Oware Uwoma gbe Uyoma: Ma Sai Fievahọ Ebaibol Na
Otẹrọnọ epanọ mai gbe amọfa a rri oware ma re rri rọ jiroro ẹsikpobi, ma sae jiroro thọ. Ebaibol na ọ ta oware nọ o rrọ rọ ere. Ofariẹ, Ebaibol na o re fiobọhọ kẹ omai riẹ oware nọ u woma gbe onọ u yoma re ma sae riẹ onọ u fo nọ ma re ru. Enẹ ma sai ro wo evawere.
EHRẸ EBAIBOL I RE FIOBỌHỌ KẸ OMAI
Jihova a ọ jọ Ebaibol na ta nọ ohwo-akpọ o wo ogaga nọ ọ rẹ rọ kpọ ithihi riẹ hẹ. Ọ gwọlọ nọ ma rẹ rẹroso iẹe re o fiobọhọ kẹ omai. (Jerimaya 10:23) Oyejabọ nọ ọ rọ kẹ omai ehrẹ nọ e rrọ Ebaibol na re e kpọ omai. Ọghẹnẹ o you omai yọ ọ gwọlọ nọ ọ rẹ thọ omai. Ọ riẹ nọ ma tẹ jẹ ekpehre iroro, ma rẹ ruẹ uye riẹ yọ eva e te gbẹ were omai hi. (Iziewariẹ 5:29; 1 Jọn 4:8) U te no ere no, ọye ọ ma omai. O wo areghẹ gbe eriariẹ vi omai thethabọ, fikiere ọ sae kẹ omai ehrẹ nọ i re fiobọhọ kẹ omai. (Olezi 100:3; 104:24) Ghele na, Ọghẹnẹ ọ rẹ gba ahwo họ koko izi riẹ hẹ.
Jihova ọ kẹ Adamu avọ Ivi eware kpobi nọ a gwọlọ evaọ uzuazọ re a sae wereva. (Emuhọ 1:28, 29; 2:8, 15) O te je fi izi họ kẹ ae nọ a re koko, rekọ izi na e ga hrọ họ. Ọ kẹ rai uvẹ re ae ọvo a salọ sọ a re koko izi na hayo a re koko ai hi. (Emuhọ 2:9, 16, 17) U yoma gaga nọ Adamu avọ Ivi a salọ nọ a re ru onọ udu rai o ta kẹ ae viukpenọ a re koko izi Ọghẹnẹ. (Emuhọ 3:6) Kọ eme o no rie ze? Kọ eware i woma kẹ ahwo-akpọ no fikinọ ae ọvo a be jiroro oware nọ u woma gbe onọ u yoma kẹ omarai? Ijo. Eware nọ e be via anwọ oke yena ze i dhesẹ nọ, ahwo a gbe bi ru oware nọ Ọghẹnẹ ọ ta ha, a re wo udhedhẹ gbe evawere he.—Ọtausiuwoma Na 8:9.
Ma rẹ jọ Ebaibol na ruẹ ehrẹ nọ i re fiobọhọ kẹ omai jẹ emamọ iroro, ghelọ oria nọ ma be rria hayo oghẹrẹ nọ a rọ yọrọ omai kẹhẹ. (2 Timoti 3:16, 17; rri ẹkpẹti na “ Obe nọ U re Fiobọhọ kẹ Ahwo Kpobi.”) Joma ta kpahe epanọ Ebaibol na o bi ro fiobọhọ kẹ ahwo.
Wuhrẹ kpahe oware nọ ma sae rọ ta nọ Ebaibol na yọ “ẹme Ọghẹnẹ.”—1 Ahwo Tẹsalonika 2:13. Rri ividio na Ono O Wo Eme Ebaibol Na? evaọ jw.org.
EBAIBOL NA Ọ VUẸ OMAI OWARE NỌ ỌGHẸNẸ Ọ GWỌLỌ NỌ MA RE RU
Ma rẹ jọ Ebaibol na ruẹ oghẹrẹ nọ Jihova o ro yerikugbe ahwo no anwae ze. Eware nọ e rrọ Ebaibol na i re fiobọhọ kẹ omai riẹ eware nọ Ọghẹnẹ o rri nọ i woma gbe enọ i woma ha, eware nọ e rẹ wha erere se omai gbe enọ e rẹ wha uye ze. (Olezi 19:7, 11) Ehrẹ Ebaibol i re kiekpo ho, i re fiobọhọ kẹ omai jẹ emamọ iroro kẹdẹ kẹdẹ evaọ uzuazọ.
Wọhọ oriruo, roro kpahe ohrẹ nọ o rrọ obe Itẹ 13:20: “Ọnọ o bi lele iwareghẹ nya usu o re wo areghẹ, rekọ ọnọ o ku usu gbe ahwo ogheghẹ o re kie ruọ ẹbẹbẹ.” Ohrẹ yena u gbe wo iruo kẹ omai enẹna wọhọ epanọ o jọ kẹ ahwo oke anwae. Ma rẹ jọ Ebaibol na ruẹ oghẹrẹ ehrẹ itieye na buobu, yọ i re fiobọhọ kẹ omai.—Rri ẹkpẹti na, “ Ehrẹ Ebaibol na I re Kiekpo Ho.”
Rekọ whọ sae nọ inọ, ‘Ẹvẹ mẹ sae rọ riẹ sọ ehrẹ Ebaibol e sai gine fiobọhọ kẹ omẹ enẹna?’ Ma te jọ uzoẹme nọ o rrọ aro na ta kpahe iku ahwo jọ.
a Jihova họ odẹ Ọghẹnẹ.—Olezi 83:18.
