Ọghẹnẹ Ọ rẹ Ghale Ahwo nọ A Yoẹme Kẹe
Mosis ọruẹaro na ọ ta nọ ma te koko izi Ọghẹnẹ, ma re wo eghale riẹ. (Iziewariẹ 10:13; 11:27) Orọnikọ re Ọghẹnẹ ọ siọ omai uye ba ẹkẹ, ma re ro koko izi riẹ hẹ. Ma te roro kpahe epanọ Ọghẹnẹ o woma te, o rẹ wọ omai yoẹme kẹe keme ma you rie yọ ma gwọlọ ru oware ovuovo nọ o rẹ dhae eva ha. Ẹme Ọghẹnẹ ọ ta nọ: “Enẹ ma re ro dhesẹ nọ ma you Ọghẹnẹ, ma re koko ijaje riẹ.”—1 Jọn 5:3.
Rekọ ẹvẹ ma re ro wo eghale Ọghẹnẹ nọ ma te yoẹme kẹe? Joma ta kpahe idhere ivẹ jọ.
1. MA RE WO AREGHẸ NỌ MA TE YOẸME KẸ ỌGHẸNẸ
“Mẹ Jihova, mẹ họ Ọghẹnẹ ra, Ọnọ o bi wuhrẹ owhẹ re who wo erere kẹ omara, Ọnọ o bi su owhẹ evaọ edhere nọ u fo nọ whọ rẹ nya.”—AIZAYA 48:17.
Jihova Ọghẹnẹ nọ ọ ma omai na ọ riẹ omai ziezi, yọ ọ be kẹ omai ekpọvio nọ ma gwọlọ. Ma tẹ gwọlọ nọ Ẹme riẹ o re fiobọhọ kẹ omai jẹ emamọ iroro, ma re se Ikereakere Efuafo na re ma riẹ oware nọ ọ gwọlọ, ma ve je ru lele eware nọ ma se na.
2. MA RE WO EVAWERE NỌ MA TE YOẸME KẸ ỌGHẸNẸ
“Eva e were enọ i bi yo ẹme Ọghẹnẹ je bi koko iei!”—LUK 11:28.
Nẹnẹ, ima ahwo buobu a bi wo uvi evawere keme a bi ru lele Ẹme Ọghẹnẹ. Wọhọ oriruo, u wo ọzae jọ evaọ obọ Spain nọ ọ jẹ hai mu ofu gaga, yọ o re dhuaro ku ahwo, makọ aye riẹ dede. Ẹdẹ jọ, ọ tẹ jọ Ikereakere Efuafo na se eme nọ Mosis ọruẹaro na o kere kpahe Josẹf ọmọzae Jekọp. A zẹ Josẹf kpohọ igbo je fi ei họ uwou-odi ekueku; ghele na, ọ jọ wowolẹ, o ru udhedhẹ, yọ ọ rọvrẹ amọfa no eva ze. (Emuhọ izou 37-45) Ọzae obọ Spain na ọ ta nọ: “Nọ me roro kpahe oriruo Josẹf na, o wha riẹ ze nọ mẹ rọ rrọ wowolẹ, wowou, jẹ be kpọ ofu mẹ. Onana u bi ru nọ eva e be rọ were omẹ enẹna.”
Ikereakere na i wuhrẹ omai eware efa buobu kpahe epanọ ma re ro yerikugbe amọfa. Ma te ta kpahe onana ziezi evaọ uzoẹme nọ o rrọ aro na.