Hae Lẹ Se Ọghẹnẹ re Who Wo Aruoriwo Riẹ
Ọghẹnẹ ọ kẹ omai obọdẹ okẹ jọ. Okẹ yena họ, ọ ma omai evaọ oghẹrẹ nọ ma sae rọ vuẹe oware nọ o be kẹ omai uye evaọ olẹ. Devidi ọruẹaro na ọ lẹ nọ: “O Ọnọ o re yo olẹ, whẹ họ ọnọ oghẹrẹ ahwo kpobi a rẹ nyabru ze.” (Olezi 65:2) Rekọ ma tẹ gwọlọ nọ Ọghẹnẹ o yo olẹ mai jẹ ghale omai, oghẹrẹ vẹ ma rẹ lẹ olẹ mai?
LẸ SE ỌGHẸNẸ NO UDU ZE AVỌ OMAUROKPOTỌ
Whọ sae ‘ta eva ra kpobi kẹ Ọghẹnẹ’ evaọ oke nọ whọ tẹ be lẹ. (Olezi 62:8) O rẹ were Ọghẹnẹ Erumeru na nọ ma tẹ lẹ sei no udu ze.
HAI SE ODẸ-OMA ỌGHẸNẸ
Dede nọ Ọghẹnẹ o wo edẹ-ova buobu, odẹ-oma ọvuọvo o wo. Ọ jọ Ẹme riẹ ta nọ: “Mẹ họ Jihova. Odẹ mẹ oye.” (Aizaya 42:8) Odẹ na, Jihova o romavia oware wọhọ asia idu ihrẹ (7,000) evaọ Ikereakere Efuafo na. Eruẹaro Ọghẹnẹ buobu evaọ oke anwae a jẹ hai se odẹ-oma Ọghẹnẹ evaọ oke nọ a tẹ be lẹ. Abraham ọ ta nọ: “Jihova, ivie, . . . jomẹ gbẹ ta ẹme [kẹ owhẹ].” (Emuhọ 18:30) Nọ ma tẹ be lẹ, u fo nọ ma re se odẹ-oma Ọghẹnẹ, Jihova.
WHỌ SAE RỌ ẸVẸRẸ RA LẸ
Makọ ẹvẹrẹ nọ ma rọ lẹ se Ọghẹnẹ kẹhẹ, o re yo ẹme nọ ma be ta jẹ riẹ epanọ eware e rrọ omai oma. Ẹme Ọghẹnẹ ọ kẹ omai imuẹro inọ: “Ọghẹnẹ o wo ọriẹwẹ hẹ, rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiehọ ọ rẹ jẹe rehọ.”—Iruẹru Ikọ 10:34, 35.
Ghele na, ma tẹ gwọlọ nọ Ọghẹnẹ ọ ghale omai, orọnikọ ẹlẹ ọvo ma rẹ lẹ hẹ. Evaọ izoẹme nọ e rrọ aro na, ma te ta kpahe oware nọ u fo nọ ma re ru.