Oware Uwoma gbe Uyoma: Ehrẹ Ebaibol I re Fiobọhọ kẹ Omai
Joma ta kpahe eware ene jọ nọ Ebaibol na ọ jọ fiobọhọ kẹ ima ahwo buobu no.
1. Orọo
Ahwo a rẹ ta eware sa-sa kpahe orọo gbe epanọ ohwo ọ sai ro wo evawere evaọ orọo riẹ.
EBAIBOL Ọ TA NỌ: “Whai omomọvo o re you aye riẹ hrọ wọhọ epanọ o you omobọ riẹ; evaọ abọdekọ riẹ, jọ aye o wo adhẹẹ odidi kẹ ọzae riẹ.”—Ahwo Ẹfisọs 5:33.
OWARE NỌ U DHESẸ: Ọghẹnẹ họ ọnọ ọ to orọo họ, fikiere ọ riẹ oware nọ u fo nọ ọzae-avọ-aye a re ru re a sai wo evawere evaọ orọo rai. (Mak 10:6-9) Ọzae-avọ-aye a re wo evawere nọ a tẹ be daezọ ohwohwo je roro kpahe oware nọ a rẹ sai ru kẹ ohwohwo, viukpenọ a re roro kpahe omobọ rai ọvo. Ọzae nọ o you aye riẹ ọ rẹ rẹrotei jẹ riẹe ru ziezi. Aye nọ o wo adhẹẹ kẹ ọzae riẹ o re dhesẹ iẹe evaọ uruemu riẹ gbe oghẹrẹ nọ ọ rẹ ta ẹme kẹ ọzae riẹ.
EHRẸ EBAIBOL I RE FIOBỌHỌ: Ọzae jọ nọ a re se Quang avọ aye riẹ Thi nọ a rrọ ahwo Vietnam, a jẹ wereva evaọ orọo rai hi. Quang ọ jẹ riẹ aye riẹ ru hu. Ọ ta nọ: “Mẹ jẹ daezọ riẹ vievie he yọ ẹsibuobu mẹ jẹ hai kpe omovuọ họ iẹe oma.” Fikiere Thi ọ tẹ gwọlọ nọ a fa orọo na. Thi ọ ta nọ: “Me rri rie nọ ọzae mẹ o gbe te ohwo nọ me re fievahọ hayo kẹ adhẹẹ hẹ.”
Uwhremu na, Quang avọ Thi a te wuhrẹ Ebaibol na. A tẹ gwọlọ nọ a re ru oware nọ Ebaibol na ọ ta evaọ obe Ahwo Ẹfisọs 5:33 evaọ orọo rai. Quang ọ ta nọ, “Oria ikere nana u fiobọhọ kẹ omẹ ruẹ nọ u fo re mẹ riẹ aye mẹ ru.” Ọ ta re nọ, “Mẹ ruẹ nọ u fo nọ me re you aye mẹ, rẹrotei ziezi, fiobọhọ kẹe, jẹ sasa iẹe oma. Nọ me ru ere, mẹ ruẹ nọ aye mẹ o you omẹ yọ ọ jẹ kẹ omẹ adhẹẹ.” Yọ Thi ọ ta nọ, “Nọ mẹ daoma ru oware nọ Ebaibol na ọ ta evaọ obe Ahwo Ẹfisọs 5:33 na, jẹ rọ adhẹẹ kẹ ọzae mẹ, mẹ ruẹ nọ o you omẹ, ọ tẹ be rẹrote omẹ je ru eva were omẹ.”
Re whọ gbẹ riẹ eware efa kpahe orọo, se Awake! Ọrọ 2, 2018, nọ uzoẹme riẹ o ta nọ, “Eware 12 nọ I re Ru Evawere jọ Uviuwou” evaọ jw.org.
2. Epanọ U Fo nọ Ma re Ru Amọfa
Ẹsibuobu ahwo a rẹ riẹ amọfa ru hu fikinọ a no orẹwho ọfa ze, yọ ovioma, uyẹ, gbe egagọ rai u wo ohẹriẹ.
EBAIBOL Ọ TA NỌ: “Wha rọ ọghọ kẹ oghẹrẹ ahwo kpobi.”—1 Pita 2:17.
