ owhai emuore buobu jẹ be rọ oghọghọ vọ udu rai.” (Iruẹru Ikọ 14:17) Ma te roro kpahe eware nọ Ọghẹnẹ o bi ru kẹ omai, ma re yere iei nọ ma tẹ be lẹ sei. Edhere ọfa nọ ma re ro yere Ọghẹnẹ họ, izi riẹ nọ ma re koko.​—Ahwo Kọlọsi 3:15.

Ẹsejọ, nọ Ọghẹnẹ ọ gbẹ nwani ru eware nọ ma lẹ sei ẹsiẹsiẹ hẹ, o rẹ kẹ omai uye. Kọ onana u dhesẹ nọ Ọghẹnẹ ọ be daezọ mai hi? Vievie! Joma ta kpahe iriruo ahwo jọ nọ i dhesẹ nọ u fo nọ ma rẹ gbẹ lẹ ghele nọ Ọghẹnẹ ọ gbẹ make kuyo olẹ mai evaọ oghẹrẹ nọ ma gwọlọ họ.

Steve nọ ma ta ẹme kpahe evaọ uzoẹme ọsosuọ na ọ ta nọ, “O gbẹ rrọ olẹ hẹ, mẹ hai gbe wo evawere hayo ẹruore evaọ akpọ mẹ hẹ.” Kọ eme o fiobọhọ kẹe nọ ọ sae rọ ruabọhọ olẹ? Ebaibol na nọ o je wuhrẹ u fiobọhọ kẹe. Ọ tẹ te ruẹ nọ u fo nọ ọ rẹ hai dhe ẹlẹlẹ. Ọ ta nọ: “Mẹ be hai yere Ọghẹnẹ rọkẹ egbẹnyusu iyoyou mẹ nọ i fiobọhọ kẹ omẹ. Eva e be were omẹ enẹna vi epaọ anwẹdẹ kpobi.”

Kọ ẹvẹ kpahe Jenny nọ o je rri omariẹ nọ o te ohwo nọ Ọghẹnẹ o re yo elẹ riẹ hẹ? Ọ ta nọ: “Fikinọ me je rri omamẹ nọ me fioka ha, mẹ tẹ lẹ se Ọghẹnẹ re o fiobọhọ kẹ omẹ rri omamẹ epanọ u fo.” Kọ ẹvẹ olẹ nọ ọ lẹ na o sai ro fiobọhọ kẹe? Ọ ta nọ: “Olẹ u fiobọhọ kẹ omẹ rri omamẹ epanọ Ọghẹnẹ o bi rri omẹ. Mẹ tẹ te ruẹ nọ udu mẹ o tẹ make be vuẹ omẹ nọ me fioka ha, ere Ọghẹnẹ o bi rri omẹ hẹ. Olẹ u te je fiobọhọ kẹ omẹ gbaemu nọ mẹ rẹ dao utho ẹgba mẹ kpobi re me ru oware nọ Ọghẹnẹ ọ gwọlọ.” Kọ erere vẹ o te rie no? Ọ ta nọ: “Olẹ u ru nọ mẹ rọ ruẹ nọ Jihova yọ Ọghẹnẹ nọ ọ rrọ wowou, Ọsẹ gbe Ogbẹnyusu mẹ, yọ o ti fiobọhọ kẹ omẹ ẹsikpobi nọ mẹ be daoma ru oware nọ o rẹ were iẹe na.”

Joma ta kpahe omọfa jọ nọ a re se Isabel. Okenọ o dihọ, edọkita e tẹ vuẹe nọ ọmọ nọ o ti yẹ na ọ te ko no eva ze. Oware na o tẹ kẹe uye gaga. Ahwo jọ dede a tubẹ vuẹe nọ ọ kpare eva na. Isabel ọ ta nọ: “Oware na o kẹ omẹ uye te epanọ me je ro roro nọ iroro i ti kpe omẹ no dede.” Kọ eme o ru? Ọ ta nọ: “Ẹlẹlẹ ọvo mẹ jẹ lẹ se Ọghẹnẹ inọ o fiobọhọ kẹ omẹ.” Nọ oke u te, o te yẹ ọmọzae, nọ a se odẹ riẹ Gerard, yọ ọ ginẹ ko wọhọ epanọ edọkita e ta na. Kọ Isabel o roro nọ Ọghẹnẹ ọ tehe ezọ di kẹ elẹ riẹ? Vievie! Ọ ta nọ: “Ọmọ mẹ na o te ikpe ikpegbene no. Yọ, mẹ tẹ ruẹ e riẹ nọ o bi yeri akpọ riẹ vrẹ avọ evawere dede nọ ọ ko na, u re ru omẹ riẹ nọ elẹ mẹ Ọghẹnẹ ọ ginẹ kuyo rai na. Ọmọ na yọ oghale ulogbo nọ u no obọ riẹ ze.”

Eme nọ ahwo nana a ta na i re ru omai kareghẹhọ eme nọ ọso-ilezi na ọ ta, inọ: “Who ti yo ayare enọ e be romakpotọ na, O Jihova. Who ti ru ai kru udu ga je muẹrohọ ae ziezi.” (Olezi 10:17) Onana yọ obọdẹ ẹjiroro nọ ma rẹ rọ lẹ ẹsikpobi!

Ma rẹ jọ Ebaibol na ruẹ elẹ buobu nọ Jesu ọ lẹ. Rekọ onọ ahwo a mae riẹ evaọ usu rai họ onọ o wuhrẹ ilele riẹ na. Eme ma rẹ sai wuhrẹ no olẹ yena ze?