Dede nọ Ebaibol na yọ obe imu hu, ehrẹ riẹ i re fiobọhọ kẹ omai. Ohwo nọ o wo ẹbẹbẹ ẹyao iroro o te fi ehrẹ Ebaibol na họ iruo, i re fiobọhọ kẹe. Joma ta kpahe ehrẹ Ebaibol na jọ.

“Ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.”—MATIU 9:12.

Ebaibol na o dhesẹ nọ ma sae nyai siwi oma mai nọ ma tẹ be mọ. Oware jọ nọ u fiobọhọ kẹ ahwo buobu nọ a be mọ ẹyao iroro no họ, a daoma riẹ kpahe ẹyao rai na ziezi, a tẹ jẹ nyae ruẹ edọktọ re o fiobọhọ kẹ ae.

“Oma na nọ a re ru jaja o rẹ kẹ . . . erere.”—1 TIMOTI 4:8.

Whọ tẹ be hae daoma ru eware nọ i re ru oma ra jọ sasasa, u ti fiobọhọ kẹ owhẹ. Eware itiena jọ họ, oma ra nọ who re ru jaja, emamọ emu nọ whọ rẹ re, gbe owezẹ nọ whọ rẹ wezẹ ziezi.

“Udu nọ oghọghọ o rrọ yọ emamọ umu, rekọ uweri u re mi ohwo ẹgba.”—ITẸ 17:22.

Eva e te were owhẹ nọ whọ tẹ be hai se eria Ebaibol nọ e rẹ tuduhọ owhẹ awọ, je ru eware nọ whọ riẹ nọ whọ rẹ sai ru. Whọ tẹ be tẹrovi emamọ eware nọ e be via evaọ uzuazọ, je rẹro nọ eware i ti woma evaọ obaro, onana u ti fiobọhọ kẹ owhẹ thihakọ.

 “Ohwo nọ ọ riẹ umuo nọ ọ rẹ nya ba o wo areghẹ.”—ITẸ 11:2.

Ẹsejọ whọ te ruẹ nọ whẹ ọvo whọ sai ru oware kpobi nọ whẹ gwọlọ ru hu, fikiere ta kẹ amọfa re a fiobọhọ kẹ owhẹ. Ahwo uviuwou ra gbe egbẹnyusu ra a te gwọlọ nọ a re fiobọhọ kẹ owhẹ, rekọ ẹsejọ a sae riẹ oware nọ whọ gwọlọ họ. Fikiere vuẹ ae oware nọ a rẹ sai ru kẹ owhẹ. Rekọ whọ nwani rẹro nọ oware kpobi a ti ru kẹ owhẹ hẹ. Ofariẹ, yere ae rọkẹ oware kpobi nọ a sai ru kẹ owhẹ.

“Nọ mẹ ruẹ nọ oware jọ o be thọ kugbe omẹ, mẹ tẹ nyae ruẹ edọktọ. Yọ edọktọ na ọ ginẹ vuẹ omẹ oware nọ o be kẹ omẹ uye. Onana u fiobọhọ kẹ omẹ riẹ oghẹrẹ ẹyao nọ mẹ be mọ gbe epanọ a sai ro siwi ei.”—Nicole a nọ ọ be mọ ẹyao iroro nọ a re se bipolar disorder.

“Mẹ ruẹ nọ mẹ avọ aye mẹ ma te se Ebaibol na kugbe kohiohiẹ kohiohiẹ, me re roro kpahe emamọ eware nọ e rẹ bọ omẹ ga. Yọ evaọ ẹdẹ kpobi nọ ẹyao mẹ na ọ tẹ rrọ gaga, oria Ebaibol jọ nọ me se o rẹ sasa omẹ oma.”—Peter nọ ọ be mọ ẹyao ọkora.

“Mẹ jẹ sae vuẹ amọfa kpahe ẹyao mẹ na ha fiki oma nọ o jẹ vuomẹ. Rekọ ogbẹnyusu ọkpekpe mẹ jọ ọ romatotọ gaviezọ kẹ omẹ, jẹ daoma riẹ epanọ ẹyao na ọ be kẹ omẹ uye te. O ru oma sasa omẹ, je ru nọ mẹ rọ riẹ nọ amọfa a bi roro kpahe omẹ.”—Ji-yoo nọ ọ be mọ ẹyao nọ ohwo ọ rẹ rọ re emu tere he.

“Ebaibol na o fiobọhọ kẹ omẹ nọ me gbe bi ro ru iruo vrẹ oma ha, jẹ daoma serihọ ziezi. Ehrẹ Ebaibol i fiobọhọ kẹ omẹ nọ mẹ be sae ro thihakọ ẹyao iroro mẹ na.”—Timothy nọ ọ be mọ ẹyao iroro nọ a re se obsessive-compulsive disorder.