OWARE NỌ U DHESẸ: Ma re mukpahe ohwo ho ghelọ ovioma riẹ hayo orẹwho nọ o no ze. Yọ makọ ezae avọ ezae hayo eyae avọ eyae nọ e rọo ohwohwo dede, ma re mukpahe ae he. Ukpoye, Ebaibol na ọ tuduhọ omai awọ re ma rọ adhẹẹ kẹ ahwo kpobi, ghelọ uyẹ hayo orẹwho nọ a no ze, te edafe te iyogbe. (Iruẹru Ikọ 10:34) Otẹrọnọ eware nọ ma rọwo i wo ohẹriẹ no erọ amọfa hayo oghẹrẹ nọ a re ru eware, mẹ rẹ gbẹ jọ wowou kugbe ae jẹ kẹ ae adhẹẹ.—Matiu 7:12.
EHRẸ EBAIBOL I RE FIOBỌHỌ: No emaha ze, a wuhrẹ Daniel re o rri ahwo nọ a no Asia ze wọhọ ewegrẹ orẹwho riẹ. O te mukpahe ahwo kpobi nọ a no unuakpọ yena ze, yọ ọ rẹ la ae eka evaọ oria kpobi. Daniel ọ ta nọ, “Mẹ jẹ ta kẹ omamẹ nọ ‘orẹwho mẹ mẹ be tha uke na.’” Ọ ta re nọ, “Me roro ẹdẹvo ho inọ oware nọ me je ru na o thọ.”
Uwhremu na, Daniel o te wuhrẹ Ebaibol na. Ọ ta nọ, “Mẹ ruẹ nọ u fo re me nwene iroro mẹ. U fo nọ me re rri ahwo oghẹrẹ nọ Ọghẹnẹ o bi rri rai, inọ mai kpobi epọvo na ghelọ oria nọ ma no ze kẹhẹ.” Daniel ọ ta epanọ o bi rri ahwo kpobi nọ ọ nyaku enẹna. Ọ ta nọ: “Ẹsibuobu me re tube roro kpahe oria nọ a no ze dede he. Enẹna me you oghẹrẹ ahwo kpobi, yọ me wo egbẹnyusu evaọ eria sa-sa.”
Re whọ gbẹ riẹ eware efa, se Awake! No. 3, 2020, nọ uzoẹme riẹ o ta nọ, “Is There a Cure for Prejudice?” evaọ jw.org.
3. Ugho
Ahwo buobu a rẹ gwọlọ epanọ a re ro fe, keme a roro nọ ere a sai ro wo evawere je yeri emamọ uzuazọ.
EBAIBOL Ọ TA NỌ: “Areghẹ ọ rẹ thọ ohwo nwane wọhọ epanọ ugho o rẹ thọ ohwo na, rekọ oware nọ eriariẹ o rọ mai woma ona: Areghẹ ọ rẹ sẹro uzuazọ ọnọ o wo rie.”—Ọtausiuwoma Na 7:12.
OWARE NỌ U DHESẸ: Ma gwọlọ ugho, rekọ ugho o rẹ wha evawere ze he, hayo fiobọhọ kẹ omai yeri emamọ uzuazọ họ. (Itẹ 18:11; 23:4, 5) Ukpoye, ma re wo uvi evawere je yeri emamọ uzuazọ nọ ma te bi ru oware nọ Ọghẹnẹ ọ ta evaọ Ebaibol na.—1 Timoti 6:17-19.
EHRẸ EBAIBOL I RE FIOBỌHỌ: Ọzae jọ nọ a re se Cardo nọ ọ be rria Indonesia ọ jẹ gwọlọ epanọ o re ro fe. Ọ ta nọ, “Me wo ikpeware buobu nọ ahwo a be gwọlọ evaọ uzuazọ.” Ọ ta re nọ, “Me re kpohọ erẹwho sa-sa, mẹ rẹ dẹ imoto, iwou gbe eware efa nọ e rrọ ghaghae.” Rekọ efe riẹ o kri hi. Cardo ọ ta nọ, “A fi omẹ iwhayo, fikiere igho nọ mẹ ruẹ uye kokohọ evaọ ikpe buobu na e tẹ da ruọ ebe no evaọ emaharo gheghe.” Ọ ta re nọ, “Evaọ ikpe buobu, mẹ daoma re me fe, rekọ ukuhọ riẹ kọ ababọ, eva e gbẹ jẹ were omẹ hẹ yọ me je rri omamẹ nọ me fioka ha.”
