María, Raúl, Arne gbe amọfa buobu a rri olẹ wọhọ obọdẹ okẹ nọ a rẹ ruẹ obọ riẹ hẹ. A rri rie wọhọ edhere nọ a sae rọ ta ẹme kẹ Ọghẹnẹ, yere iei, jẹ vuẹe nọ o fiobọhọ kẹ ae. U mu rai ẹro nọ, oware nana nọ Ebaibol ọ ta kpahe olẹ na ginọ uzẹme, inọ: “Ma wo imuẹro nana kpahe Ọghẹnẹ inọ, oware kpobi nọ ma yare riẹ nọ o rọwokugbe oreva riẹ, ọ rẹ gaviezọ kẹ omai.”​—1 Jọn 5:14.

Rekọ ahwo buobu a rọwo oware nọ oria Ebaibol yena o ta kpahe olẹ na ha. Steve ọ ta kpahe oghẹrẹ nọ ọyomariẹ o rri olẹ. Ọ ta nọ: “Okenọ mẹ jọ ikpe ikpegbihrẹ, egbẹnyusu esa mẹ i te whu, asidẹnte o kpe ọjọ, ivẹ nọ i kiọkọ e tẹ da ame whu evaọ obọ abade.” Kọ eme Steve o ru? Ọ ta nọ: “Mẹ jẹ lẹ se Ọghẹnẹ re mẹ riẹ  oware nọ o wha riẹ ze nọ oghẹrẹ eware itieye e rọ via kẹ omẹ, rekọ ọ kuyo olẹ mẹ hẹ. Fikiere mẹ tẹ tubẹ ta nọ mẹ rẹ seba ẹlẹ.” Fikinọ ahwo jọ a roro nọ Ọghẹnẹ ọ kuyo elẹ nọ a lẹ evaọ oke jọ họ, u te ru nọ a be rọ ta nọ olẹ u wiruo ho.

Oware ofa jọ o riẹ nọ o rẹ lẹliẹ ahwo roro nọ olẹ u wiruo ho. A rẹ ta nọ, nọ orọnọ Ọghẹnẹ ọ riẹ eware kpobi na, ọ riẹ eware nọ ma gwọlọ gbe ebẹbẹ nọ i bi te omai, fikiere u du gwọlọ nọ ma rẹ jẹ vuẹe tao ho re ọ tẹ te riẹ.

Amọfa jọ a re roro nọ fiki eware iyoma nọ a ru evaọ oke nọ u kpemu, oyejabọ nọ Ọghẹnẹ o gbe bi ro yo olẹ rai hi na. Jenny ọ ta nọ: “Oware jọ nọ o rẹ kẹ omẹ uye họ, me re rri omamẹ nọ me fioka ha fiki eware jọ nọ me ru evaọ oke nọ u kpemu. Fikiere me re rri omamẹ nọ me te ohwo nọ Ọghẹnẹ o re yo olẹ riẹ hẹ.”

Kọ owhẹ omara, ẹvẹ who rri olẹ? Kọ oghẹrẹ nọ ahwo yena a rri olẹ na, ere who bi rri rie re? O tẹ rrọ ere, oware nọ Ebaibol na ọ ta kpahe olẹ o rẹ sae lẹliẹ eva were owhẹ. Yọ ma sai fievahọ oware nọ Ebaibol na ọ ta kpahe olẹ, * keme o rẹ sai fiobọhọ kẹ omai riẹ iyo enọ wọhọ:

• Kọ Ọghẹnẹ o re gine yo olẹ mai?

• Fikieme Ọghẹnẹ ọ gbẹ rọ kuyo elẹ jọ họ?

• Oghẹrẹ vẹ ma rẹ rọ lẹ re Ọghẹnẹ ọ ruẹsi yo olẹ mai?

• Ẹvẹ olẹ o sai ro fiobọhọ kẹ owhẹ?