Enwenọ ohwo kpobi ọ riẹ nọ eware jọ i woma yọ ejọ i yoma. Wọhọ oriruo, evaọ akpọ na soso ahwo a mukpahe ohwo-okpe, ohwo nọ a rẹ gbadu, gbe emaha nọ a re lele wezẹ. Rekọ ọdawẹ, uwowou, gbe ohrọ-oriọ e rẹ were ahwo. Evaọ ẹme owezẹ ọzae-avọ-aye, sọ ohwo ọ rẹ ta uzẹme, hayo oghẹrẹ nọ a rẹ rọ yọrọ ọmọ, ahwo buobu a re roro nọ ohwo kpobi ọ sai ru onọ u je rie. A rẹ ta nọ onọ ohwo o ru kpobi u kiehọ. Oware nọ ahwo buobu a re rri rọ jiroro họ, oghẹrẹ nọ a rri oware gbe oghẹrẹ nọ amọfa a rri oware na. Kọ ohwo ọ sae ginẹ rọ ere jẹ emamọ iroro?

Ẹsibuobu oware nọ ma re rri rọ jiroro họ, epanọ ma rri oware hayo oware nọ obruoziẹ-iroro mai ọ ta kẹ omai. (Ahwo Rom 2:14, 15) Makọ emọ nọ e gbẹ maha dede, a riẹ oware nọ u kiehọ gbe oware nọ u kiehọ họ, yọ ẹsejọ udu u re brukpe ae nọ a te ru oware nọ o thọ. Nọ oke o be nya na, ma re wuhrẹ eware buobu nọ e rẹ kpọ obruoziẹ-iroro mai. Ma sai wuhrẹ eware nana mi ahwo uviuwou mai, ehwa mai, iticha mai, ahwo ẹwho mai, gbe egagọ mai. Fikiere nọ ma te ru oware jọ, obruoziẹ-iroro mai ọ rẹ vuẹ omai sọ oware nọ ma ru na u woma hayo u yoma.

Obruoziẹ-iroro mai ọ sae wọ omai dhesẹ ọdawẹ, uwowou, gbe ohrọ-oriọ kẹ amọfa. Ọ sai je fiobọhọ kẹ omai kẹnoma kẹ eware nọ e rẹ kẹ ahwo uviuwou mai uye, hayo whaha eware nọ e rẹ wha omovuọ se omai jẹ lẹliẹ udu brukpe omai.

Kọ ma sae rọ oghẹrẹ nọ ma rri oware ọvo jẹ emamọ iroro? Ọmọzae jọ nọ a re se Garrick o je yeri uzuazọ epanọ o were riẹ. Ọ ta nọ, “Mẹ gwọlọ nọ me re ru oware kpobi nọ u je omẹ.” Rekọ ọ ruẹ nọ oghẹrẹ uzuazọ yena u fiobọhọ kẹe he. Ọ ta nọ eva e jẹ were iẹe vievie he keme o je “gbe-ọfariẹ, lọ imu egaga, da idi thomawa, yọ ọ jẹ hai ru ozighi gaga.”

U te no epanọ ma bi rri oware no, oware ofa jọ nọ ma rẹ gwọlọ roro kpahe nọ ma tẹ be jiroro họ,  oghẹrẹ nọ amọfa a rri oware nọ ma gwọlọ ru na. Ma sai ru eware avọ areghẹ nọ ma te wuhrẹ no eware nọ e via kẹ amọfa ze. Ahwo uviuwou mai, egbẹnyusu mai, gbe ahwo ẹwho mai a rẹ kẹ omai adhẹẹ nọ ma te ru oware nọ a rri nọ u kiehọ.

Kọ ma sae rọ epanọ amọfa a rri oware jẹ emamọ iroro? Ọmọtẹ jọ nọ a re se Priscila o je ru eware nọ ehwa riẹ buobu a je ru, o je lele emezae wezẹ epanọ u je rie. Dede nọ ahwo a rri oghẹrẹ uzuazọ yena fihọ oware nọ o thọ họ, eva e jẹ were iẹe ghele he. Ọ ta nọ: “Mẹ jẹ wereva ha dede nọ me je ru eware nọ ehwa mẹ a je ru. Mẹ jẹ hai ru eware igheghẹ yọ me je fi uzuazọ mẹ họ ọza.”

Ma tẹ be jiroro oware nọ ma re ru, oghẹrẹ nọ ma rri oware gbe oghẹrẹ nọ amọfa a rri rie u wuzou gaga. Rekọ oyena ovo o rẹ sai fiobọhọ kẹ omai jẹ emamọ iroro ẹsikpobi hi. Ẹsejọ ma sai ru oware nọ o rẹ wha uye se omai gbe amọfa keme ma roro te he. (Itẹ 14:12) Ofariẹ, ma tẹ maki roro nọ oware jọ u woma yọ amọfa a rri rie ere re, o sae wha uye ze ghele keme nọ oke o be nya na, oghẹrẹ nọ ahwo a rri oware o sai nwene. Wọhọ oriruo, oghẹrẹ uruemu nọ ahwo a jẹ hai rri nọ o thọ vẹre, a gbe bi sei gbe oware ovo enẹna ha. Yọ uruemu nọ ahwo a jẹ hai rri nọ u woma vẹre, enẹna ahwo a bi rri rie fihọ ekpehre uruemu.

Kọ u wo oware jọ nọ o rẹ sai fiobọhọ kẹ omai riẹ oware nọ u kiehọ gbe oware nọ u kiehọ họ? Kọ u wo oria jọ nọ ma sae jọ ruẹ ehrẹ nọ i re fiobọhọ kẹ omai enẹna gbe ikpe buobu nọ e be tha?

Eva e were omai inọ u wo oria jọ nọ ma sae jọ ruẹ ehrẹ nọ i re fiobọhọ kẹ omai kpobi makọ oria nọ ma no ze kẹhẹ. Evaọ uzoẹme nọ o rrọ aro na, ma te ta kpahe oria nọ ma sae jọ ruẹ ehrẹ nọ i re fiobọhọ kẹ omai riẹ oware uwoma gbe uyoma.