Uwhremu na, Cardo o te lele ohrẹ nọ Ebaibol na ọ kẹ kpahe ugho. Ọ gbẹ jẹ gwọlọ epanọ o re ro fe he, rekọ epanọ o re ro yeri uzuazọ avọ umutho eware. Ọ ta nọ, “Efe nọ ọ mai woma nọ ọ rẹ tọ họ, nọ ohwo o te wo usu okpekpe kugbe Ọghẹnẹ. Mẹ be wezẹ dhedhẹ yọ eva e be were omẹ ziezi enẹna.”
Re whọ gbẹ riẹ eware efa nọ Ebaibol na ọ ta kpahe ugho, se uzoẹme na “Kọ Isukulu gbe Ugho I re Ru Ohwo Yeri Emamọ Uzuazọ?” evaọ Uwou-Eroro Na Ọrọ avọ 3, 2021, evaọ jw.org.
4. Owezẹ Ọzae-avọ-Aye
Ahwo a rẹ ta eware sa-sa kpahe oware nọ u fo gbe onọ u fo ho evaọ ẹme owezẹ ọzae-avọ-aye.
EBAIBOL Ọ TA NỌ: “Wha . . . siomano ọfariẹ-ogbe. U fo re omomọvo rai ọ riẹ epanọ o re ro su oma riẹ re ọ sae jọ ọrẹri je wo ọghọ, orọnikọ avọ isiuru egaga kẹ owezẹ ọzae-avọ-aye nọ e vrẹta ha wọhọ epaọ erẹwho na nọ e riẹ Ọghẹnẹ hẹ.”—1 Ahwo Tẹsalonika 4:3-5.
OWARE NỌ U DHESẸ: Ebaibol na o dhesẹ nọ orọnikọ ohwo kpobi ma re lele wezẹ hẹ. “Ọfariẹ-ogbe” họ ẹnwae-obro, igberẹ-ibro, imava nọ e re rọo ho nọ a rẹ wezẹ kugbe, ọzae avọ ọzae hayo aye avọ aye nọ a rẹ wezẹ kugbe, gbe erao nọ a re lele wezẹ. (1 Ahwo Kọrint 6:9, 10) Owezẹ ọzae-avọ-aye yọ okẹ nọ u no obọ Ọghẹnẹ ze. Yọ u fo nọ ọzae-avọ-aye nọ a rọo no ọvo a re lele ohwohwo wezẹ.—Itẹ 5:18, 19.
EHRẸ EBAIBOL I RE FIOBỌHỌ: Aye jọ nọ a re se Kylie nọ ọ be rria Australia ọ ta nọ: “Okenọ mẹ re rọo ho, me je roro nọ me te lele ọzae wezẹ ẹsiẹe o re you omẹ jẹ rẹrote omẹ. Rekọ o via ere he. Ukpoye o you omẹ hẹ, eva e gbẹ jẹ were omẹ hẹ.”
Uwhremu na, Kylie o te wuhrẹ Ebaibol na. O te je lele ohrẹ Ebaibol kpahe owezẹ ọzae-avọ-aye. Ọ ta nọ, “Mẹ ruẹ vevẹ nọ ehrẹ Ebaibol e rẹ thọ ohwo, je ru nọ ohwo o gbe ro kie ruọ ẹbẹbẹ hẹ.” Ọ ta re nọ, “Enẹna eva e be were omẹ, mẹ rrọ kugbe ahwo nọ a gine you omẹ keme me bi ru oware nọ Jihova ọ gwọlọ. Fikinọ me bi ru oware nọ Ebaibol na ọ ta, me gbe bi ru eware nọ e rẹ wha uye se omẹ hẹ!”
Re whọ gbẹ riẹ kpahe eware efa, se uzoẹme nana evaọ jw.org, “Eme Ebaibol na Ọ Ta Kpahe Imava nọ E re Rọo Ho nọ A rẹ Rria Kugbe?”
Ọghẹnẹ họ ọnọ ọ ma omai. O re fiobọhọ kẹ omai riẹ oware uwoma gbe uyoma. Dede nọ o rẹ nwane lọhọ ẹsikpobi re ma ru oware nọ ọ ta ha, u fo nọ ma rẹ daoma. Ma riẹ nọ ma te yoẹme kẹe, eva e rẹ were omai.
