Ọghẹnẹ Ọ rẹ Ghale Ahwo nọ A re Fiobọhọ kẹ Amọfa
Oware nọ ahwo buobu a gwọlọ evaọ akpọ na họ, uwou nọ a rẹ rria gbe emu nọ a rẹ re. Rekọ oware nọ amọfa jọ a gwọlọ họ, epanọ a re ro yo emamọ usi na kpahe ẹruore nọ ma wo evaọ obaro. Ma tẹ daoma fiobọhọ kẹ ahwo otiọye, Ọghẹnẹ o ti ru omai wo aruoriwo riẹ jẹ ghale omai.
OWARE NỌ IKEREAKERE NA E TA
“Ohwo nọ o bi fiobọhọ kẹ oruori o bi momo kẹ Jihova, yọ Ọ te hwa oware nọ o ru zihe kẹe.”—ITẸ 19:17.
OWARE NỌ U DHESẸ RE A FIOBỌHỌ KẸ OHWO NỌ Ọ GWỌLỌ OBUFIHỌ
Jesu ọ kẹ ọtadhesẹ jọ kpahe ọzae jọ nọ igbulegbu a kpe kẹle uwhu no, kẹsena a tẹ nya siọ iẹe ba. (Luk 10:29-37) Ohwo jọ nọ ọ jẹ nya edhere yena vrẹ ọ tẹ wẹriẹ je fiobọhọ kẹ ọzae na. O fiobọhọ kẹ ọzae na dede nọ aimava a no uyẹ ovona ze he.
Ohwo na o ku ewhri fihọ emela ọzae na, ọ tẹ jẹ hwosa kẹ omọfa nọ ọ rẹ sai siwi ei. Enẹ o ro fiobọhọ kẹ ọzae na jẹ sasa iẹe oma.
Eme ma wuhrẹ no ọtadhesẹ nana ze? Jesu ọ rọ ọtadhesẹ na wuhrẹ omai inọ ma dawo ẹgba mai kpobi re ma fiobọhọ kẹ ahwo nọ a gwọlọ obufihọ. (Itẹ 14:31) Ebaibol na ọ ta nọ kẹle na, Ọghẹnẹ o ti si uvuhu gbe uye-oruẹ kpobi notọ. Ma sae nọ inọ, ẹvẹ Ọghẹnẹ o ti ro ru onana, kọ oke vẹ o ti ro ru ei? Uzoẹme nọ o rrọ aro na o ta kpahe epanọ Ọnọma oyoyou ra na ọ te rọ ghale owhẹ evaọ obaro.