Ọghẹnẹ Ọ te Ghale Omai Bẹdẹ Bẹdẹ
Ọghẹnẹ ọ ya eyaa kẹ Abraham inọ ẹkwoma ọmọ riẹ jọ “erẹwho otọakpọ na kpobi” a ti ro wo eghale. (Emuhọ 22:18) Ono họ ọmọ yena?
Enwenọ ikpe idu ivẹ (2,000) nọ i kpemu, Ọghẹnẹ ọ kẹ Jesu nọ o no uyẹ Abraham ze ogaga nọ o je ro ru iruo igbunu. Iruo igbunu yena i dhesẹ nọ ẹkwoma Jesu eyaa nọ Ọghẹnẹ ọ ya kẹ Abraham na i ti ro rugba.—Ahwo Galesha 3:14.
Iruo igbunu nọ Jesu o ru i fiobọhọ kẹ ahwo riẹ nọ ọye Ọghẹnẹ ọ salọ re ọ ghale ahwo-akpọ, yọ Ọghẹnẹ ọ te rehọ iẹe ghale ahwo-akpọ bẹdẹ bẹdẹ. Muẹrohọ epanọ iruo igbunu Jesu i ro dhesẹ iruemu riẹ jọ via.
Ohrọ-Oriọ—Jesu o siwi ahwo nọ a jẹ mọ.
Ẹdẹ jọ, ọmoti jọ ọ lẹ Jesu re o siwi ei. Jesu ọ tẹ rọ obọ tei jẹ ta nọ: “O ruọ omẹ.” Ẹsiẹvo na, oti na o te noi oma.—Mak 1:40-42.
Ọghoruo—Jesu ọ ko ahwo nọ ohọo u je kpe.
O kẹ Jesu uye nọ ọ ruẹ ahwo nọ ohọo u je kpe. Ọ rọ ebrẹdi gbe imiyei nọ i tulo ho kuọ idu ahwo buobu, yọ orọnikọ ẹsiẹvo ọvo o ru onana ha. (Matiu 14:17-21; 15:32-38) Nọ ahwo na kpobi a make re eva vọ no dede, emu buobu o kiọkọ ghele.
Ọdawẹ—Jesu ọ kpare ahwo nọ a whu no ze.
Nọ Jesu ọ ruẹ ọmọzae ọvo aye-uku jọ nọ a be wọ nyai ki, “ohrọ riẹ o tẹ re iẹe” keme ohwo ọvo ọ gbẹ riẹ nọ ọ te rẹrote aye na ha, fikiere ọ tẹ kpare iẹe ze.—Luk 7:12-15.