No anwọ oke nọ Ọghẹnẹ ọ rọ ma ohwo-akpọ ze, ọ jẹ hae rọ ẹkwoma ikọ-odhiwu gbe eruẹaro riẹ ta ẹme kẹ ahwo. Ofariẹ, o ru nọ a ro kere eme gbe eyaa riẹ fihotọ. Eyaa nana nọ ọ ya na i dhesẹ nọ ma ti wo evawere evaọ obaro. Diẹse whọ sae jọ se kpahe eyaa Ọghẹnẹ nẹnẹ?

Ẹme Ọghẹnẹ ọ rrọ Ikereakere Efuafo na. (2 Timoti 3:16) Oghẹrẹ vẹ Ọghẹnẹ ọ rọ rehọ eruẹaro riẹ kere eme nọ e rrọ Ikereakere na? (2 Pita 1:21) Ọghẹnẹ o fi eme riẹ họ iroro ahwo nọ a kere Ikereakere na, kẹsena a te kere ai fihotọ. Ma sae rọ oriruo ọga iruo ro dhesẹ iẹe. Otẹrọnọ ọga iruo ọ ta kẹ okere-obe riẹ re o kere ileta, ọga iruo na họ ọnọ o wo ileta na orọnikọ okere-obe na ha. Epọvo na re, dede nọ Ọghẹnẹ ọ rehọ ahwo-akpọ kere Ẹme riẹ, ọye họ Ọnọ o gine wo Ikereakere Efuafo na.

Ọghẹnẹ ọ gwọlọ nọ ahwo kpobi a re se Ẹme riẹ je wo otoriẹ riẹ vevẹ fiki epanọ o roja te. Nẹnẹ, “usi uwoma ebẹdẹ bẹdẹ” nọ o rrọ Ikereakere Efuafo na o rrọ rọkẹ “orẹwho, orua, ẹvẹrẹ” gbe utu ahwo kpobi. (Eviavia 14:6, ẹme-obotọ) Ọghẹnẹ o ru nọ a rọ fa oma Ikereakere na soso hayo abọ riẹ jọ fihọ evẹrẹ no i bu vi idu esa (3,000) no. Obe ọfa nọ a fa bu te enẹ no ọ riẹ hẹ.